2022-11-13,今日天氣似乎好啲,都算有藍天吖,通天閣包起咗嚟做裝修,同埋比我上次嚟多咗個大滑梯俾遊客玩
行去恵美須町地鐵站,條路都冇乜人
搭地鐵去到玉造站,一出閘,已經有路牌教去搵有關真田幸村嘅事跡地方
第一站就係三光神社,依度係以前真田丸嘅-部分,據說地底仲有一條通道能夠通去大阪城。1614年大阪冬の陣時,真田軍就喺依度將德川軍打個落花流水
参道
拝殿
真田幸村(信繁)銅像
喺真田幸村銅像隔離有一個「真田の抜け穴」,傳話依個洞可通向以前嘅大阪城
依家影相睇落似係堀頭通道
跟住行埋去心眼寺,心眼寺係1622年白牟和尚為真田幸村與幸村兒子真田大助祈求冥福所建
心眼寺係以前真田丸城嘅遺址,即係大坂冬之陣戰場之一,因為當時大阪城南邊防守能力較弱,真田幸村建造了真田丸城加強防守功能。但喺大阪冬之陣議和之時,德川家康要將真田丸城同大阪城護城河填平,導致防守力削弱,最後豐臣家喺大阪夏之陣之時以戰敗告終。
心眼寺山號真田山,六文錢係心眼寺係寺紋,同真田家嘅家紋六文錢遙相呼應。
當年大阪冬之陣同夏之陣,真田家每次都以寡擊眾,將德川家康打得屁滾尿流,仲差啲迫到德川家康切腹自殺,德川家康把真田信繁方恨得牙癢癢。德川家康建立德川幕府後,不允許建立真田信繁墓碑,直到400年後,2014年先正式喺心眼寺設立真田信繁溉墓碑。
2014年設立嘅墓碑,上面刻住「真田左衛門佐豐臣信繁之墓」,其實真田幸村嘅原名係真田信繁,係豐臣秀吉嘅近侍。朝鮮之役後升為從五位“左衛門佐”,豐臣係豐臣秀吉賜姓給真田信繁,而真田幸村唔係他生平常用嘅名字。真田幸村嘅稱呼係1672年出版嘅難波戰記中先首次出現,距離大阪夏之陣結束已經57年之後。
2016年NHK大河劇真田丸由堺雅人演真田信繁,寺內仲貼有當時嘅宣傳海報
心眼寺門口對面嘅真田丸顕彰碑
心眼寺隔離有間興徳寺,順路過去睇埋啦
大殿供奉藥師琉璃光如來
六地蔵尊
十米高嘅准提觀音
跟住返酒店食完早餐就去大阪城睇紅葉
喺門口噴水廣場搭小火車,我哋2009年都搭過
有人嚟影婚紗相
大約五分鐘就到咗極樂橋駅
落車後就買定11點嘅大阪城御座船飛
見仲有半個鐘頭先有船搭,行吓睇吓先,今日嘅天氣唔係咁穩定,一時出太陽一時又陰天,不過旅行唔落雨已經好好㗎喇
又見到到頭先影婚紗相嗰對新人
行返去極樂橋碼頭搭御座船
橫跨護城河嘅極樂橋
喺護城河游水嘅水鴨仔
大阪城除咗護城河之外,仲有高高嘅城牆,如果唔係豐臣秀賴咁蠢,填平咗條護城河,拆埋真田丸,德川家康喺夏之陣都未必攻到入去
喺船度個導遊叫我哋試下搵城牆上嘅「人面石」
揾到啦
大約20分鐘就泊岸,1500円我覺得唔係咁抵
上咗岸就經極樂橋行入去天守閣
入到去首先就係豐臣秀頼同生母淀殿自殺之地嘅石碑
大阪城最初係喺1583年由豐臣秀吉下令興建,經過幾次興衰,而家嘅天守閣係1930年重建而成,下面四層以德川時代風格嘅白漆風格為主,而最上面一層就係豐臣時代嘅黑漆描金風格。
冬天去日本我覺得最正係可以喺自動販賣機度買熱嘅粟米湯飲,媽咪今次就試咗呢隻新嘅薑汁雞湯,佢話仲好飲喎。
大阪城本丸日本庭園
大阪城公園内嘅歴史建造物「舊第四師團司令部廳舎」,戰後曾經改為大阪市立博物館,依家已經活化為MIRAIZA OSAKA-JO オフィス商場
天台就改建成餐廳,顧客可以睇住個天守閣嚟食嘢,我哋都唔執輸,食吓嘢睇吓景
食完之後就行吓大阪城公園內嘅豐國神社
神社門前有個秀吉嘅銅像
豐臣秀吉死後被,天皇賜予神號豐國大明神,並修建豐國神社予以祭祀。但豐臣家滅亡後,德川家康剝奪咗豐國大明神封號,到德川第三代將軍德川家光時更拆毀神社。到明治天皇時,德川幕府落慕,豐國神社被重新建造。
睇完豐國神社之後,再喺大阪城公園入面行吓、睇吓紅葉、黃葉
行完大阪城之後就搭返地鐵去道頓崛,去到戎橋就做吓固力果人嘅招牌動作
經過蟹道樂,行入去睇下有冇位?點知佢話原來唔book位就冇位!仲諗住經濟唔好可能會有walk-in位㖭!
抬頭見到自己喺街頭大電視出現咗
行去浮世小路睇吓先
呢條大約闊一米嘅小路,展示咗大正年代同昭和初期嘅道頓堀面貌
仲有供奉住日本傳說中身高只得一寸嘅「一寸法師」小神社,傳說佢用碗當船、用筷子當船槳、一支針做刀,由道頓崛川去到京都,然後戰勝惡鬼,成長為身高六尺嘅武士,最後仲娶得美人歸。
穿過浮世小路就係法善寺
法善寺只係一座很細嘅浄土宗寺院,山號天龍山,建於寛永14年(1637),本尊係阿彌陀如來、西向不動明王、金毘羅天王、お初大神。
最多人識一定係依座「西向不動明王」即係「水掛不動尊」,參拜者只須用水殼將水撥向不動明王石像三次便完成參拜。不過因為啲水係嚟自井水而水喉水,所以神像長滿青苔,而成為特色。
法善寺供奉嘅另一座小神社~金毘羅天王,係守護航海安全同漁民安全嘅神社
寺內供奉嘅另一位係「お初大神」,屬稻荷神,係保佑商業繁盛同五穀豐收嘅神社
法善寺附近另一特色就係好多貓貓
睇完法善寺之後就行去前面嘅千日前商店街
行完之後就去咗食依間「若狭家 難波店 海鮮丼専門店」
食完海鮮丼之後,就搭返地鐵返天王寺,去睇阿倍野Harukas300展望台。
阿倍野Harukas大摟共有60層,高300米,2014完工後成為日本最高大廈。直到2022年先至俾東京嘅麻布台Hills(325米)超越,依家係日本第二高大廈。
喺300米高嘅展望台睇夜景好正
喺大廈嘅16樓轉升降機層已經有啲聖誕佈置可以影相打卡
16樓戶外仲有個屋上庭園,都有聖誕裝飾睇
留言列表