2020-01-04,今朝我去嵯峨,不過嗰度有D詭異同哀愁,都係我自己一人個去算啦。早D起身搭阪急電鐵去嵐山,由酒店行出去就係近江屋跡,即係幕末志士坂本龍馬同中岡慎太郎被暗殺嘅哋方
跟住行去搭阪急電鐵
先搭阪急京都線,可能今日係星期六同埋都係早啦,冇乜人搭車
去到「桂」再轉阪急嵐山線
嵐山線就多啲人搭,不過都有位坐
唔使半個鐘就去到阪急嵐山站
本來諗住起站前廣場搭94號京都巴士(唔係京都市巴士)去愛宕念佛寺,不過見到好多人等車(全部都係同我搭同一班火車嚟嘅),佢哋應該都係去愛宕山行山,我就費事搭,去行吓嵐山一帶先啦
首先經中之島橋行入嵐山中ノ島公園
中ノ島旁嘅桂川支流
中之島公園可以經渡月橋行去嵯峨嵐山同天龍寺一帶,如果係櫻花季啲櫻花會開得好靚添,不過依家未係時候吖
嵐山嘅火紅楓葉亦都落曬囉,想睇就要下一年再嚟過咯
世界文化遺產~天龍寺,以前都入過幾次,今次冇入去囉
喺天龍寺前面有幾間塔頭寺院(退休方丈隱居或者紀念已故高僧嘅小型寺院),佢哋通常都只係喺春秋兩季開放一小段時間畀人參拜,依間係弘源寺
慈濟院
松巌寺
睇完就喺天龍寺門口等返94號京都巴士去愛宕念佛寺,不過都係冇位坐要企位
大約十分鐘就到咗愛宕念佛寺,愛宕念佛寺始建於公元766年,由當時女天皇「稱德天皇」下令興建,原址就喺六波羅蜜寺附近,但後來經過幾次天災後逐漸荒廢。喺1922年就搬嚟愛宕山現址,但不過呢頭係以前嘅風葬場,即係亂葬崗,啲京都人都唔係太想嚟依頭。所以二戰後期又逐漸荒廢,甚至連主持都冇,直到1995年新主持西村公朝上任,為咗復興愛宕念佛寺,佢由1981年開始帶領弟子雕鑿石羅漢像,本來係諗住雕500個,點知後來越嚟越多弟子嚟雕,到咗90年代初雕到成1200個
寺院內嘅羅漢像到處都有
不過啲羅漢像經過廿幾三十年,依家好多都已經生滿青苔
啲羅漢章造型各樣都有,有啲聽walkman、有啲抱仔、有啲斟酒。諗得出嘅形象佢都做曬出嚟
啲羅漢像嘅背後全部都有雕鑿者嘅姓名
行行吓竟然見到個新簇簇嘅,睇嚟應該係新造嘅,不過依度有啲陰森,同埋應該都冇乜新整嘅......睇睇吓我都有啲驚,都係落返去啦
羅漢像圍繞著中間嘅就係多寶塔
源自鎌倉時代(1185-1333 年)嘅本堂,係重要文化財,不過唔知係咪早得滯,冇開門,冇得睇堂內嘅佛像
ふれ愛觀音堂,ふれ係觸摸嘅意思,ふれ愛觀音係俾盲人觸摸嘅觀音像。愛宕念佛寺注意到日本並冇俾盲人參拜用嘅觀音像,於是就喺 90 年代初期製造咗殿內嘅觀音像,可以俾盲人觸摸到同參拜
睇完愛宕念佛寺之後,就沿住愛宕街道往下行,好快就見到去嵯峨鳥居本,不過依家維修緊,睇唔晒全個
鳥居旁嘅平野屋,開業已有四百幾年,係出名嘅烤香魚料理店,不過價錢都幾貴
呢度有幾間京都式嘅茅葺屋(合掌屋),同美山地區差唔多,旁邊仲有個告示牌,上面寫住「嵯峨鳥居本傳統的建造物群保存地區」
再向前行有一段石級參道,行上去就係化野念佛寺
「化野」係以前依區嘅地方名,亦係古代京都嘅風葬塲(即係亂葬崗),據說公元811年空海(弘法)大師唔忍心遺體暴露於田野之間,於是喺依度建立咗五智山如來寺,將啲遺體集合到如來寺安葬同供養。到咗鎌倉時代(1192年-1333年),法然上人受到空海(弘法)大師嘅影響,在此成念佛道場,即係化野念佛寺。喺明治年間,散落喺化野一帶嘅無名遺骨被挖掘出來,然後供奉喺化野念佛寺裡,依家寺內有高達8000座無主孤墳。每年8月23日、24日會舉行「千燈供養」活動,好多人會嚟點燈供養長眠於此嘅亡魂。
化野念佛寺嘅本堂
本堂供奉嘅阿彌陀如來佛像
