hkt222976的部落格

2023-6-22，今次去高雄探吓皓怡，然後去埋台東同綠島。

今次搭UO嘅中午機，未上機前去Lounge食碗魚蛋粉先，可能開多咗間Lounge，依間Lounge唔係好多人排啫，只係幾分鐘就入到。

除咗魚蛋粉之外，都有幾多嘢食吖。

食完就去登機口，今次又係經天際走廊。

天際走廊我覺得最得意係可以見到飛機喺自己腳下穿過，不過今次無飛機經過，影唔到。

入閘啦

今次搭UO132 HKG 12:45→ 14:15 KHH

飛到高雄外海，見到小琉球。

好準時就到咗高雄國際機場

跟住搭捷運去美麗島站，美麗島站因為有依個「光之穹頂」被稱為高雄最美車站。

由美麗島站行大約10分鐘就到咗我哋今晚住嘅酒店～喜悅酒店

房間同12年前都係差唔多

有少少唔同嘅係浴室同房間中間塊玻璃，以前係有花紋，依家係透明(不過可以落窗簾)

放低行李之後就搭捷運去駁二藝術特區，中途經過六合夜市，見到啲攤販正準備開市。

喺捷運鹽埕埔站落車，1號出口向前行，約2分鐘就到咗「鹽埕綠廊」，「鹽埕綠廊」係一條長約1200米，闊40米嘅綠化帶，沿途種滿鳳凰木，開花時好靚㗎。

「鹽埕綠廊」中間嘅草地放咗啲雕塑，可以打卡

再向前行少少就係駁二藝術特區，係度以前係駁船碼頭同倉庫，依家活化成文化藝術區。

依度係駁二藝術特區嘅誠品生活館同戲院

駁二啲舊倉庫，好多外牆都有彩繪

亦有人扮變形金剛因遊客合照

仲有好多雕塑

竟然連關二哥都攞出嚟搵惡搞，關刀變咗地拖。

駁二有輕軌經過，原來高雄輕軌係用超級電容蓄電池，所以冇架空電纜，唔會影響城市景觀。

輕軌嘅路軌同香港嘅電車軌差唔多，只係比較闊啲，同屯門嘅輕鐵一樣，都係行標準軌。

衘街邊嘅配電箱都油上彩繪

大港橋

經過大港橋之後就係大港倉，我哋喺度食下午茶，順便過吓冷河。

食完嘢就行去高雄港個舊牌坊度等巴士去西子灣

就喺依度搭紅52號巴士去西子灣國立中山大學

巴士站附近都係駁二藝術特區，好多人擺啲小攤檔賣吓嘢咁。

大約10分就到咗總站中山大學

仲有一個鐘先日落，行吓巴士站旁邊嘅打狗英國領事館(前英國領事館官邸)，不過要行好多石級。

行到上去就見到有一間十八王公廟

十八王公廟側邊就係前英國領事館官邸

本來我諗住入去睇吓，不過賣飛嗰度話佢哋收七點，驚我哋唔夠時間行，叫我哋最好唔好入去。咁咪喺外面睇吓算囉。

佢個位夠高影日落都好靚

睇完就落返去海邊嘅西子灣觀海平台。

遠處嘅高雄燈塔。

依度睇日落都好靚，只係前面有條堤壩。

想睇唔到條堤壩，就要行入中山大學入面嘅西子灣度睇。

大約行10分鐘就行到入去條堤壩嗰度，不過原來已經好多人喺度等緊睇日落。

坐低等睇日落

睇完日落已經冇巴士，要行大約20分鐘出鼓山魚港。

一號船渠景觀橋

過咗橋之後就係鼓山渡輪碼頭，側邊有個鼓山魚市場，嗰度有嘢食。

依個市場都好早收工，我哋嚟到嘅時候都冇乜嘢買，最後喺依間凱亞良品度食嘢。

我嘅海鮮粥套餐

媽咪要嘅魚蛋湯

食完就行去西子灣捷運站搭車返酒店

出咗捷運站行返酒店，途中經過六合夜市，夜市好多嘢賣，不過啱啱食完嘢同埋天氣真係好熱，冇心機買嘢食。

六合夜市側邊嘅公園，本來有啲表演睇，不過可能天氣太熱啦，冇乜人睇。

跟住買盒鮮奶，然後行返酒店咯。