2023-2-10，今朝起身走出去附近行吓，依間係静松寺，係山形市嘅一間小型寺院，主要都係經營私人墓園
寶光院，傳說由慈覺大師(圓仁)於826年創建嘅天台宗寺院(當時位於山形市中野區)。 1601年，由當時嘅山形城主最上義光遷至現址。
寶光院正殿，1957年被山形縣指定為有形文化財。
寶光院內嘅山形百八地藏尊靈場第26號（六面地藏菩薩）。
之後行過去六椹八幡宮，據說、源頼義喺奧州9年之役(1051年1062年)時行軍到此，當地居民說這裏有六棵椹樹(柏樹)供奉八幡大神(日本嘅戰神)甚為靈驗，源頼義因見戰事已打咗幾年都冇乜進展，於是向八幡神祈求戦勝。不久果然戰勝，便於康平6年(1063年)建做神社答謝神恩。
神社前嘅心形石
鳥居前面有嚿「なで石」，我覺得有啲似壽司。
八幡宮嘅拜殿
喺拜殿前面放咗啲家庭本曆(即係香港嘅通勝)喺度，教人趨吉避凶
八幡宮嘅其中一間攝末社~住吉神社
行完就返酒店食早餐，跟住返山形駅搭新幹線去福島，站內有兩架用lego砌嘅新幹線
搭山形新幹線啦，媽咪幾輕鬆，兩手揈揈去搭車，手袋都唔使攞。梗係啦，漏咗喺洒店吖嘛
開咗車先發覺冇帶手袋，嗱嗱臨喺第二個站「上山溫泉駅」落車啦，其實依個係乜地方都唔知，但點都要搭回頭車返去㗎啦。
跟住去搵電話打返酒店，當地公共電話多數都係插卡電話，幾經辛苦先喺郵局側邊搵到一個可以入錢嘅電話。打返酒店，話我哋會晏啲返去攞，咁先安心啲。
大約大半個鐘頭後先有火車返去山形駅，我見到對面有個牌指去上山城，弭就行吓去睇吓先啦。
行咗去上山城，依個城始建於1535年，係上山藩嘅藩廳，明治時期廢城，現時嘅模擬天守係1982年重建而成。
因為冇乜時間，所以只係喺外面影吓相，冇行上去睇
上山市嘅水渠蓋係稻草人，喺車站都見到佢嘅蹤影
返到車站，喺車站便利店度買咗兩包山形米返屋企食啦
返到酒店，原來冇執房，揾返個袋就走囉
我哋今日行程本米係去福島縣嘅豬苗代玩同食中午飯，然後落會津若松。而家打亂咗，咁就喺中途站郡山駅食嘢先啦。
今日食手打鳥冬麵
店舖係~杵屋 郡山駅エキナカ店
食完就搭火車去会津若松
大約75分鐘就去到會津若松駅，車站佈置福島吉祥物~紅牛嘅紅牛神社
仲有得掛繪馬牌添(紙做)
行出去就有隻大紅牛可以影相
站外有白虎隊員嘅雕像
仲有今晚舉行嘅会津絵ろうそく(繪蠟燭祭)宣傳活動
車站前面就係我哋今晚住嘅東橫inn會津若松駅前。
拉住行李去擺咗房先
都算大吖，有張枱仔可以食嘢
放低行李就喺火車站出面嘅巴士總站搭まちなか周遊バス巴士去會津若松城，依條巴士路線分為紅色線(順時針方向)同藍色線(逆時針方向)，巴士站位置大致上都差唔多(只不過係對面馬路)。
大約20分鐘就到鶴ヶ城(會津若松城)
一行入去就見到會津若松城天守閣
石垣邊已經擺好晒繪蠟燭，只係未點着
會津若松城始建於1384年，因外形似一隻白鶴，故又名鶴ヶ城。毁於戊辰戰爭(1868年)中嘅奧州會津之戰，現時嘅天守𢓌建於1965年。
繪蠟燭祭由幼稚園生到小學生都有參與
繪蠟燭係當地嘅一種傳統工藝，據說起源當地人喺冬天嘅時候，都想見到四季不同嘅花朵，所以係蠟燭上畫上花朵，咁就成日都可以見到啦。不過我就覺得如果想睇花點解唔畫落張畫紙度仲好啦，我估只不過係因為將蠟燭畫上花朵會靚啲，吸引啲人買啫。繪蠟燭祭就係展示當地工匠嘅手藝
原來都有啲唔係畫花，而係畫福島嘅吉祥物~紅牛
會場都有啲蠟燭可以賣，不過要百幾蚊一對，我覺得都幾貴，蠟燭燒完就冇。
大約五點鐘，工作人員就開始將會場嘅蠟燭點着
睇完就搭返巴士返火車站對面嘅白木屋食晚餐
留言列表