當年明治年間挖掘出嚟嘅無名骸骨,就全部放喺依度叫做西之河原(即係西方嘅賽之河原)嘅地方,不過入面唔可以影相,只可以由外面影入去。日本人認為人死後靈魂會搭船經過三途川去投胎,類似中國人死後要行過奈河橋咁,三途川嘅河邊稱作「賽之河原」,傳說夭折嘅孩子要去賽之河原堆疊石塔,報答在生父母嘅服侍同養育之恩,完成後先可投胎轉世。不過通常石塔完成之前,都會有惡鬼嚟干擾破壞,令依啲夭折嘅孩子不斷要重覆堆疊石塔同捱苦,所以賽之河原亦有「徒勞無功」嘅意思。幸好最後有地藏菩薩嘅出現,解救依班受苦嘅孩子,等佢哋可以進入輪迴,重新投胎做人,所以地藏菩薩喺日本係代表孩童嘅守護神
散落喺寺內角落嘅無名石碑,真係千里孤墳無處話淒涼
跟住行去後山睇竹林
依個竹林我覺得仲靚過天龍寺嘅竹林之道,基本上完全冇人行,可以慢慢影相,行到盡頭有個舍利塔,嗰度有啲荒涼,同埋聽過依度有啲靈異事件,都係走啦,連個舍利塔我都唔敢影
睇完化野念佛寺之後,諗住就行去祗王寺,行行吓竟然發現到後龜山天皇小倉陵
後龜山天皇係日本南北朝時代嘅最後一個南朝天皇,佢話考慮到天意和避免百姓遭受戰禍,同北朝嘅後小松天皇議和後,將傳世三神器交俾北朝天皇,然後出家,喺大覺寺過住隱居生活,協議當北朝天皇駕崩後,皇位傳俾比南朝後人,但最後梗係冇啦
後龜山天皇長眠在此五輪塔之下
嚟到一個美麗與哀愁嘅地方,祗王寺
祗王寺喺位於京都嵯峨嘅真言宗大覺寺派寺院,其實只係一間好細嘅庵堂,日本古典文學《平家物語》中亦記載住依間充滿美麗與哀愁嘅尼姑庵
呢度遊客唔多,可以慢慢欣賞呢度嘅古樸小徑同埋青苔,1968年文學家川端康成同畫家東山魁夷亦曾經同遊此地
根據《平家物語》嘅記載,平安時代末年,「祇王」係當時京都非常出名嘅美女白拍子(舞姬),受到權傾天下嘅平清盛寵愛,過住舒適嘅生活,但後來好色嘅平清盛又鍾意咗另一位白拍子「佛」,只係21歲嘅傷心「祇王」同19歲嘅妹妹「祇女」,仲有45歲的母親「刀自」,就喺嵯峨結廬出家。後來連「佛」亦都因為同一遭遇而來到這裡,四位傷心人從此青燈古佛,等待塵緣散盡前往極樂淨土。
《平家物語》巻一 第一段就係:
祇園精舎の鐘の声
諸行無常の響きあり
娑羅双樹の花の色
盛者必衰の理を顕す
驕れる人も久しからず
唯春の夜の夢の如し
猛き者も終には亡びぬ
偏に風の前の塵に同じ
漢譯:
祇園精舍鐘聲響,
訴說世事本無常;
沙羅雙樹花失色,
盛者必衰若滄桑。
驕奢主人不長久,
好似春夜夢一場,
強梁霸道終殄滅;
恰如風前塵土揚。
祇王三母女之墓,同埋平清盛嘅供養塔
祗王寺另外一個最出名嘅地方,就係寺內嘅青苔,雖然佢就冇西芳寺咁出名,但係呢度唔使申請而遊客又唔多,可以慢慢欣賞。庵旁嘅流水滋潤住整個苔庭
寺内亦有一個角落介紹依度嘅苔蘚,其實喺祗王寺影青菩真係影到唔捨得走,不過芊芊whatsapp話就嚟到嵐山,咪惟有走囉,出去join埋佢
沿途經過好多出名嘅地方,例如大覺寺、二尊院、常寂光寺......但係都冇時間去入去睇吓,其實淨係嵯峨都足夠玩一日
出到去天龍寺附近,就見到芊芊同媽咪喺度行街
問芊芊入唔入去天龍寺睇吓曹源池,不過芊芊話以前都入過幾次,今日天氣又唔係咁好,都係唔入,喺門口影張相算囉。我就寫個御朱印啦,不過唔知係咪遊客太多,寺院工作人員驚寫到手軟,個御朱印竟然唔係手寫而係蓋印嘅😥,總覺得好似爭咁咗D靈氣咁
行吓旺過旺角嘅嵐山嘅竹林の小徑
竟然有人賣藝
竹林の小徑妁好多遊客,仲有扮舞伎嘅遊客添
行到去野宮神社,好多人排隊参拜,門口有日本唯一嘅黑木鳥居
