行完上野恩賜公園，就搭山手線去芊芊最愛嘅秋葉原。一出站就有間Gundam Cafe，佢哋餐廳入面好多高達poster，同埋將D食物整到好似高達咁。
之後上去Akiba UDX Center４樓嘅Tokyo Anime Center，不過都冇展覽睇，芊芊就响間紀念品店買咗D poster。
ACG專門店"Softmap"
D人話响秋葉原街頭好多電車男，我就唔多覺吖，咪同香港深水埗咁。只係多咗D女僕响街頭派宣傳品，不過我一想影佢哋就轉身唔比我影，吹漲！
跟住同芊芊約好比佢自己行個半鐘，我就同媽咪搭山手線返去上野行街，之後返嚟接番佢。
出咗上野站嘅廣小路口行過對面天橋底就係日本女人街『アメヤ橫丁』。
依道D貨乜都有，食嘅、着嘅、用嘅，因為平所以好多日本人嚟買嘢。
媽咪最鍾意飲茶，响依間舖頭買茶葉。
行到口乾，食番件菠蘿先。
之後返去上野駅搭車，响車站見到間叫『芊』嘅和果子舖頭，影低佢先！
之後返秋葉原接芊芊，然後去竹芝碼頭去睇吓搭唔搭到『東京灣納涼船』。一出浜松町站就有好多浴衣少男少女，睇嚟佢哋都係去搭納涼船。
出站後就行去碼頭，沿途好多人着浴衣，好靚嫁！
原來D船飛多數都係預訂，我哋冇訂就要等後補，好彩都排到後補。
東京灣納涼船會由竹芝碼頭出發，經彩虹橋出東京灣繞一圈再返回竹芝碼頭，全程約兩個鐘，船上飲放題，食就要自己買。船費大人￥2500，穿浴衣減￥1000，高中 生￥1000，我哋買咗三張大人飛，但之後個服務員走出嚟問芊芊係咪讀緊中學，之後退返￥1500比我哋！其實今朝去動物園都係一樣，問吓芊芊係咪中學 生，之後就叫芊芊買學生票，日本人真係老實！
走上甲板上面睇東京灣夜景，不過依家節電中，無晒D五光十色嘅招牌啦！
不過天氣真係好熱，海風唔大、甲板上人又多，都納唔到涼嘅！
都係落返船艙涼吓冷氣仲好啦！
船艙內都有D娛樂嫁，就係有人唱歌同跳舞，嚟玩D人個個都好high！
好快就兩個鐘，之後上返岸，同納涼船影返張相啦！
之後就返番新宿食嘢，早D瞓，準備聽日去鎌倉同橫浜。
留言列表
