2011年8月9日,今日行程輕鬆D,又瞓到成9點先起身,之後行咗過隔離街『小滝橋通』搵早餐食。最後揀咗依間『チキン亭』。
然後攞張飛仔,坐低等食。
腸仔蛋早餐定食,¥360。
豚汁早餐(連納豆)定食,¥390。
炸豬扒飯定食,¥490。
跟住就去今日嘅第一站『上野恩賜公園』,搭山手線上野駅出就係嘞!
入到公園即刻行去西鄉隆盛銅像影番張相先。
西鄉隆盛最初扶助明治天皇進行變法維新,是維新三傑之一,後因維護日本傳統和武士道,同明治意見不同而下野(我覺得係明治打完齋唔要和尚啫)。後來在家鄉鹿兒島被迫發動日本最後的一場內戰---西南戰爭,到戰敗而『切腹』。但最後明治天皇都為他平反,並在上野公園立像。日本人對他十分尊重,而他的故事亦反映在要電影『最後武士』裏。
公園內的『花園稻荷神社』。
之後行去園內嘅『不忍池』,個池塘有成個維園咁大,池內種滿荷花!
上野恩賜公園四季有不同景色,春天賞櫻、夏天賞荷、秋天賞紅葉、冬天賞鳥。
池內亦有好多鯉魚和水鴨。
有位婆婆在池邊寫生。
在不忍池中央有一間神社『弁天堂』。
入神社前先要洗手。
神社係供奉『辨才天尊』,即係七福神中的女神『弁才天』。
跟住行去上野動物園。
園內最出名係熊貓,不過多人排隊,我哋冇睇到。
捲成一個波咁嘅穿山甲。
我覺得最得意係黑腳企鵝,原來佢哋生活响非洲而唔係南極。
園內有好多退休人仕,嚟動物園做義工。
睇完動物園之後就行去公園內嘅上野東照宮。
東照宮係幕府將軍德川家康的家族神社,德川家族實際統治日本二百多年,全國有好多東照宮,依間只係其中一間。
神道旁兩邊排滿石燈籠。
大殿正在維修中,只係掛咗幅大畫布出嚟比人睇吓。
其實公園內仲有好多博物館同文化館,不過我哋冇時間行吖。
臨走時响門口見到有一班學生為東北大地震籌款。
留言列表