11年暑假我哋兩公婆帶埋芊芊，去日本關東(即係東京、橫濱同神奈川縣一帶)玩咗5日，响東瀛遊訂咗個5日套票，住新宿太子酒店。可能D人都係驚D輻射所以都冇乜加價，三個人萬五蚊找數，都好抵玩吖！
2011年8月7日，晨早5點15分就落樓下搭A10去機場。
我哋搭達美航空DL638班機，8:25起飛，14:00到達成田。
下晝2點就去到成田機場，然後買張遊客專用嘅Suica卡+N'EX車票，￥5,500有一張￥2000嘅Suica卡同一套來回成田機場嘅N'EX車票，好抵嫁！
今次嚟見識到日本人D慳電招數：D公共燈光只開一半、非繁時間D地鉄減班次、自動販賣機熄燈、冷氣開到28度......
落車之後行去新宿西口嘅1號出口直行。
見到依間特價票店繼續直行。
行到依個路口，就見到我哋住嘅朱古力色嘅新宿太子酒店嘞！
我哋間房都算幾大，係Twin加床，不過房內冇wifi，要落大堂先有。
同埋為咗節能，我哋房間D冷氣最低只可以較到25度。
擺低行李後就行返去新宿站搭車去池袋行街，不過今日天色唔靚，仲有D雨！
我哋搭JR山手線去池袋。
出咗站之後就行去Sunshine city，沿途有間遊戲機店，門口有隻大鬆弛熊，入面仲有好多鬆弛熊夾添！
然後行到去Tokyu Hands，比芊芊買D動漫公仔，我哋就响店內見到部Puzzle機，只要插張SD或者其他紀憶卡，然後就可以揀張相做Puzzle嫁嘞，只係￥300一張，我哋都做咗一張嚟玩，好靚嫁！
我哋揀咗依張啱啱响日高屋前面影嘅相嚟玩吓。
然後我哋就去Sunshine City行Namja Town，芊芊叫佢做貓貓屋，入面有嘢食，又有嘢玩(不過唔知點玩)。
我哋去行餃子區，全國各地方口味嘅餃子都有得食！
買完票就攞個牌等食。
食完餃子就街icecream city，又係有好多間雪糕店任揀
响雪糕店門口有部『網球王子』嘅貼紙相機，好多日本妹排隊影相。
响Sunshine city入面有間好大嘅書店，好多動漫書，芊芊同媽咪又睇又買！
行完街之後就去日高屋食拉麵。
最後就返酒店附近嘅歌舞伎町行吓影吓相啦！
留言列表
