2011年4月10日,今朝4點起身,準備5點出發搭車去玉山睇日出,約4點半我行出民宿 大廳,老板娘已經坐咗响道,仲話4點50分就出發嫁嘞!我跟住就行去停車場睇吓有個溫度計,原來得10度咋。同埋見到7仔門口都有幾架小巴响道等客去玉山 睇日出。不過我哋琴日已經同民宿訂咗『玉山觀日』飛吖!
架車真係好準時4點50分就到,我哋一架van仔總共坐咗8個人,個司機仲一路行車一路介紹沿途風光,不過我D國語好差,都聽唔明佢講乜吖。一路行見個天越來越光,我响道諗:光澄澄點睇日出呀?可能司機都估到我哋咁諗,佢都主動話:放心啦,實有日出睇!
大約行咗一個鐘頭車,街到一道山邊,已經見企咗好多人,然後司機就停車响路邊,然後比塊黑色玻璃我哋之後就話:你哋可以落車勒,仲有兩分鐘就日出嫁嘞!之後搵個空位,等咗兩分鐘就真係日出喎。個司機真係勁!
媽咪係道係咁影。
雖然好似未瞓醒咁,都影返張啦。
睇完日出就車我哋去睇夫妻樹。
夫妻樹又係傳說中有一對情人比家人反對而自殺,之後就响佢哋殉情處生出兩棵檜木,咁咪叫夫妻樹囉。不過現實中依兩棵樹已經枯死,仲有倒下危險,所以現場有圍欄圍起,以免遊客走近而產生危險!
响其中一棵唔知夫樹定妻樹嘅頂,竟然有一株小樹苗!唔通真係枯木逢春?
响玉山嘅山路上有D野生嘅台灣獼猴。
佢哋唔怕人,仲識問人攞嘢食添,不過就冇香港馬騮山嗰D咁惡!
睇完獼猴之後,就去玉山國家公園個牌道,影返張到此一遊嘅相啦!
玉山係台灣最高嘅山,主峰海拔3952M,我哋就梗係冇上到咁高啦!
跟住就去睇鹿林神木,係台灣第二大神木。
鹿林神木高43米,粗20米,估計樹齡2800年。
睇完神木,司機就車我哋返阿里山停車場道,咁就完成咗三個鐘頭嘅『玉山觀日』之旅嘞。响停車場道又有一棵櫻花樹開得好靚!
附近D花草上面仲有D露珠,好靚嫁!
影完花之後就返欣欣換低D厚褸同食早餐。再行去『日出有大美』門口影吓相!
跟住行去阿里山站搭小火車去沼平,進行第二日嘅賞櫻之旅嘞!不過成架車都係大陸旅行團,迫到企都冇位咁滯!等我用手機影吓車卡內的環景啦!
小火車惟有加扣車卡同加密班次,不過咁樣超負荷,果然個幾禮拜後就出事啦!
火車站附近有好多盛放嘅櫻花!我哋兩個影過不停!
仲影埋小火車過櫻花樹下添。
D櫻花靚到好似去咗日本咁!
除咗有櫻花影,其實路邊D菊花仔同蒲公英都好靚嫁!
影完櫻花,就行吓森林漫步,不過超多人,影相都冇心機......
成個山都係大陸人,阿里山好似淪陷比大陸咁......
台灣最高(海拔)學府,香林小學。
响山上嘅木蘭園,有好靚嘅紫玉蘭花!
行到去神木站,嚇死人啦,成個站都係大陸人,點搭車走呀?
小火車到站,不過冇辦法上車,好無奈......唯有等下一班啦!
神木車站旁原有一棵台灣最大嘅神木,不過响香港回歸日(1997年7月1日)倒下!真邪門!依家放咗响路軌邊,比遊客睇。
最後都等到火車返阿里山站,不過就迫到沙甸魚咁,同車有D鬼佬同鬼婆,見到佢哋搭到拎拎頭,好無奈咁,唉......十三億中國人有錢,個世界就大濟咯......
然後我哋就搭巴士落嘉義高鐵站,搭高鐵上台北。
高鐵嚟啦,一個鐘頭就上到台北嘞!
最高時速接近300公里,我用gps睇到最快296km/h!
去到台北我哋就住响台北車站對面嘅『懷寧旅店』,都算唔差吖。
跟住出去行士林夜市醫肚。
我哋响士林食鐵板燒,熱辣辣、超好味!
留言列表