2024-4-4，今朝一早浸完個温泉，就去食早餐，大致上都係平時Super Hotel嗰啲。
不過最特別係有香川名物～讚岐烏冬食。
食完就行去酒店後面嘅田町站搭巴士去栗林公園。
大約5分鐘就去到栗林公園前巴士站，車費200円，可以拍西瓜卡。
栗林公園是位於香川縣高松市的都市公園、日本庭園。被指定為國之特別名勝，也是高松歷史文化道的一部分。 在2009年3月16日發售的米其林觀光指南中，作為「值得專程探訪的景點」獲得最高等級的3星評價。2012年，美國的專業庭園雜誌《日本庭園期刊》的「2011年日本庭園排名」中，栗林公園列於足立美術館（島根縣）、桂離宮（京都府）之後的第三位。(引用自維基百科)
依度係賞櫻名所，好早開門，我都趁少人就早啲嚟。
入園後左手邊見到有十幾棵染井吉野櫻開咗花。
依棵係香川県櫻前線標準木，即係香川縣政府以佢開花為標準。
公園內嘅商工獎勵館，原本係建於1899年嘅香川縣博物館，仿照平等院建造嘅對稱木造建築。現時係展示香川縣嘅物產同工藝品，亦可出租為結婚場地。
然後行去芝生廣場，依度啲櫻花都開得好靚。
日暮亭～以前嘅茶室。
石壁（赤壁）
桶樋滝
涵翠池
掬月亭，現時嘅茶室，我哋十年前都有喺度飲茶食菓子。
跟住行上飛來峰，睇南湖同偃月橋。
行完栗林公園就行路返田町，田町商店街嘅天花上蓋刻有高松市嘅著名景色。
田町商店街旁嘅西院寺。
地藏菩薩保護被惡鬼迫害嘅夭折小孩。
返酒店接埋媽咪就行去搭琴電去玉藻公園，沿途經過香川銀行南新町分行。依間銀行建於1982年，由安藤忠雄設計，雖然係安藤嘅早期作品，但已經有佢嘅招牌～清水混凝土啦。
嚟到當然要影返幾張啦。
銀行正門嘅樓梯都幾有特色。
睇完就去田町駅搭琴電，用JR四國pass搭係免費㗎。
搭兩個站去到高松築港駅。
站外設置咗四座雕塑，佢哋係2015年瀨戶內國際藝術祭嘅展品，由英國藝術家Julian Opie設計嘅作品。佢用香川県出產石材雕刻而成嘅「銀行家」、「護士」、「偵探」同「律師」。
跟住行入高松城跡(玉藻公園)。
售票處側邊有Locker可以鎖喼，只係100Yen咋，平過平時車站(700Yen)好多，我哋當然擺咗喺度啦。
高松城天守台跡，高松城又名玉藻城，同愛媛縣嘅今治城、大分縣嘅中津城，並列日本三大水城。始建於1590年，但1869年明治廢城令後荒廢，並於1884年拆除。現時有重建天守計劃，但只係得個基座，我估可能冇錢啦。
披雲閣
櫻御門
穿過咗櫻御門就係櫻之馬場，啱啱好遇上滿開。
行完櫻之馬場就行去睇「艮櫓」。
行到差唔多10:00就出去入口處玩「城舟体験」，即係搭船仔。
搭船仔時仲可以玩埋鯛願城就，即係餵魚。
連白鴿都嚟食魚糧。
行完玉藻公園就去高松駅旁邊嘅高松地標塔(Symbol Tower)。
高松地標塔高151.3米，係四國最高嘅建築物，搭電梯上30/F嘅餐廰，出電梯就可以見依個景，不過只得一隻窗可以望到出街，其餘全部都喺餐廳入面。
好在有樓梯行落去29/F嘅展望室。
依層有位可以坐，慢慢睇景。
睇完展望台就落返去JR高松駅搭火車去丸龜。
大約半個鐘就去到丸龜駅，首先就去車站locker寄行李先。
丸龜市嘅名物就係骨付鳥(有骨燒雞髀)，連吉祥物都係骨付鳥。
我哋去火車站後面嘅骨付鳥發祥店「一鶴」。
