2019-06-06,今朝起身出去行吓,睇吓大津市同琵琶湖,依間就係我哋住嘅大津東橫Inn
啱啱有架京阪電車經過酒店前,京阪電車可以直達京都三条、二条城同接駁京都地鐵,就算搭jr去京都站都係十分鐘,交通非常方便,所以今次我book唔到京都酒店咪改訂大津囉
行下行下見到有間彥田稻荷神社
呢間係間好細型嘅神社,稻荷神社係日本數量最多的神社,本來係比信衆祈求農作物豐收嘅神社,不過依家都條比人祈求商業興旺嘅神社。好多商人如果見拜完之後生意好嘅話,都會捐建一個紅色嘅鳥居比神社,當嘅報答神恩啦
大津市嘅水渠蓋係琵琶湖
由東橫Inn行約五分鐘就係京阪電車琵琶湖駅
行咗上站嘅天橋再向琵琶湖方向行去就係大津港碼頭
大津港遊船售票處,依度可以買琵琶湖遊湖船或者遊覽船密西根號嘅船飛
停泊咗喺湖邊嘅密西根號,依架船夏天每日都會有幾場巡遊,午餐時段仲有埋自助餐食添,冬天就禮拜六日先有航班
早上嘅琵琶湖好平靜,依度係一小部分,琵琶湖係日本最大淡水湖,面積有670.33平方公里,即係大過半個香港
湖邊公園
食完早餐搭jr去京都駅,大約十分鐘就到咗,跟住就去八条口出(唔同平時搭巴士嘅中央口),因為我哋今日要去京都VIP Lounge,參加個Klook嘅天橋立、美山一天遊
喺依度等又幾好喎,有凳坐又有嘢飲幾舒服吖,唔使企喺路邊
有咖啡、抹茶仲有味噌汁飲
今日搭嘅旅遊車嚟啦
大約兩個鐘車程就到咗位於京都府宮津市天橋立嘅智恩寺,依度傳說建於公元808年,寺派係臨済宗妙心寺派
文殊堂,建於1657年,供奉嘅文殊菩薩係國指定重要文化財
多寶塔,建於1500年,亦係國指定重要文化財
寫朱印帳
智恩寺嘅籤好特別,係扇子形嘅
抽到吉籤都幾好吖,唔知點解都掛喺樹上面呢?
見未夠鐘未有船嚟,行吓個天橋立公園仔先
小天橋
天橋立石碑,日本三景任務終於完成啦
由大天橋望向天橋立海水浴場,可能天氣仲未熱啦,冇人游水
橋邊有個波切(波関)地蔵,要嚟擺平風浪啦
影完相,就拿拿林跑返去搭天橋立觀光船,係最後一個上船,連碼頭相都冇影到,開船後先有時間影返個碼頭
一出海就有好多海鷗跟住我哋架船,原來好多人餵佢哋食薯條,不過我覺得成日咁樣做唔係好事,搞到佢哋唔識得捉魚。或者可能遲啲好似松島咁,全面禁止餵食
當架船差唔多泊岸,啲海鷗好醒目咁自己停喺個海度,睇嚟等下一班船開囉
只係15分鐘嘅船程,就到咗對面嘅一の宮駅碼頭
上岸後先經過呢間元伊勢籠神社,呢間神社話自己已經有千幾年歷史,連伊勢神宮都係由依度搬過去,但係我有啲懷疑未必係真
跟住就行去府中駅搭吊椅上去山頂嘅傘松公園,本來依度應該有纜車同吊椅兩種選擇,不過今日纜車維修咪搭吊椅囉
約6分鐘就到咗山頂傘松駅
上到去傘松公園可以望到天橋立啦
天橋立位於日本京都府北部的宮津市宮津灣,是一個特殊的自然景觀,因為地殼的推擠作用,在海上形成一個沙洲地形,被日本人譽稱為丹後之天橋立,與安藝之宮島(今稱嚴島)及陸奧之松島共同被稱為「日本三景」。至於「天橋立」這地名,相傳是指人們如果站在沙洲北端的傘松公園或南端的飛龍觀兩處地勢較高的山頭,背對著沙洲站立並低頭從自己的跨下朝後望時,會看到沙洲猶如一條往天上斜伸而去的橋樑,因而得名。(資料來源:維基百科)
指定動作:屹起蘿柚睇天橋立
睇極都睇唔到點樣似條飛龍
再行高D睇吓喺「股見発祥の地」望吓先
咪又係差唔多,邊有飛龍吖?我懷疑都唔知係唔係彎腰揼頭,搞到腦充血時睇到嘅幻覺啫
搭返吊椅落山食嘢啦
今日嘅午餐就喺依間松井物產度食
個午餐都好正,有火鍋有釜飯仲有長腳蟹食添
食完就再整多個抹茶雪糕,做飯後甜品(私人嘅)
依度都好多海產賣,有啲似長洲,我哋買咗啲章魚乾返屋企煲節瓜湯,好鬼死正
天橋立嘅水渠蓋
食完就搭旅遊車去美山町,嚟美山町主要係睇茅葺聚落(即係合掌屋啦),日本三大茅葺聚落係岐阜縣嘅白川鄉、第二係福島縣嘅大內宿,第三係京都府嘅美山町
呢度啲合掌屋同白川鄉有啲唔同,呢度啲屋普遍嚟講係矮啲同細間啲,同埋暫時少啲遊客,好似純樸啲咁囉
路邊嘅地藏菩薩
位於路邊嘅稻荷神社
またべ民宿
行咗陣我哋就去呢間彩花cafe飲嘢
見差唔多夠鐘,我哋就出返嚟依間きび工房度等上車,同埋睇下嘢
呢度都有啲當地嘅農產品出售
媽咪買咗盒美山牛乳嚟飲添
出到京都,個天都未黑齊,趁仲有光走去Starbucks-京都三條大橋店,飲杯咖啡嘆吓鴨川納涼床
所謂鴨川納涼床,就係沿鴨川左岸嘅餐廳(只限由二条到五条)會在戶外架起露天高台,讓食客一邊欣賞鴨川風景,一邊品嘗美食, 每年只限定夏天先有㗎咋。
因為Starbicks係沿岸最抵食,所以亦係最多人,要搵個職員看住個門口,同唔可以轉位坐
餐廳想叫自己做鴨川納涼床,仲要入咗會先得㗎
由天光坐到天黑先至走
跟住沿鴨川堤岸由三条行去四条食嘢,沿岸都好多納涼床
行咗約10分鐘就到四条大橋咯
我哋行去先斗町搵咗芊芊推薦嘅依間先斗焼 心食晩餐,食完就行返去三条搭京阪電車返大津
留言列表