前言
前嗰排老婆仔同我講『1月中我放大假喎,芊芊又考完試,不如去外地玩返幾日吖?』我話『都好喎!你咁胃食,不如又去台灣吖(其實我想去北海道玩雪,不過D yen咁貴,點去喎?)』
於是我就plan吓去台灣嘅合歡山,因為我記得20幾年前我睇過一本書,話冬天响台灣嘅合歡山有雪玩。但在網上查資料後先知道原來合歡山冇公車到, 要包車先上得到去。跟住試吓搵返舊年我哋去宜蘭包車嗰位超好人司機,問吓佢可唔可以搵佢車我哋上合歡山?佢最初話合歡山路程太遠,我哋兩個人包車唔化算, 不過最後都可以車埋我哋,只收回成本價咋!仲幫我哋book埋山上的民宿添。真係要多謝晒佢,以後如果再去台灣自由行,要包車的話,就真係要搵返佢先得!
正題
1月17日朝早我哋去到赤立角機場,天氣唔錯喎。
我哋搭長榮BR852去台北11:20出發,不過冇乜人坐,唔洗點排。
上機坐低之後,發覺點解個位同個手枕比平時闊咗,個座位下面仲有塊腳靠可以升高嚟朗腳嘅?唔通係商務客位?後來先知衣D叫『長榮客艙deluxe class』,用商務艙設施,但價錢平D,即係介乎商務位同經濟位之間嘅位啦。
不過個飛機餐都係平時嗰D。
到咗桃園機場,搭國光客運出台北車站。
一個鐘頭車程就到咗台北車站嘞
我哋今次住响台北車站對面嘅凱撒大飯店,捷運出口直達酒店,好方便!
D房都ok,舊就舊D,不過話晒都叫五星級吖!
首先買張悠遊卡,之後就搭捷運去淡水,然後搭26號公車上真理大學先
間學校由創辦到依家,已經有百幾年歷史嫁嘞。
然後行去以前清朝海關稅務司官邸的『小白宮』
依度嘅日落景色好靚架,可惜今日多雲,冇得睇。
跟住再去『淡江中學』亦即係前總統李登輝同歌手周杰倫嘅母校
電影『不能說的秘密』亦在這裡拍攝。
再去由『紅毛鬼』即係荷蘭人,建於十七世紀嘅『紅毛城』
不過去到都夜,開晒燈!
睇完之後再搭公車去情人橋
胃食媽咪又食『豪大大雞排』嘞,都係咁大塊、咁好味!
之後再行淡水老街
仲行埋上紅樓飲茶同食晚餐添。
响衣處睇淡水河夜景好靚嫁
媽咪仲喺淡水河邊整咗個Q版人像公仔
NT$350一個,都好似真人。
留言列表