2014年11月20日,今日去山梨縣嘅河口湖睇紅葉同富士山,但起身後見到冇乜太陽,但係預咗去唔通唔去咩?照去新宿站搭7:30嘅JR去大月啦。
今朝見東横inn好多人排隊食早餐,所以走咗去古野家買牛肉飯上火車食。
去到大月駅就轉富士急行電車去河口湖,全程約2個鐘,JR Kanto Area Pass都包晒。
一出閘就見到祝賀富士山今年登錄為世界遺產。
出咗河口湖站後就搭巴士去一竹美術館站,喺巴士度同司機買埋周遊券。
依度本來係睇紅葉同富士山嘅熱點,可惜今日多雲又冇陽光,行去湖邊間七福神廟前睇吓見唔見到富士山啦。
冇啦,富士山喺嚿雲入面。
連附近D樹都冇乜紅葉嘞。
行完湖邊就行「もみじ回廊」,即係楓葉迴廊
もみじ回廊係沿往梨川(冇水)河邊兩旁種滿楓樹嘅小徑,秋天勁多人喺度睇紅葉架。
楓葉迴廊後面就係一竹美術館,我對美術就唔識欣賞嘞,但係佢館前嘅花園D紅葉就好靚,梗係影番D先啦。
河口湖觀光協會啱啱喺楓葉迴廊口搞咗個「紅葉まつり」,即係紅葉祭。好似美食展銷咁,有嘢食有嘢賣。
我都整咗串燒扇貝,好味!
跟住再搭巴士去河口湖自然生活館
河口湖自然生活館主要介紹當地的鄉間生活同農產品,亦有餐廳食用當地的農產品,夏天時仲有得親手做果醬添。
館外的花田,不同的季節會種時令的花草。
仲有農產品賣
成兩呎長嘅大根都係賣80円,港幣5蚊咋!
我都喺富士山下買番個富士蘋果嚟食先。
去完自然生活館就搭番巴士去河口湖遊覽船站,搭天上山纜車。
三分鐘就上到天上山公園
其實個公園都冇乜嘢行,天氣好的話可以睇到富士山和河口湖全景,不過今日天氣好差,嘥料。
原來日本的小說家太宰治曾在河口湖住個一段時期,及改篇了著名日本童話故事「カチカチ山」,所以天上山又被稱為カチカチ山。
山上有個天上の鐘
行咗一陣,天色越來越差,仲落起雨雪,拿拿臨走咯。
落山D風景都好靚。
落到車站等車,見到對面嘅河口湖遊覽船都冇開。
又凍又落雨,即刻搭番巴士返河口湖駅。
拜拜啦,希望下次再嚟就可以見到富士山啦。
返到河口湖駅
吓,有火車壞車停咗喺條路軌度,暫停服務,唔知幾時先有車喎!
惟有喺個站入面行吓,食埋飯先走啦。
食完飯見到好多人排隊等火車走
原來依架就係壞車,啱啱拖咗去另一條路軌度,咁就開通返條路軌嘞。
我就搭返依架車返大月嘞。
返到新宿係咁落雨,見冇地方去,就去Tower Records買唱片比芊芊同去GU買衫
買完嘢就返酒店放低D嘢同休息吓,等夜晚細雨咗先出去六義園睇夜楓。
今晚係六義園夜楓第一晚開始,所以連當地電視台都嚟影,不過係咁落雨,冇乜嘢影到吖
園內有一個茶亭,可以一邊飲茶,一邊賞楓,個服務員仲係着和服架。
不過我覺得D楓葉未夠紅,可能過多一個禮拜會仲靚D。
係咁落雨,行咗大半個鐘就走啦。
睇完夜楓就去東京都廳。
位於45樓嘅展望台,睇夜景一流,最正係唔駛錢。
展望台上面嘅玩具博品館,我十年前又見佢,依家都見到佢。
行完東京都廳就行返去新宿站,途中又經過LOVE雕塑,依個雕塑係由美國普普藝術家Robert Indiana原創,喺好多個大城市都有,但係香港冇,可能藝術嘅嘢香港唔啱架啦。
同場加映:2004年嘅LOVE雕塑
東京モード学園大廈
行完之後就去新宿東口嘅「天丼」食天婦羅做晚餐。
留言列表