hkt222976的部落格

今年有大假剩，公司要放埋佢，我想去睇紅葉同探芊芊，但係媽咪又攞唔到長假。於是只好我一個人去關東睇紅葉，然後去台北接埋媽咪去探芊芊。一次過滿足晒兩個願望啦！

2014年11月17日，出發啦！

今次坐長榮BR852去台北先

個飛機餐普普通通，係D飯幾好食，軟綿綿，可能我鍾意食軟飯啦

不過去到桃園機場就落雨添。

行去揾轉機閘

仲有成個幾鐘，行吓先。

行到夠鐘就去搭BR196去成田。

唉，D雨係咁落，起唔到飛，坐咗喺度等咗成個鐘先可以起飛。

遲咗成個鐘先到成田機場

一落機即刻試吓張富士卡先，以前我多數都係租卡，但今次要去台北幾日，租卡唔抵，咁就試吓依張啦。鴨記買，百二蚊，又幾好喎，最緊要係上到facebook同google map。

出閘後即刻去JR售票處買Kanto Area Pass

買完pass就去搭京成電鐵嘅Sky access出上野。

只係1240円，平過同系嘅Skyliner，同JR嘅N'EX

搭車時順手試埋張富士卡嘅速度，都幾好吖。原來依張卡粒IP係香港聯通架，唔怪之得上到facebook同蘋果啦(以前櫻花卡粒IP係射咗返大陸架)。

大約一個鐘就出到上野(正確應該係京成上野)，然後行上野中央通地下通道去上野御徒町駅，搭都營大江戶線去東新宿駅。

不過成條路都冇乜人行，只得我一個人......都有D驚

唔洗十分鐘就去到上野御徒町駅咯

出咗東新宿駅向左行一分鐘，就見到我今晚往嘅酒店東横inn歌舞伎町啦。

今次我住4晚，D房都幾好吖，因為我以前儲夠10分，所以仲有一晚免費添，加埋D ECO優惠只係2萬1円咋。

放低行李後出走行吓先，依度好在交通方便，不過環境就雜咗D，我一路行一路都不停有D黑鬼走埋嚟拉客。

激安の殿堂依家都變咗做驚安の殿堂喎，不過新宿好似銅鑼灣咁，多咗好多相機/電器店同藥妝店，冇乜小舖。

最後行去日高屋食番碗麵做宵夜啦。

臨返酒店前買埋盒鮮奶，我通常喺日本都鍾意臨瞓前飲杯鮮奶架。