玩完東京鐵塔之後,就搭大江戶線去淺草,出站後見到KFC門口有張芊芊最鍾意嘅海賊王poster,芊芊本來都想食個餐換個海賊王杯,不過要¥980一個餐,太貴嘞。都係影番張相算啦!
入咗雷門之後就係『仲見世通』,即係商店街。
成條仲見世通好多嘢賣,芊芊同媽咪就開心囉!
芊芊原來今次嚟係想買套浴衣。
依套和服芊芊話好靚,我咪話係日本細路响『七五三祭』時先着嫁咋!
最後終於响依間suzuya道買咗套浴衣。
芊芊就笑得開心囉,出年動漫節可以着浴衣!
之後就入去淺草觀音寺道拜吓觀音啦!
芊芊好誠心咁拜同求咗支簽,係大吉簽嚟嫁!
我就買咗個學業御守比皓怡,同健康御守比嫲嫲。
行完淺草就去吾妻橋碼頭,搭依架『Himiko』號水上巴士去台場。
後面的高塔就係天空樹,預料將於2012年5月完工,高634米,差不多係東京鐵塔嘅一倍,話會取代東京鐵塔嘅廣播功能。
Himiko號係由畫『銀河鐵道999』的動畫大師『松本零士』設計,船內、外的設計充滿未來feel,船內的廣播亦由『銀河鐵道999』的配音員錄音。
船程40分鐘便由淺草來到台場海濱公園。
碼頭對面就係富士電視台。
沿海濱公園的海邊小徑去睇小自由神像,咁都比芊芊偷影咗添。
芊芊話海邊好多水甴曱同蟹仔,係咁叫我同佢捉。我話佢哋走得咁快捉唔到嫁,坐吓休息吓等日落仲好啦!不過芊芊始終坐唔定,係咁走來走去!
我覺得台場最正係對住彩虹橋睇日落,不過依家福島爆大鑊,東京要節電,彩虹橋都冇燈,失色好多囉!
日落之後就去睇小自由神像。
跟住就行入Aqua City商場,見到有間Jump shop,專賣Jump的動漫產品,芊芊開心死囉,即刻要入去掃貨!
連門口D扭蛋機、抽卡機都唔放過!
連咁多期嘅jump封面都唔放過,芊芊全部影低晒佢。
跟住行上5/F麵祭,食拉麵。依道話集中全國各地嘅拉麵,好正嫁!
食完麵就去4/F行吓,見到有間Tokyo Leisureland,類似冒險樂園,有得打機同夾公仔,仲有得影貼紙相,可以影到D人眼好大又美白,媽咪梗係要影啦!
最後行出門口睇吓夜景,可惜節電中冇乜嘢睇,又熱辣辣,夜麻麻仲成31度。咁咪搭鷗百合號再轉大江戶線返酒店嘆冷氣囉!
留言列表