2016年5月22日,今朝嘅早餐係酒店包埋嘅,都幾多嘢食
我哋行嚟車站搭9:00班車,去阿爾卑斯山麓嘅Lake Bled布萊德湖,但好多人都叫佢做碧湖
車程約1小時15分鐘,沿途D風景都好靚,有雪山、草原、村莊同小教堂
Lake Bled車站一落車已經見到咁靚嘅教堂
依間教堂叫聖馬丁教堂(Župnijska cerkev sv. Martina),建於1905年屬哥德復興式建築
影咗陣就行落湖邊睇吓,見到有D紅葉幾靚,又影吓
碧湖位於斯洛文尼亞嘅阿爾卑斯山區,氣候清涼,風景優美,係著名嘅避暑勝地,D人嚟玩都係慢慢玩,好悠閒
碧湖有個小島Bled island,上面有間聖母升天教堂(Pilgrimage Church of the Assumption of Maria)
行完湖邊就沿聖馬丁教堂側邊嘅小路上山上面嘅布萊德堡(Bled Castle),有人托埋單車上去添
沿住山路大約行十分鐘就上到去
古堡嘅入口
入口城樓嘅防衛窗
我哋琴日喺車站買嘅套票係包埋來回程車票同城堡入場券,不過要喺城堡前再換入場券,張券同張飛機boarding pass一樣
城堡的最早記載係1011年,即係已經超過一千年歴史
喺城堡上可以俯瞰碧湖全景
可以望到湖心島Bled Island上面嘅聖母升天教堂
仲可以望到遠處嘅積雪山峰
城堡餐廳睇景一流
雖然可以用入場券加一蚊歐元就換到杯咖啡,但我哋見到D嘢食幾貴(12歐一件芝士餅),所以都係影張相算啦
古堡內有人著起中世紀嘅服裝釀酒同賣酒,不過我哋都係睇吓就算
仲有古裝人賣藝
睇完古堡,就行返落山,沿湖邊小路繞湖一周,途中見到棵樹開晒黃色花好靚,唔知係咩樹呢?
D人帶住狗仔,推住BB車嚟散步
如果唔想行可以坐馬車
或者坐小火車都得
好多人都嚟坐喺湖邊,拍吓拖,晒吓太陽咁啦
不過湖邊D風景真係好靚,我哋係咁影過不停
我哋行到中途,就喺湖邊嘅Stratus Int cafe食碧湖特產:Bled cream cake,好好食
食完個蛋糕,再行出湖邊又影吓對面嘅Bled Castle
Stratus Int隔籬有個大草地,可以比人扎營
我哋沿住營她旁嘅小路上山
大約行20分鐘就上到觀景台
上到觀景台,有個鬼佬坐喺度睇書,真識歎
不過依個景真係冇得頂,Bled island好似明珠一樣在水中央
睇完又行返落山,去湖邊影吓Bled island, Bled castle
去Bled island可以喺湖邊搭船或者租艇仔自己撐過去,不過我哋買咗來回車票,要搭4:30車返盧布爾雅那,所以冇上去
其實湖邊都有好多嘢睇架
原來天鵝嘅BB喺灰色架,唔怪之得叫做醜小鴨啦
全程約行三個鐘,就返到車站附近咯
喺Tourist information centre前面嘅廣場,有個意大利食品推廣會
有皓怡鍾意食嘅芝士比人試食
咁大條腸仔,點食呀?
火爐即烤pizza
仲有音樂表演
睇完就行返車站等車返盧布爾雅那
等車時口渴,就去買咗盒阿爾卑斯山產鮮奶飲,超好味
好準時就有車到,咁就睇完風光如畫嘅碧湖嘞
返到盧布爾雅那仲有陽光,到處影吓D建築物,依度D建築物有好多唔同嘅風格,好似一個大嘅建築物博物館咁
又影吓D巷仔
行到去Cobblers' Bridge鞋匠橋,見到有人跳舞
我哋跟住喺橋頭嘅Restavracija Paninoteka食晚餐
盧布爾雅那D餐廳侍應好高效率,乜都扣喺個身度,埋單時可即時找錢,個錢袋分開好多格放紙幣同散銀
最神奇係有個迷你printer可以即時print單
留言列表