2020-01-03，今朝起身之後，出去附近行吓。首先去咗牧野神明社，神明社喺日本有成四千幾間，主祭神係天照大神，即係傳說中日本皇室嘅祖先。通常神明社都會加個地方名喺前面方便識別，例如呢間叫牧野神明社，即係喺牧野嘅神明社啦
可能時間仲係早，冇乜人喺度參拜，我影咗幾張相就走喇
跟住就行去白山神社，白山神社簡稱白山社，都係一間日本好普遍嘅神社，主祭神係白山比咩大神，喺日本有接近二千間。
白山社內有一間攝末社～大白龍神社，供奉大白龍神
大白龍神，唔通即係蛇神
然後行去附近嘅長松寺，日本都好多呢啲小型嘅家族式管理寺院，主要係管理墓園，有啲似香港嘅寶福山咁啦
隔離亦都有一間小型寺院~円福寺
行返酒店前經過一間神社~金山神社
金山神社主要係一啲從事金屬業務嘅人拜祭
睇完曬就返酒店，攞行李去名古屋駅等埋芊芊，因為要搭新幹線去京都，喺車站見到有兩個女仔著和服，仲係振袖添。
搭咗38分鐘嘅新幹線又見到熟悉嘅京都塔啦，就喺巴士站搭市營巴士205號，去四條河原町，不過京都越來越多遊客，等巴士真係好多人，我哋攞住啲行李上落都幾麻煩。
今次我哋住Super Hotel四条河原町，因為我鍾意佢有天然溫泉浸，睇返個Blog原來已經八年冇嚟過，對上一次係2012年同皓怡嚟，我仲以為只係三四年冇嚟過，時間過得真係快，想唔認老都唔得......
因為未夠鐘攞房，我哋放低咗D行李先，然後就再出去食嘢同行街，又見到熟悉嘅鴨川
芊芊話依間千房幾好，google評價幾高，不過就好多人等位，芊芊留喺度等位，我同媽咪出去行吓附近先
四条大橋人山人海，遊客仲多過旺角，大塞人
行過咗四條大橋之後就去睇吓仲源寺
最吸引我嚟係依塊「雨奇晴好」牌匾，源首蘇東坡詠杭州西湖絕句：「水光㶑灧晴方好，山色空濛雨亦奇。欲把西湖比西子，淡粧濃抹總相宜。」(參考陶傑：在京都發現古中國)
其實我嚟就仲想拜吓「目疾地藏尊」，因為唔知係人老咗定係玩得手機多，對眼越嚟越差，希望拜完對眼好啲啦
拜拜吓芊芊前打電話嚟話有位，即刻行返返去千房食嘢
千房主要喺食大阪燒，熱辣辣好好食
食完就行去六波羅蜜寺，本來諗住經四條大橋行去，不過真係太多人嘞，咁就沿高瀨川行去啦。高瀨川係一條開鑿於江戶時代初期嘅運河，基本上同鴨川並排，可以算係鴨川嘅支流，用嚟避開湍急嘅鴨川河水，運送貨物到京都市內， 高瀨川現時已經冇乜實際用途，但河邊啲櫻花好靚，每年春天都係賞櫻名所
高瀨川上嘅蒼鷺
可能遊客太多，依家高瀨川上有好多垃圾，大煞風景
中途經過一間惠美須神社，好多人出入，行入去睇吓
喺神社入面嘅鳥居好多人抛錢上去個惠美須神像度，我哋都玩吓
惠美須係日本神話中嘅海神，屬於七福神之一，原本係漁民嘅海上守護神，依家已演變為財神，睇吓又真係賺埋唔少喎
一手攞住魚竿，一手抱鯛魚嘅惠美須
惠美須神社嘅拜殿
又寫吓朱印帳，現場有好多人攞住一塊大紙板，畀神社啲人寫御朱印，京都人話新年集滿七個七福神嘅御朱印就會有好運(佢哋叫都七福神めぐり)， 不過就要去晒七間指定嘅寺院或者神社，呢間惠美須神社當然係惠美須御朱印啦
行行吓見到有間古董舖
擺賣啲嘢立立雜雜，似上環摩羅街
