2011-04-06(Day 2-Part 2),去完台灣最南點後,本來想去捻花餐廳食飯,點知去到先知今日休息。於是東方大哥話不如玩多陣先去第二道食吖,跟住我哋去睇龍磐公園。
龍磐公園係墾丁國家公園嘅一部分,屬崩崖地形,即係個山崖比D風浪打到崩晒囉。依處對住個太平洋,風景好靚嫁,不過就真係好鬼大風。
除咗睇海靚之外,東方大哥仲話,依道因多冇光害,睇星都好靚嫁!
跟住就去風吹沙。依道仲大風,連D海灘上嘅沙都吹埋上山!
真係成個山頭都係沙,冇花冇假嫁!
媽咪就吹到頭髮都亂晒!幾乎企唔穩,拿拿臨走囉!
然後去睇港口吊橋,我覺得有D似條蚊形嘅青馬大橋。
大橋上向外望就係太平洋。
我哋就响依間茶山牛肉麵食午餐嘞!
食完麵後就去恒春古城,先去東門。
我哋行上城樓上嘅城牆道影相,媽咪仲話要影張跳起嘅!
跟着去睇電影『海角七號』男主角『阿嘉』嘅屋企。
依套台灣史上最收得嘅戲,亦令到恒春半島成為旅遊熱點。
媽咪寫咗封瓶中信寄返屋企,我哋返到香港兩日就收到嘞!
寄完信後就行去恒春老街,東方介紹我哋响依間買洋葱蛋卷,好脆、好好味!
東方大哥仲請我哋食『綠豆蒜』同『剉冰』添。
媽咪最鍾意做手工,依間遇見蜻蛉有得玩燒琉璃珠,一於玩吓啦!
首先聽帥哥阿Ken講解一次先!
然後就開始自己開工嘞!
不過間中都要阿Ken幫手嫁!
燒好之後要冷卻一個鐘頭,我哋就玩到睇完日落先返嚟攞!
去睇日落時經過保存得最好的恒春古城『南門』。
沿途仲去睇吓貓鼻頭,依道好多大陸團嚟睇嫁!
不過我點睇都唔覺得依堆石似貓頭,睇嚟我真係冇乜想像力。
貓鼻頭公園對面係台灣核電三廠,隔離仲有風力發電站。
睇完貓鼻頭後就去白沙海灘,依處亦係海角七號拍攝場地之一,D沙好白好靚!
阿嘉和友子擁抱一幕就係响依道拍嘞!
之後就去關山睇日落。
睇完日落就返恒春攞返條琉璃珠電話繩。
最後就係去睇出火嘞,依處因為有地底天然氣,所以只要响地下打一個孔,就可以點得着火,但唔知點解當地人又唔攞佢地嚟用呢?
玩完一日就返去墾丁大街醫肚。
不過今日依檔生蠔冇琴晚嗰檔咁大隻,唔抵食!
留言列表