2018-10-20，今日係星期六，朝早名古屋駅原來好多本地旅行團喺度集合
我哋喺名古屋駅搭9:00火車去茅野(松本轉車)
見未夠鐘開車，芊芊走去月台便利店買早餐食
途中經過下諏訪駅，個月台竟然放咗支御柱喺度，令我諗起幾年前睇嘅一套電影「戀上春樹」(日本原名:WOOD JOB!神去なあなあ日常)
11:35就到咗茅野駅
見站外有幾棵樹已經變紅，行出去影吓啦
見未夠鐘有巴士去白樺高原，去便利店行吓，見到D信州蘋果好靚又好香蘋果味
最後買咗蘋果同溫泉蛋食
買完就行去Alpico巴士站買定12:35車飛去白樺瑚
巴士嚟啦，原來係同去上高地嗰D巴士一樣，都係低公害事輛
大約行咗45分鐘，就喺東白樺湖站落車
落車後就睇定「シラカバ線」去蓼科牧場嘅巴士時刻表，每日只得幾班車架咋，真係要睇清楚先得
見仲有兩個鐘先有巴士去蓼科牧場，我哋就喺依間池の平酒店集團嘅白樺渡假村食午餐
食完飯見仲有時間，我就行吓白樺湖邊，不過媽咪同芊芊就話落雨唔想行，坐喺酒店等夠鐘就去搭車
白樺湖係為咗附近農業用水而建嘅人工湖，於1947年竣工。因位於海拔1500米嘅長野縣白樺高原，係避暑同滑雪好地方，所以湖邊有好多歐洲式渡假屋比遊客入住
湖邊仲有間池の平神社
個小型水上鳥居幾得意
我哋搭15:10嘅「シラカバ線」(我叫佢做微笑巴士)，唔洗十分鐘就到蓼科牧場站，一落車就係遊客中心
(方
仲有埋地圖簡介附近地點添
大約行5分鐘就到咗芊芊間大學嘅渡假屋「愛知大学 白樺高原ロッジ」
我哋book嘅4人房，有兩張單人床同埋一個和室
除咗餐廳外，仲有個大客廳，中間有個大火爐，我見夜晚有成班人(應該係校友)點起個火，喺度談天說地，好似幾爽咁
放好行李後，就行返去遊客中心隔離嘅池の平白樺高原酒店浸日歸溫泉
池の平白樺高原酒店除咗可以浸溫泉仲可以參加觀星體驗架，因為位於長野県嘅白樺高原，全年晴天率高達80%，不過今日就係其餘嗰20%吖，所以冇得睇啦！聽日一定會好天嘅！
每人600yen，除咗大浴場，仲有露天風呂(水面放咗好多香噴噴嘅信州蘋果)同埋桑那房
浸完溫泉就返白樺高原ロッジ食晚餐，今晚食火鍋，同酒店唔同，依度食完之後要自己執返D餐具返廚房同清潔自己張枱，依D嘢芊芊最熟手吖！
夜晚冇嘢做(連電話都收得好弱)早D瞓，我瞓到4點幾醒咗，出去露台見到成個天都係星，即刻影返幾張先
影到5點幾就天光冇得影囉
留言列表
