hkt222976的部落格

2024-4-3，今次搭UO飛高松，11點機，早啲去機場食完早餐再搭機。

今次都係40號閘溉Chase Sapphire Lounge，貪佢少人啲同有啲景睇。

今次個QR code點唔到餐，要出去同職員人手點，係咁倚點咗個魚蛋粉同煙肉芝士包算啦。

大路嘢就自己出去㚒啦。

我鍾意坐依幾個窗邊位，可以有啲嘢睇。

上機前影返張例牌相啦。

今次坐UO 642，11:00HKG→15:45TAK

不過去到高松天氣唔好，架機係咁喺度兜圈，降落唔到。

喺GPS睇到係咁喺瀨戶內海兜左十幾個圈。

好彩最後都降落到，只係差唔多遲咗成兩個鐘啫。不過個機場真係好大霧，仲有消防車着晒燈stand-by添。

一出航廈即刻有車出高松。

啲車飛喺機場巴士售票處用西瓜卡買。

今晚住Super Hotel高松田町天然溫泉讚岐之湯。

Super Hotel 啲房出名細，打開個喼就冇乜路行。

不過最正有溫泉浸，同啲早餐都唔錯。

跟住出去JR高松駅換四國JR Pass同搵嘢食，又有啲水渠蓋可以影吓。

行去瓦町駅搭電車。

搭琴電。

喺瓦町駅搭兩個站琴電就係終點高松築港駅，行去JR高松駅約3分鐘，去到JR高松駅就要8點前換飛，否則就要明天請早。

換咗飛啦，仲係用傳統嘅大卡+細卡。不過我估遲啲大卡應該都會淘汰，淨用張細卡入閘，唔洗再人手查飛。雖然我覺得大卡有紀念價值，但人手唔夠同時代都要進步嘅。

出面落雨，我哋今晚喺車站入面食杵屋。

食完晚餐仲落緊雨，本來諗住上去高松地標塔，不過大雨又大霧，最後都冇上，影吓就算啦，希望聽日好天可以上去啦。

行返去高松築港駅，路經高松城跡(玉藻公園)，本來如果今日班機冇遲成兩個鐘，就可以免費入去睇夜櫻。不過依家冇得睇啦，惟有聽日嚟睇日櫻啦。

返酒店前去超市買牛奶，我通常鍾意行超市買奶，因為會有啲本地品牌，唔同便利店啲大路貨。

媽咪就鍾意去便利店買布甸做宵夜。