一鶴骨付鳥主要分為兩種，一種係幼雞(ひな)，一種係老雞(おや)，幼雞嫩滑，老雞就韌啲。
我就覺得幼雞好食啲。
老雞雖然已經介開咗，但都係好韌，咬到牙軟。
食完就去丸龜城，沿住通町商店街行去，中途見到有士多啤梨賣，媽咪話買包去賞櫻時食喎。
由丸龜站行大約15分鐘就到咗丸龜城。
過咗護城河就係大手二の門。
過咗大手二の門就見到石垣，石垣上有嚿石頭似心形石，叫幸運之心石。
大手一の門
過咗大手一の門後就見到啲染井吉野櫻開得好靚，啲遊客鋪張蓆坐喺櫻花樹下食嘢賞櫻。
我哋都入鄉隨俗，坐喺櫻花樹下賞櫻食士多啤梨
藍天之下，染井吉野櫻開得好靚。
攤咗一陣就行上去天守閣，因為丸龜城嘅石垣好高（總高度係60米，全日本最高），經過觀光案內所攞支手杖行上去啦。
篤住枝竹行上去。
行到一半就見到高20米嘅三の丸北側石垣。
條斜路叫做「見返り坂」，即係見到都想行返轉頭。
終於見到天守閣啦。
丸龜城天守閣係現存十二天守之一，亦係最細嘅一個。
同好多舊天守一樣，木樓梯又窄又斜。
上咗天守閣頂樓，可以見到瀨戶內海。
二の丸跡廣場啲櫻花都開得好靚，
仲有枝垂櫻都開得好靚。
睇完丸龜城行返去火車站，中途見到妙法寺。妙法寺嘅歴史可追溯到天平年間（729〜749），當時建於三豊市豊浜町。之後喺1597年由丸亀城主生駒親正搬到現址，最後喺1666年由徳川幕府命令改宗天台宗。
不過妙法寺睇嚟冇正式開放俾人參拜，我哋行咗一陣就走啦。
返到丸龜駅，見到車站隔離嘅豬熊弦一郎現代美術館。豬熊弦一郎生於1902年嘅高松市，喺高松長大，之後進入東京美術學校（現為東京藝術大學）就讀，1938年起遊學法國，1955年喺紐約從事創作約20年。1989年捐贈1000件作品給丸龜市。1991年丸龜市豬熊弦一郎現代美術館開館。
成間美術館冇乜人，行吓坐吓好舒服。
位於美術館天台嘅瀑布廣場。
睇咗陣就行返丸龜駅搭JR去高知。
今次搭麵包超人列車。
中途經過大步危駅，諗起十年前我哋都嚟過依頭，仲搭船仔添。
喺車站月台竟然有條小型藤橋俾人打卡。
大約兩個鐘就去到高知啦。
站外有出自高知縣(當時叫土佐藩)嘅幕末志士～坂本龍馬、中岡慎太郎同武市半平太塑像。
跟住行去高知天然温泉Super Hotel。
大堂有welcome bar，依家好多super hotel都有welcome bar，黃昏時可以坐吓飲吓嘢。
房間就同平時嗰啲差唔多啦。
我最鍾意就係有温泉浸XD。
放好行李後就行返去高知駅搭路面電車(由とさでん交通株式会社營運)，同香港啲叮叮差唔多，用JR pass可以免費搭。
搭3個站去高知市地標～はりまや橋(播磨屋橋)。
一段不幸的故事讓播磨屋橋成為了愛情的象徵：19 世紀曾有一位名叫純信的僧人，愛情讓他拋棄了孤獨一生的誓言。他從橋邊的一間商店為他的秘密情人買了一個髮夾。 在那個時代，僧侶不可以談戀愛。當純信的「荒唐」行徑傳開後，他和他的情人也因此被放逐，但這段故事透過歌曲和電影廣為傳頌。這座橋被視為高知最受歡迎的觀光景點之一。(來自日本國家旅遊局官網)
跟住行去最旺嘅はりまや橋商店街。
我哋今晚食依間焼肉はりまや，都唔錯吖。
食完燒肉就行去「まんが甲子園通り」睇吓夜櫻，不過原來依度夜晚冇燈，全靠iphone嘅長時間曝光先有嘢睇。
行前少少就係堀川。
原來真係有人喺度睇夜櫻。
堤岸邊有𤩎小型神社～堀川の祠。
留言列表
