2018-10-19，今朝行去名古屋駅搭新幹線去京都
車站前其實都有長途巴士(JR高速巴士)去京都同全國好多地點，不過就唔夠名鐵BC多地點
我哋搭9:01嘅東海道新幹線去京都，東海道新幹線係關東同關西嘅必經之路，所以D車好密，好似地鐵咁幾分鐘就有一班。
坐N700系
不過車費就真係好貴，五千幾yen一程，仲係自由席咋
坐新幹線最好係有得叉電
只需34分鐘就到咗京都駅嘞
一出站就見到京都塔
成個京都駅嘅巴士站都係人......，媽咪排隊先，我就去買巴士一日券
三年冇嚟，原來依家已經加咗價，要600yen啦
我哋搭206號巴士去建勳神社
建勳神社主祭神係織田信長，同埋唔係一間太出名嘅神社，由明治天皇於1869年為紀念織田信長而下令興建，只得百幾年歷史，比起京都其他郁D就過千年嘅神社同寺院，只屬小弟弟。
我哋今日嚟主要係想睇一年一度嘅船岡大祭，船岡大祭係每年10月19日舉行，紀念織田信長於1568年10月19日「上洛」的日子。「洛」即係洛陽，亦係古時京都嘅別名，上洛即係稱覇。1568年信長帶兵入京都擁立足利義昭為室町幕府第15代征夷大將軍，但後來足利義昭不滿處處被信長制肘，聯絡其餘大名圍攻信長，但都被信長一一打敗，最後信長將足利義昭逐出京都，室町幕府滅亡，日本正式進入戰國時代
今日京都好塞車，嚟到建勳神社已經成十一點半，祭典都十一點鐘開始咗啦，依家成條參道都冇乜人， 唔知會唔會完咗呢？
行到上去見到好多人圍住個拜殿，睇嚟都出未完嘅
不過上到去都已經跳到最後一首舞樂～「胡飲酒」
完咗之後就由宮司主持向信長公嘅致祭儀式
祭典完成宮司退場
跟住D人走晒去本殿前，好似有好重要嘅睇咁？我都去睇吓啦
原來展出信長嘅愛刀「藥研藤四郎」複製品，依把短刀由鎌倉時代著名鑄劍師粟田口吉光（1227年－1291年）所鑄嘅短刀，傳說甚有靈性。據說在1493年，當時此刀主人武將畠山政長曾想用嚟切腹，但嘗試多次都無法刺穿腹部，一怒之下把刀扔向牆角嘅藥研（研磨草藥嘅石磨），短刀卻刺穿藥研。自此便有了「藤四郎吉光的短刀，鋒利卻不會讓主人切腹自盡」嘅說法，此刀亦多咗「藥研藤四郎」嘅名稱。後來此刀輾轉流到信長手中，成為信長嘅随身短刀，但在本能寺之變時此刀同織田信長一齊殞命於大火之中，從此便消失世上
睇完船岡大祭之後見到附近有間叫「今宮堂」嘅食堂，見D嘢食都好抵食，咁就順便食埋個午餐啦
我叫咗個豚肉定食
媽咪要親子丼定食
食完之後就搭1號巴士去出町柳，出町橋落車，依度以前叫「鯖街道口」，係以前由若狹灣(福井県)捕獲的鯖魚以徒步的方式運至京都嘅終點。
出町橋係賀茂川最後一條橋，之後賀茂川就同高野川滙流成為鴨川，再流入京都市內
喺橋邊有間妙音弁財天神社，行入去睇吓啦
弁財天係日本七福神之一，代表音樂與財富嘅女神
神社內嘅攝末社～豊川稲荷神社
拜完神社就行落鴨川玩跳烏龜
媽咪玩跳烏龜
跳完烏龜上岸就係叡山電鐵出町柳駅
叡山電鐵有兩條線，分別係去貴船口同鞍馬，另一條就係去八瀨比叡山口，我哋去瑠璃光院，所以搭八瀨比叡山口線
有D人著埋和服去添
大約坐15分鐘(260yen)就到咗八瀨驛(八瀨比叡山口駅)
