hkt222976的部落格

2010年8月24日，今朝早起身就發覺天氣唔多好，仲差過琴日添。個導遊仲話今日係全個行程中最好風景嘅一日添，天氣嘅嘢無得計嘅！希望下晝好D啦！
今日一早就去睇『寶峰湖』，依個係自費項目，個導遊係咁話靚，個湖响個山上面，百零蚊人民幣仲包埋遊湖添，咁就玩吓啦。

一入個湖區就有個瀑布响個山中間流出嚟，又幾『鬼斧神工』喎！

 

行咗一陣就上到山頂，又真係有個湖喎，仲有D遊船比人坐添！

 

遊到中途，仲有D着少數民族服飾嘅女仔唱山歌添！

 

個湖都幾大，遊咗半個鐘咁上下就睇完，我就覺得有D似去咗桂林遊漓江咁。

 

睇完寶峰湖後，就正式去張家界睇嘢嘞！依個就係張家界嘅武陵源入口嘞！

 

首先我哋坐吊車上天子山。

 

架吊車同昂平360差唔多，可以坐8個人，不過我哋就4人一架啦！

 

不過真係好鬼大霧，架吊車行咗一陣就行咗入D霧道，乜都睇唔到！

 

上到山頂又係白濛濛一片，乜嘢都睇唔到！

  

個導遊話咁辛苦上到嚟，點都要影返張相啦！

  

行行吓D天氣又好咗D喎，D霧散咁咗D，開始有D嘢睇喎！

 

跟住去食午飯，依餐叫竹筒餐，好多D飯同餸都係用竹筒嚟裝，又幾得意喎!

 

食完飯後我哋就坐車去袁家界，有太陽嘞，終於有D嘢睇囉。

  

  

D風景真係好靚，一嚿直不甩嘅山，上面有棵樹，不過就好似嚿嚿差唔多咁。我認嘢能力差，去完都唔認得依嚿係乜、依嚿係物......真失敗。

  

 

我認得依道係天下第一橋。

 

行上去條路，好多人扣D鎖响道，賣鎖嗰個就發達啦！

 

行上咗條橋道，仲見到兩個女响對面山喎！

行行吓仲見到有個畫家响道寫生添。

跟住就行到去今次行程嘅重點，『南天一柱』嘞，不過依家改咗名做『哈里路亞山』，因為佢哋話電影『阿凡達』係响依處取景喎！

不過又真係有D似喎！

跟住行條高空鐵橋去睇哈里路亞山嘅另一角度。

 

睇完之後就搭百龍天梯，即係觀光電梯，落返去山下面，不過原来得一半有嘢睇，之後就行咗入石層道，黑媽媽，乜都睇唔到，唔多抵搭！

出咗電梯又有道好似叫『將軍點兵』嘅景點喎。

  

最後就係搭『十里畫廊』小火車，不過就開始天黑，冇乜嘢睇囉！