2023-2-7，今朝7點落去大廣間食早餐
份量少咁咗啲，但加埋碗秋田小町米飯都夠飽吖
食完早餐就出去行吓，原來絛路咁暢通都係靠剷雪車開路咋，真係要多謝一早起身嘅司機大哥
停喺路邊嘅汽車滿佈積雪
司機開車前要努力一番先開到車
又經過妙乃湯
再行去休暇村，沿路雪景都好靚
休暇村巴士站
行返轉頭去蟹場温泉
又見到另一架剷雪車
跟住行返去大釜温泉浸個靚湯先走，室內風呂蒸氣騰騰，出去室外好啲
露天風呂對住個雪林好正
浸完就退房走啦，臨走前再影多幾張啦
我住之前都依間温泉旅館係由學有校改建而成，但有啲奇怪，點解係學校又係溫泉？
再睇返資料先知道，原來原本嗰間溫泉旅館喺1977年因為火災燒咗。而老闆正為重建煩惱，但咁啱喺秋田縣本莊市有一間小學要清拆個百年木製舊校舍，最後就將成間舊校舍搬過嚟依度重置，而變成今日咁嘅樣啦。
離開大釜溫泉旅館就搭返巴士出田沢湖駅
喺田沢湖駅搭秋田新幹線出盛岡
秋田新幹線嘅「小町號列車」（E6系），因為會同在來線共用路軌，所以限速喺130Km/Hr，又稱「迷你新幹線」
出到岩手縣嘅盛岡，就會同東北新幹線扣埋一齊，又可以行320Km/Hr
喺盛岡駅轉另一班新幹線去一ノ關
大約40分鐘就去到一ノ關，依個站內好多比卡超公仔可以俾遊客影相
出站去東橫Inn check in同放低行李先，跟住返車站搵嘢食
我哋去咗依間浮蓮渡食嘢，貪佢近火車站，一陣搭火車去猊鼻溪方便啲
媽咪叫咗奶油多士，谷我就要咖哩牛肉飯，味道就普普通通，不過都夠熱吖
食完就搭14:17火車落猊鼻溪
大約半個鐘就去到猊鼻溪駅，依個係個無人站，向車長show JR pass落車
出站後行去搭船處啲指引都好清晰
水渠蓋都係坐船仔
大約行5分鐘就到咗「日本百景」之一嘅猊鼻溪
猊鼻溪在東北地方的岩手縣，是一處具有100年以上歷史，可完美體驗日本的春夏秋冬之大溪谷。不使用馬達，由船夫以一柄木棹便能操船的風景，是只在這猊鼻溪才有的特色。可以親身感受日本的四季之美。(引用自猊鼻溪官網)
因為係冬天，我哋坐嘅座位有被爐
沿途仲可以餵鴨仔
中途經過毘沙門窟，入面係鍾乳石洞，洞窟口供奉「毘沙門天像」
大約20分鐘就到咗猊鼻渓終點船着場
跟住上岸行路去睇大猊鼻岩，沿途兩邊都係峭壁
峭壁上就係猊鼻岩(猊古時嘅意思即係獅子)，不過我點睇都覺得唔似
喺猊鼻岩下有個很特別嘅祈福儀式「拋運玉」，路邊會看到有小攤檔在賣「運玉」(類似棋子)，運玉上面就刻有「福」「縁」「寿」「愛」「願」「運」「恋」「絆」「禄」「財」等字樣，100円三粒，拋向河岸對面嘅小洞，拋入咗就可實現願望。
我買咗六粒測試吓運氣啦
結果全部唔入，冇運行啦
跟住就原路折返
回程時船夫會喺船上唱當地民謠「猊鼻追分」，唱得幾好聽㗎
搭完船仔就行返去猊鼻溪駅，搭返火車夜一ノ關
返到一ノ關駅，就喺火車站對面嘅「千年の宴 一ノ関 西口駅前店」食燒肉
留言列表
