2020-01-05，Super Hotel啲早餐比東橫Inn豐富好多
有自家焗製麵包，牛角包超好食
沙律吧好多嘢揀擇
啲餐枱位好闊落
食完早餐落到樓下，見到一架滋賀縣車牌嘅溫泉水車送溫泉水嚟
行到出四條通啱啱見到有京阪巴士去醍醐寺方向，不過每日只係返工同放工時間先有車
朝早嘅鴨川冇乜人行，只係有啲人跑吓步咁，我就沿住鴨川行去三條大橋
三条嘅Starbucks，原來冬天真係冇納涼床嘅
喺三条高瀨川側邊嘅Time's商場，係安藤忠雄嘅早期作品，不過嚟得太早未開門
喺Time's商場對面，有間瑞泉寺，原來係豐臣秀次嘅墓所
豐臣秀次本來係豐臣秀吉嘅外甥， 不過秀吉嘅長子早死，秀次過繼俾秀吉，成為豐臣家嘅家督，諗住做豐臣家嘅繼承者。點知後來秀吉老來得子， 豐臣秀賴出世後，1595年秀吉迫秀次出家，最後仲話秀次企圖謀反，命令切腹自殺。首級被秀吉梟首，命令置於京都三條河原示眾。然後再將秀次全家滅族，呢啲咁嘅手法令到本來忠於秀次嘅大名心裡不服，好多走曬去幫德川家康。最後咪種下豐臣家被滅族嘅惡果囉，果然係剃人頭者，人亦剃其頭
1611年京都富商角倉了以開鑿高瀬川，發現到荒廢嘅秀次一族墓地，角倉同情秀次遭遇，便請浄土宗西山派僧人「立空桂叔和尚」，喺依度興建寺院供養秀次一族，名為瑞泉寺，山号「慈舟山」
豐臣秀次一家39口，同埋家臣十人，共49人全部安葬在此
跟住行返酒店退埋房，寄存咗行李之後就搭地鐵去醍醐寺，出咗醍醐地鐵站之後，就見到京都市醍醐東市營住宅，我估係等如我港嘅公屋啦， 每戶都有個大露台，睇落都幾好喎，唔知租金係幾多呢？
醍醐寺嘅總門，即係山門，醍醐寺始建於公元874年，最出名就係豐臣秀吉在此舉行賞花(櫻花)活動，宣示佢係霸主嘅地位。1994年醍醐寺以古都京都的文化財嘅一部分而列入世界遺產名錄當中。
過咗總門就係樱馬場，兩邊都種滿咗櫻花，啱啱見到有一班和尚喺仁王門度行出嚟
三寶院，1598年豐臣秀吉就喺三寶院舉行醍醐の花見嘅活動，不過半年後秀吉就撒手塵寰，剩低年幼嘅豐臣秀賴，最後咪俾德川家康吞拼曬成個天下。
大玄關
葵の間
三寶院庭園
唐門，刻有豐臣家嘅五七桐紋
內庭園
唐門嘅正面
仁王門(西大門)
金堂（國寶）
本尊係藥師如來（重要文化財），旁邊係四大天王
五重塔（國寶），為醍醐天皇敬祈冥福而於朱雀天皇時動工建造，在村上天皇的天歷五年(951年)完工，高38米，1586年曾經因為地震受損，豐臣秀吉喺1597年資助維修。1950年曾於颱風中受損，1960年維修完成，係京都少有嘅現存平安時代建築物之一
不動堂供奉不動明王
行經日月門去觀音堂
觀音堂
發現到有片紅葉喺草地上面，執嚟影吓相有幾靚喎
辯天池，呢度睇紅葉好出名，左邊嘅辯天堂，室內供奉住七福神中嘅辯才天
不過影影吓落雨，同埋有啲凍，跟住走咗去辯天池旁嘅入去餐廳阿闍梨寮寿庵度食嘢
咖哩飯
紅豆沙湯圓
黑糖麻薯
食完嘢，再慢慢欣賞下出面嘅風景都幾靚
靈寶館，建於1930年，館內收藏醍醐寺嘅文物
睇完醍醐寺之後，就搭地鐵去北山駅，出站就係京都府立陶板名畫之庭，呢間又係安藤忠雄嘅作品(1994年)
陶板畫係將原本嘅畫，用攝影製版之後，再印落陶板上，再攞去燒，咪即係燒瓷相咁，好處係唔易變色，不過可能因為個燒爐唔係太大個啦，一幅畫要分好多塊，再砌番成一幅大陶板。一入門口第一幅畫就係莫奈嘅睡蓮， 仲要係放喺水入面嘅睡蓮
秀拉(Seurat)嘅Sunday Afternoon on the Island of la Grande Jatte
雷諾瓦(Renoir)嘅On the Terrace
梵高Road with Cypress and Star
米高安哲奴嘅最後審判
嘅最後晚餐
鳥羽僧正嘅鳥獸人物戲畫，因為佢將動物擬人化，被視為漫畫嘅始祖
張擇端嘅清明上河圖
其實嚟呢度除咗可以睇名畫之外，最主要係可以睇埋安藤忠雄嘅建築
睇完之後就去搭京都市營巴士4號，去上賀茂神社，一落車就見到一の鳥居，上賀茂神社正式名稱係賀茂別雷神社，始建於公元678年，主祭神係賀茂別雷大神，亦都係世界文化遺產之一
參道上嘅外幣殿(馬場殿)，啱啱見到有表演，我覺得有啲似香港嘅神功戲咁囉
行近啲去二の鳥居，見到有間神馬社，竟然養咗隻真馬喺到，依間神社真有錢
應該有間大公司或者商會嚟呢度參拜，見到有幾個巫女出嚟幫手招呼
我估係新年關係，所以有啲送馬迎鼠嘅裝飾擺咗喺度
拜殿(細殿)前有兩座錐形嘅「立砂」，據說係模仿賀茂別雷大神降臨嘅神山
樓門
中門
寶船
見到啲神職人出咗嚟，我估可能有Ｄ祭祀要做
神社內有小學生書法比賽作品展覽
上賀茂神社內有條小溪叫做楢の小川，最後會流入鴨川
玩完之後搭巴士返四条河原町，去先斗町嘅柚子元食牛肉鍋，依間舖頭我同媽咪2009年嚟過，當時仲食咗抽子拉麵添
個牛肉鍋啲牛肉堆到好似座山咁
食完嘢返去super hotel攞行李，然後搭番巴士去京都駅，預備返名古屋，拜拜啦京都塔！
搭咗成日車，依張Day pass真係幾抵用
跟住搭新幹線返名古屋
返到去名古屋，就去超市買番包「青天の霹靂」米返香港，因為聽日要走喇
留言列表