好多日本妹來求姻緣,好似話好靈驗㗎
神社入面嘅神石,傳說摸吓佢就會心願達成
跟住去拜下御髮神社, 希望保祐吓我啲頭髮唔好甩得咁快啦,芊芊話都要拜吓,保祐吓佢啲頭髮冇咁快變白,不過我就叫佢早每晚啲瞓仲好啦
御髮神社前嘅小倉池,啱啱有太陽又幾靚
咁就行下嵐山算啦
媽咪行行吓就買咗個福袋
嵐電嵐山站由設計師森田恭通設計,站內有得浸足湯, 同埋放咗600支友禪柱,概念嚟自和服,夜晚仲會發光添
出到四條大宮,芊芊話想同媽咪行街shopping,我就最怕依味嘢,於是約好今晚食飯,然後行咗去西本願寺睇吓
西本願寺正式名稱為龍谷山本願寺,係淨土真宗本願寺派嘅本山,由親鸞法師於1272年所建,但經歷多次戰亂遷徙,到咗1591年第11任門主顯如得到豐臣秀吉支持,將寺院遷至現址。但1592年第12任門主准如繼任後,寺院內部發生繼承紛爭,1602年前繼承人教如得到德川家康支持脫離寺院,喺本願寺東側另創真宗本廟,通稱為東本願寺(唔係東寺)。為咗方便區分,舊本願寺通常稱為西本願寺,1994年西本願寺以「古都京都的文化財」登錄為聯合國教育、科學及文化組織嘅世界文化遺產。
國寶御影堂建於寛永13年(1636),平成21年(2009)大修復
御影堂前嘅樹大銀杏樹,樹齢約400年係京都市天然記念物
國寶阿彌陀堂重建於寶曆10年(1760),依家正在內部大修復,預計2022年3月完工
御影堂牌匾上「見真」係開基人親鸞法師嘅諡號
御影堂有走廊可通去阿彌陀堂,不過而家內部裝修緊冇乜嘢睇
喺走廊度見到善信捐獻嘅「御佛飯米」,佢哋捐獻嘅咪全部都係用稻草包住,一捆捆咁,一捆叫一俵(等於60 kg),我估應該好似香港咁,當平安米咁派掛
跟住再去行東寺(唔係東本願寺),不過今日同琴日都係差唔多,只係今日嚟得早啲,可以入到去寺內睇五重塔。我覺得影東寺,應該係朝早啲光位會好啲,下晝啲光好差
高13米嘅「不二櫻」,不過依家唔係櫻花季,冇得睇。
「東寺」正式名稱係教王護國寺,創建於794年,係桓武天皇遷都平安京後所興建的國立寺院,其實當時桓武天皇有興建另一問國立寺院「西寺」,不過喺平安時代末期已毁於戰火,之後再無重建。「東寺」係目前唯一平安京所遺留嘅建築,1994年以「古都京都的文化財」嘅一部份而列入世界文化遺產名單之中。
高55米嘅五重塔係日本最高嘅五重塔,被視為京都嘅象徵,據說係空海大師於826年開始創建,但到死後先完工。不過經過共四次嘅雷擊同火災,依家依個係第五代,由德川家光於1644年捐建。
金堂,係東寺嘅中心建築,係823年由嵯峨天皇將東寺下賜給空海(弘法)大師時興建設嘅,不過喺文明18年(1486年)燒毁,現時嘅金堂建築係慶長8年(1603年)所建。
講堂,喺825年由空海(弘法)大師開始興建,835年完成。但喺1486年失火焚毀,喺1491年重建。據說裡面有21件密教佛像,分別為:五如來、五菩薩、五明王、六天部。擺設位置依空海(弘法)大師嘅構想,表現出立體曼荼羅 (曼陀羅)嘅觀念。但我就只係見到好多佛像,唔識得分邊個打邊個
食堂,建於9世紀末起到10世紀初左右。但喺1596年因地震倒塌,於1800年重建,現在嘅食堂係因為昭和5年(1930年)嘅火災焚毀,而於昭和9年(1934年)重建而成
睇完就搭返車返去四條河原町,今次專登早一個站落車,去行下錦市場(錦小路)先。 錦小路叫京都人嘅廚房,係以前好多京都人喺度買餸,不過而家都越開越多做遊客生意嘅舖頭囉
錦天滿宮,不過好多人,我都冇行到入去
我哋今次食呢間「ほんまもん和牛 肴家ひらり」烤肉店
留言列表