車站出面有地圖說明附近景點
跟指示行過這條木橋
流經木橋下嘅就係高野川
過木橋後右邊係去瑠璃光院，左邊就去比叡山纜車站
去比叡山嘅纜車站，依度可以坐纜車轉吊車去延曆寺(世界文化遺產)，不過我哋今日冇時間去吖，所以影完張相就走啦
車站隔籬嘅「八瀨小徑」，如果係紅葉季節都好靚架
行番轉頭約五分鐘就可去到瑠璃光院
一個睇落唔起眼嘅瑠璃光院山門，但入場費貴到嚇死人，要2000yen，每年只喺青楓同紅楓嘅時候先開放，不過睇完之後就會覺得係值得嘅
瑠璃光院全名係「無量壽山光明寺瑠璃光院」，屬於淨土真宗東本願寺派嘅寺院
行入山門之後，沿參道小石階行上去，好寧靜又清幽，可能今日係星期五同未到正式紅葉季節啦
玄關前嘅小橋
小橋下嘅錦鯉遇上青楓
陽光穿過青楓
入咗玄關之後就行上二樓嘅書院，只有小量嘅楓葉變紅，如果一個月後再嚟就超靚
真係好佩服D日本人，可以將地板同枱面抹到反晒光，成塊鏡咁
每一個角落都靚到成幅畫咁
入場時有個袋，袋內有一篇佛經同一支筆，睇完咁靚嘅美景，就可以喺書院一角坐低寫經
抄完經就行返落樓下，樓下供奉着阿彌陀佛
我哋剛剛抄完嘅經文，就放喺佛檀前，由工作人員處理
再慢慢欣賞瑠璃之庭
瑠璃之庭主要係欣賞青苔同流水，依度有幾十種青苔配合流經庭園中嘅小溪，營造一種"人間淨土"庭園嘅氛圍，如果再加上紅葉就真係靚到震
依個環境坐低飲杯抹茶食件和菓子，細意欣賞日式庭園之美，真係人生一樂也
一樓另一個庭園～臥龍の庭
臥龍の庭以流水、青苔和石庭組合來表現飛龍在天嘅意境，據說可以解陶開人嘅心結
睇完瑠璃光院之後，就搭返叡山電鐵去出町柳，見仲有D時間，行去睇吓賀茂御祖神社，即係下鴨神社
沿住参道行去神社，會經過一片原生森林(糺の森)
下鴨神社1994年已登錄成世界文化遺產
沿參道行到一半路，會見到其中一間攝社～河合神社
依間神社號稱女性守護，供奉日本第一美麗の神～玉依姫命，媽咪就梗係要入嚟睇吓啦
依度嘅繪馬叫鏡繪馬，同平時嗰D唔同，唔係寫嘅，而係用嚟畫嘅，想自己有幾靚就畫到幾靚啦
連鬼妹都耍要畫呀
睇完河合神社，再行前就係南口鳥居
過咗鳥居就見到樓門
下鴨神社嘅舞殿
拜殿嘅入口
拜殿前嘅攝社～言社，係跟據每人出主嘅十二天干地支嘅守護神社
另一攝社～御手洗社
又一間攝社～相生社
睇完下鴨神社就搭返巴士去京都駅，然後坐新幹線返名古屋，喺站度見到有個細路女著住校服走咗入新幹線個入口處，我見個站嘅工作人員係咁同佢講嘢，又同佢打電話，我估係幫佢搵屋企人啦。我哋噝日本成日見到D幾歲嘅學生自己返學同放學，不過走咗入車站就第一次見。我見依個細路女件校服好靚，好似禮服咁(小學生平時好少著校服)，唔知係咪參加畢業禮呢？
我哋搭新幹線諗住半個鐘就到名古屋，點知神戶車站因為有意外，成條東海道新幹線停咗兩個鐘，企位D人都坐晒喺架車個地下度，真無奈
最後停咗兩個鐘先到名古屋，出駅後等埋芊芊先去食嘢
我哋就喺名古屋駅嘅博多もつ鍋食牛腸鍋
食火鍋最好配生啤，我成日覺得日本D生啤同鮮奶特別好飲，嚟親日本都要飲
食完個鍋最後追加白飯做雜炊，正！
留言列表
