2024-4-6，今朝又出去行吓，睇吓堀川啲櫻花啦，途中經過高知八幡宮，據說依間神社係700幾年前嘅鎌倉時代末期創建，當時係喺依家高知城咐近，大約百五年前搬嚟依度。
高知八幡宮嘅拜殿，主祭神當然係八幡神，即係應神天皇。
跟住行到去堀川睇櫻花。
喺河邊已經有人霸定位賞櫻，佢哋好老實會寫埋幾點鐘會嚟，之前可以自由使用。
睇完就行返洒店，又經過はりまや橋(播磨屋橋)。
因為高知市係漫畫家柳瀨嵩成長嘅地方，所以市內有好多漫畫麵包超人嘅做像。
跟住行返酒店食埋個早餐，今日有咖哩飯食，正！
食完早餐就拜拜，攞埋行李去高知駅搭火車去四萬十，車站內又見到麵包超人。
搭JR特急しまんと1号
大約個半鐘就去到四萬十川市嘅中村駅。
寄存行李之後就走出站外面坐高知西南交通嘅「市街地から佐田沈下橋までの循環周遊バス」去睇四萬十川。
「市街地から佐田沈下橋までの循環周遊バス」係由中村駅出發嘅循環巴士，一圈大約個半鐘，每日有四班車，一張車飛￥500，可隨上隨落。我哋喺佐田沉下橋（今成橋）站落，去睇沉下橋。
約行5分鐘就去到佐田沉下橋，佐田沉下橋係四萬十川下遊最後一條沉下橋，亦係最長(291.6m)一條。沉下橋係四國嘅建築特色，橋邊冇欄杆，以方便當大雨河水暴漲時，可以減少阻力俾水流過橋面，條橋就好似沉入水中咁。不過我就諗，其實會唔會係四國窮，冇錢整欄杆？
依條橋可以俾事行，不過我就覺得因為冇欄杆所以有啲牙煙
坐喺橋邊，望住清澈嘅四萬十川。
四萬十川係四國第二大河，全長196公里，因上游至下游都未建設任何大型水利設施，而有「日本最後清流」之稱。
四萬十川市係2012年日劇『遅咲きのヒマワリ〜ボクの人生、リニューアル〜』(遲開的向日葵)嘅主要場景，佐田沉下橋喺劇集中更出現無數次。
遲開的向日葵男主角生田斗真喺劇中嘅住屋。
男主角生田斗真嘅對面屋，屋主好照顧生田，不過第一集就過咗身。
跟住行去車仔咖啡店hotori coffee，買杯咖啡嘆吓先。
店前面可以睇住佐田沉下橋同四萬十川。
本來諗住去坐屋形舟，不遇今日第一班船唔開，第二班開2:30，時間唔啱，下次先啦。
未夠鐘搭車，行去廁所，見到路邊有棵櫻花樹開得幾靚。
跟住搭返車返去四萬十市，去參拜吓一條神社。一條神社係土佐一條氏嘅家族神社，一條氏本身係室町幕府中期嘅朝廷攝政、關白、左大臣等官職。不過後來因為應仁之亂(1467-1477)而流亡土佐(現時嘅高知縣)，從此在此落地生根。
拜殿同前面嘅櫻花。
一條神社主祭神係一條氏嘅祖先。
舞殿
依家啲神社好鍾意整特色御朱印，不過我就覺得平時嗰啲法力高啲。
行完一條神社就去天神橋商店衘食嘢，揾咗依間「一こくラーメン泉や」食拉麵做午餐。
食完拉麵就去買水果，行過依間「とみか青果」，見啲士多啤梨幾靚吖，一於買嚟做飯後果啦。
買完士多啤梨就開始落雨，本來諗住去睇吓水車都唔得，惟有行去火車站坐吓就算啦。途中見到啲特色水渠蓋，依家日本越嚟越多彩色水渠蓋。
返中村駅坐低食士多啤梨，中村駅又幾好，車站候車室幾正，有枱有凳仲有得叉電。
坐到三點半就搭土佐くろしお鉄道宿毛線去宿毛轉巴士去宇和島。本來用JR四國pass可以免費去宇和島，不過車程較為于迥，去到宇和島市較晏。所以俾多千幾円早個半鐘頭都照殺啦。
約半個鐘就去到宿毛駅。
等宇和島自動車巴士去宇和島市。
見仲有時間，行去咐近睇吓啦。火車站前嘅与市明川河岸啲櫻花都開得幾靚。
再睇埋稻荷神社
大約坐兩個鐘巴士就去到宇和島市，我哋今晚住宇和島駅前天然温泉Super Hotel。
依家好多Super Hotel都有Welcome Bar，可以嘅黃昏時段飲吓當地出產嘅酒或者橙汁。
Super Hotel最正梗係有溫泉浸啦。
雖然房間就細啲，但交通方便(通常喺車站附近)，又唔貴又有溫泉浸，好多時我都會揀佢。
今晚去酒店咐近嘅ほづみ亭食晚餐。
依間餐廳主要係食海鮮，媽咪主要食魚生，我就食熟嘢多。
四國鄉土料理：炙烤半熟鰹魚片。
留言列表
