2023-11-14,今日去輕井澤,好似以往咁由新宿搭通勤列車去大宮轉新幹線,每次喺大宮月台上都會影吓依間便當屋。
本來book咗9:09去輕井澤嘅新幹線,但唔知點解唔見咗班車?走去問月台上啲職員,佢只係話改咗,叫我哋坐9:57嗰班。
冇咗班車惟有排自由席啦,近幾次嚟日本,發覺啲車成日都誤點,同以前差好遠,如果要轉車嘅話都要預多啲時間。
兩班車變成一班,車箱入面質滿晒人。
大約企40分鐘去到輕井澤,即刻揾locker鎖行李先。
喺1號巴士月台搭去睇教堂同雲場池。
搭去白糸の滝嘅巴士,只搭1個站,去到新道駅就落車。
跟住google大神嘅指示,沿住林蔭大道行大約5分鐘。
就去到第一站「森のチャペル 軽井沢礼拝堂」。
輕井澤係喺長野県嘅高原地帶,天氣清涼,平時10月中就有紅葉睇,依家11月中,紅葉都落得七七八八。
輕井澤有好多好靚嘅教堂,通常都係由酒店經營,租俾客人結婚行禮用。
依間都唔例外,由ホテル軽井沢エレガンス經營。
教堂後面有啲枱櫈可以坐吓
喺軽井澤禮拝堂對面有另一間白樺と苔教堂,由日本建築師隈研吾同法國藝術家Jean-Michel Othoniel共同設計,都係由ホテル軽井沢エレガンス經營。
白樺と苔教堂室內主題係由白樺樹同青苔,不過依家圍住咗行唔到入去睇吖。
難得見到隈研吾嘅作品,一於同媽咪喺白樺と苔教堂前面影返張啦。
入唔到去影相,惟有借白樺と苔教堂嘅官方相片睇吓啦。
跟住行去旧軽井沢礼拜堂(舊輕井澤禮拜堂)。
落成於1984年嘅旧軽井沢礼拜堂係聖公會嘅教堂。
教堂現時由ホテル音羽ノ森(音羽之音酒店)管理。
教堂側邊有啲櫈可以休息吓影吓相。
依度好多紅葉、黃葉
然後行去雲場池睇吓,路上見到有輕井澤特色水渠蓋。
大約十分鐘就行去雲場池。
雲場池係輕井澤嘅一個小池塘,湖邊長滿楓樹,每年10月底到11月初係賞楓熱點。
今日天氣就好好,不過啲紅葉都落得七七八八,得返啲樹枝。
沿住湖邊小路環湖一周,好好彩仲見到有幾棵紅葉未落晒,影返幾張先。
睇完之後就行返去輕井澤駅,喺站度有個舊輕井澤驛記念館,係由舊輕井澤站改裝而成。
記念館前嘅聖誕裝飾。
睇完就行去新站
候車室
跟住去站內嘅Cafe & Dining Fermata食嘢同休息吓。
食完行去露台睇吓,見到嘅王子酒店滑雪場正準備開張。
有啲人喺度試玩。
食飽飽就搭草輕巴士去草津溫泉。
大約個半鐘就去到群馬縣嘅草津溫泉巴士站
由巴士站行去酒店係條斜路,行行吓媽咪話攰,話想休息吓,我就叫佢睇住啲行李,我行去旁邊嘅光泉寺睇吓。光泉寺全名係草津山光泉寺,係屬於真言宗嘅寺院。
「山門」即係「仁王門」。
地蔵菩薩
釋迦堂
本堂,入面供奉藥師如來。
真言宗創派祖師~弘法大師(空海)立像
五重塔
睇完就繼續行去酒店,今晚我哋住嘅係溫泉旅館,叫做草津温泉ホテル櫻井。
依間酒店front desk啲職員聯合國咁,有亞洲人、白人、南亞人。
大堂有有個welcome bar,有免費飲品提供。
就嚟聖誕節,聖誕佈置都出籠咯。
我哋嘅房間,入面同平時啲温泉旅館差唔多,入口玄關左手邊係放行李,右邊係浴室同洗手間,今次間房就大咗,分別有客廳同睡房。
客廰有荼具可以飲茶。
有草餅食。
睡房都有張枱仔
衣柜內有浴衣可着,不過只係有中碼同大碼。
細碼就要出lift lobby攞。
房間嘅窗口望出去都好靚
放低行李就行去湯畑度睇吓,途中又見到得意嘅水渠蓋。
湯畑旁邊嘅白旗源泉(白旗の湯),係俾當地人免費享用嘅共公浴場。
湯畑,草津溫泉嘅地標。溫泉水由源頭流到依度,輕過木制嘅水槽流動同冷卻,然後流到客溫泉旅館,不過我諗,如果落雨咪溝淡晒?
湯畑嘅石欄杆刻有嚟過草津浸溫泉嘅名人嘅名,有日本武尊、源賴朝、木曾義仲、巴御前、豐臣秀次、前田利家等。
跟住就去熱乃湯買飛睇「湯揉」表演。
睇16:30(最後一場)
「湯揉」嘅來源係因為泉源湧出嘅温泉水温度高唔適宜俾人浸,所以要搵人整凍啲先可以浸。以前冇機器,咪揾人用木板喺水池度整凍佢,依家當然只係表演嚟啦。
表演啲婆婆都有六十幾七十歲,如果佢地退休後,我估都後繼無人。
睇完湯揉出嚟,湯畑都開咗燈咯。
趁仲未黑齊,行埋去西の河原公園。
途經依間草津ガラス蔵1号館,佢最出名嘅係可以自己浸溫泉蛋。
依間係草津ガラス蔵2号館,最有特色係門口擺咗三個仿古郵筒喺度,好多遊客經過都會打卡㗎。佢同1号館其實都係玩燒玻璃嘅體驗工房,好多遊客玩㗎。
西の河原公園入口
西の河原公園係以温泉為主題嘅公園,温泉水流經整個公園,公園內蒸氣騰騰,仲有足湯可以免費浸添。
公園內有間草津穴守稲荷神社
公園山坡上有兩個雕像,左邊係がベルツ博士(Dr. Belz)、右邊係がスクリバ博士(Dr. Skriva),佢哋係明治年間擔任東京大學醫學院教授。自1891年起多次訪問草津溫泉,研究草津嘅溫泉水療效,並將草津溫泉推廣去世界各地。
草津温泉西の河原嘅泉源,每分鐘有1400公升温泉水湧出。
泉源前有個水子地蔵尊
泉源旁邊有間西の河原露天風呂,係草津三湯之一。
依間露天風呂特別之處係平時有分男女湯,逢星期五就會係混浴日。
睇完就行返落去湯畑
跟住行返酒店浸溫泉同食晚餐,途經光泉寺嘅五重塔,見佢着咗燈,又幾靚吖。
返到酒店就去大浴場浸吓溫泉先,入面個浴池好大,成個泳池咁,外面仲有個露天風呂,好正。
大浴場出面有啲日式佈置。
依間酒店最好係每晚8:15都有湯揉同太鼓表演。
表演場地就喺餐廳出面,食飽就出可以出嚟玩。
我哋book咗7點食晚餐,晚餐係自助餐,都好多嘢食(雖然唔係太靚)。
我覺得依個即煎豬柳最好食。
魚生我就唔係好啱,媽咪就鍾意食。
有一個booth係兒童餐
食完就睇湯揉表演,個池太細,其實只係跟住音樂搖吓塊板,唔會翹起啲水花。
之後就到觀眾玩吓,媽咪都有玩。
玩完湯揉就係太鼓表演。
留言列表