2015年7月11日,今朝我起得早(人老就瞓得少架啦),媽咪同芊芊邊有咁早起身吖?自己一個人沿住熊野街道行去四天王寺
四天王寺的石鳥居
四天王寺係由聖德太子於公元593年興建,係日本最早興建的佛寺,寺前有一個石燈籠同一個鐘紀念佢將佛教引入日本。
手水舍
四天王寺嘅西大門(極樂門),門邊的牆上鑲有經輪,參拜者都會先轉經輪,然後再參拜
西重門和五重塔,不過我嚟得太早,未開門,睇咗一陣就返酒店同媽咪食早餐再落京都
由天王寺搭Haruka express到京都,唔洗45分鐘
一出駅就去巴士站買巴士day pass先
我哋今日係世界文化遺產之旅,第一站就係鹿苑寺,即係金閣寺。建於1379年,由室町幕府的第三代將軍足利義滿建造。因為寺內「舍利殿」的外牆全是以金箔裝飾,所以被稱為「金閣寺」
張入場券係開運符嚟架,可以帶返屋企貼吓嚟招運
今日天氣都唔差,有少少陽光,雖然冇藍天,但唔似之前嗰幾日,係咁落雨咁慘。
唔知點解,仲有棵小紅葉喺度,令到成幅相:有紅、有綠、有山、有水,襯起金閣,正晒!
不過亦都好多人
金閣寺內嘅花園內有好多小佛像,D人好鍾意拋D錢落去
仲可以飲杯茶,食件和菓子添
供奉不動明王嘅不動堂
行完金閣寺,就去龍安寺,最初諗住行路都係15分鐘,不過見天氣咁熱,都係搭59號巴士啦,只係兩、三個站,5分鐘就到,落車後就過馬路就係龍安寺門口。
龍安寺唔係太出名,所以遊客唔多,可以慢慢欣賞佢嘅枯山水庭園
龍安寺門前放咗缸荷花喺度,行埋去就影到,長鏡都慳番
入到寺內喺樹蔭下行都好舒服
寺內嘅鏡蓉池
喺湖心島上嘅大辨財天神社
跟住行去石庭睇枯山水
龍安寺就係以依一套枯山水佈局登錄為世界文化遺產
枯山水並唔有山有水,而係以石代山,青苔為樹,以砂為水,砂紋為浪,通常喺日本寺院用嚟比僧人修禪時平靜心境之用,所以我D凡人係唔識架嘞
芊芊係咁吹住把芭蕉扇,睇住枯山水都冇話心靜自然涼嘅
石庭嘅後門
睇完石庭就行去西源院
西源院側門,西源院係位於龍安寺內嘅餐廳,提供精進料理(即係食齋),佢嘅七草湯豆腐好出名架
不過今日見佢靜英英咁,唔知有冇開呢?
西源院嘅正門,有棵紅葉
睇完龍安寺之後就搭巴士去銀閣寺,銀閣寺道落車,先行哲學之道
銀閣寺大門口,銀閣寺正式名稱係慈照寺,係室町幕府第八代將軍足利義政於1490年所建。
一行入大門之後,就見到兩旁由樹木砌成嘅銀閣寺垣
銀閣寺嘅入場券亦都係一張開運符
慈照寺的觀音殿,本來足利義政想將觀音殿貼上銀箔,可以同佢亞爺嘅金閣寺互相輝映,不過因為同個侄打咗幾年內戰,冇晒錢而作罷。而佢最後亦在這裡鬱鬱而終,但後人仍稱此為銀閣,亦算滿足到足利義政嘅心願吖
據說從這個角度欣賞最靚,有山(富士山形嘅向月台)、有水(波浪形嘅銀沙灘)、仲有亭臺樓閣(銀閣)
由山上望到銀閣寺全景
我就覺得依個角度影嘅銀閣最靚,夠清幽,配合銀閣寺代表的東山文化
睇完銀閣寺就出門口食抹茶雪糕同泡芙,依間泡芙好好食,今次第三次嚟,第三次食都係咁正。
食完之後又行番哲學之道
行行吓見到間叫銀閣寺風之館嘅体驗工房,媽咪見到就開心囉,即刻去玩啦
完成啦
完成之後喺風の館嘅門口影番張相先
玩完体驗之後就搭巴士去清水寺,不過架巴士好多人,大部分都係遊客,咁樣落去日本人遲早都會「驅蝗」,當遊客多到影響到當地人生活,依D嘢就會發生架嘞。
沿清水坂行上清水寺只係咁多人,依家仲多咗好多人着和服添
媽咪同芊芊入咗去買大頭妹,我見入面好多人就喺口等啦
清水寺建於公元794年,係京都最古老的寺院,同時亦登錄世界文化遺產。依個就係清水寺嘅大門~仁王門
芊芊攞住袋大頭妹
門口的三重塔
我哋喺清水大舞台,對面嘅三重塔叫子安塔
清水大舞台
喺清水大舞台對面可以影埋三重塔
子安塔
音羽之瀧
三年坂
二年坂
我哋行到去二年坂嘅「おめん」高台寺店食嘢
食完之後出門口影番張相先,不過都天黑囉
左手邊就係おめん嘅門口
食飽之後就行上去高台寺嘅樓梯度,影八坂の塔
自從幾年前比我發現到依個位之後,我次次嚟都影吓架
每年7月京都到處都會張燈結綵,慶祝祇園祭,寧寧之道掛滿燈籠
行到去八坂神社嘞,我哋4月嚟嘅時候,個舞殿仲包起嚟維修,依家整完仲點晒燈籠,好靚呀!
舞殿入面放咗三座神轎,係經過琴晚嘅洗淨儀式「神輿洗」之後,放喺度比人參拜,喺月尾就會放番入神社內架嘞
臨走前又喺八坂神社前影吓先
由依個位望落祇園都好靚架
跟住行落祇園嘅花見小路,不過好多遊客嚟睇藝伎,我諗遲早D藝伎都比人嚇走啦
藝伎的家
跟住行到四条河原町,就喺丸井百貨門口,有檔由京都造形藝術大學嘅學生設計嘅「四角衣」展,芊芊都買咗件嚟着。
四角衣只係由一塊長方形嘅布縫成,好簡約、清爽。
睇完晒就喺四条河原町搭巴士返京都駅,再坐Thunderbird Express返大阪同天王寺,臨走前喺京都塔影番張相啦
留言列表