hkt222976的部落格

前言

今年3月頭見國泰推出香港飛行一百年嘅紀念活動，4月頭可以$1999飛日本，抵到飛起！於是即刻上網check吓D酒店同航班，諗住今次同胃食媽咪玩吓 日本中部同去吓京都睇櫻花！就响3月11日上晝買咗機票，點知下晝就9級大地震！旅行社個Friend臨收工仲打電話問我驚唔驚呀？我咪話東北之嘛，我去 東海同近畿，邊有事吖？點知最後咁大鑊，到依家都收唔到科！好彩國泰最後都比我轉目的地，於是就成了今次嘅『台灣南北8天自遊行』嘞！
2011年4月5日，因為一早已經網上check in同劃位，所以45分鐘前到機場便可。

出發啦！

搭港龍KA432去高雄。

D飛機餐就麻麻嘞，不過幾片奇華曲奇就幾好食！

一個鐘頭多D就到達高雄小港機場，因為我一早响網上Book咗明日嘅墾丁一天遊嘅包車，包車公司仲同我安排咗機場落墾丁嘅共乘車。一出閘就有位司機攞住個有我名嘅牌接我機，然後就直落海生館(全名係國立海洋生物博物館)。

沿途經過好多都係種洋葱嘅田，司機話洋葱係依道嘅特產喎！

約個半鐘頭就到咗海生館，我哋就落車，嗰位司機就就將我哋D行李車去墾丁大灣我哋訂咗嘅海堤民宿嘞。我就搵定墾丁街車站同時間表，方便走嘅時候搭車落墾丁。

一入門口就係海生館嘅生招牌---鯨鯊。

海生館入面嘅珊瑚區，好多靚靚珊瑚魚睇嫁！

我哋仲有睇來自俄羅斯嘅小白鯨添

仲有招潮蟹同彈塗魚

 
依間海生館好似日本D海洋館咁，唔只有得睇，係仲有得摸嘅！

真係石頭一樣嘅『石頭魚』

 

終於見到皇牌鯨鯊嘞！雖然冇沖繩海洋博咁震撼，但都好靚嫁！

仲有巨形海藻羣

來自南極嘅企鵝，游水游得好快！

海生館地方唔係大，約睇三個鐘就睇完，跟住就搭墾丁街車落墾丁。

約半個鐘頭就落到墾丁大街，跟住就行出墾丁大灣，去我哋嘅民宿嘞。

我訂嘅係海堤，睇得到海灘風景，幾靚嫁！我哋到咗門口影返兩張相，個老板娘走出嚟問我哋係咪想租房？我話我訂咗嫁嘞，影完相就入嚟搵你攞房啦！

間房都好靚，不過D民宿最怪就係開放式廁所，唔熟嘅朋友一齊住就麻煩D。

最正就係個露台，望住墾丁大灣海灘，好正嫁！

攤抖咗一輪就出去行吓同醫肚先

我最鍾意就係行Family Mart，好似去咗日本咁！

晚上嘅墾丁大街好旺，好多檔口仔，D小食仲好好味添！

我哋仲食燒生蠔，大大隻好好味。

行完食完就返海堤上吓網，check吓聽日D天氣啦！