明治時期嘅小學課本
有本「赤い鳥」係大正時代嘅兒童雜誌，有成100年歷史，連芥川龍之介都係作者之一，不過我有啲懷疑，會唔會係假嘢？成百年嘅雜誌同課本都仲保存得咁靚？
跟住就去到六波羅蜜寺，六波羅蜜寺喺公元963年由醍醐天皇二皇子空也上人創建，已經有千幾年歷史，亦係都七福神めぐり集弁財天御朱印嘅寺院
據說六波羅蜜寺係日本七福神嘅發源地，今曰好多人喺度排隊等緊弁財天吉祥初稻穂授與，即係每人派一束代表幸運嘅稻穂
菩薩像之後就係大殿
六波羅蜜寺嘅大殿
我哋今次嚟六波羅蜜寺係飲皇服茶，每年只係1月1號至3號先有得飲
據說當年京都有瘟疫，連天皇都中招，最後由空也上人畀咗呢杯梅子乾同打結昆布嘅茶天皇飲就好番， 所以就叫做皇服茶
飲完仲有個紙御守送
六波羅蜜寺派嘅弁財天吉祥初稻穂
再去玩下錢洗弁財天，將500円硬幣放喺小竹籃內，然後拿起勺子淋水，將竹籃裡的硬幣沖洗3次，然後自己收好個500円，唔好用咗佢，咁就會有財運㗎啦
之後就搭車去東寺，東寺正式名稱係教王護國寺，創建於794年，係由桓武天皇遷都平安京(京都)後所興建嘅國立寺院，亦係目前唯一平安京所遺留嘅建設，1994年以「古都京都的文化財」嘅一部份而列入世界遺產名單之中。
寺內的五重塔係日本最高嘅五重塔
東寺嘅食堂
不過今日嚟得太晏，已經閂咗門，我哋只係可以喺外邊影吓相
睇完東寺之後，就搭返巴士返四條河原町食嘢同行吓街，芊芊話要嚟依間Harbs京都藤井大丸店食甜品及飲茶
啲蛋糕又真係幾好食，唔係太甜，啲士多啤梨好香
食完甜品之後，媽咪同芊芊去shopping，我就去行下街，約咗今晚八點半再食嘢，四条河原町嘅丸井百貨
向八坂神社方向行
首先經過歷史悠久嘅南座劇場
跟住行去祇園白川，呢度係舊建築物保存區，呢度啲建築物通常都係用嚟做餐廳同紀念品店，春天嘅時候依度都係賞櫻名所
辰己大明神神社
跟住就行到八坂神社
原來夜晚都仲咁多人㠟參拜
好似平時啲神社祭典咁，好多小攤檔，可以有嘢食，有嘢玩
舞殿
鼠年裝飾
拜咗會靚啲嘅美御前社
畀個名嚇親嘅惡王子神社，查下先知原來「惡」係力量強大咁，「 王子」係指天照大神嘅細佬～素盞鳴尊
呢條路係行去後面嘅圓山公園，不過我冇行入去
睇完就再行去後面嘅東山花灯路
沿ねねの道(寧寧之道)行去二年坂，每次經過ねねの道，我都覺得秀吉真係娶到一個好老婆
行到去高台寺公園，又見到八坂の塔
維新の道
原來夜晚嘅二年坂係咁静㗎喎
都係冇人嘅三年坂
八坂の塔
八坂の塔係是東山一帶嘅地標，反而佢嘅正式名稱法観寺無乜人識，相傳仲係聖德太子於公元592年創建添
睇完就去先斗町join埋芊芊一齊食晩餐，芊芊本來有間餐廳「先斗焼 心」好鍾意食，不過竟然執咗，我幾個月前嚟都仲食過。最後搵咗呢間先斗町 ことし食囉
岩燒A5和牛，不過同平時食啲A4差唔多，芊芊話依間嘢呃遊客
跟住就返super hotel攞房，我哋呢間雙人房，唔係碌架床同埋都算大
依間super hotel訂嘅時候，因為三人房已滿，但可以連埋一間單人房一齊訂，收三人房價錢
床頭有usb叉電
最正係可以浸溫泉
留言列表
