2022-11-13，今朝起身打開窗簾見到個日出唔係咁好，好多烏雲，天氣預測重話會落雨添
等咗一陣又好似好啲咁，仲有啲彩雲
跟住出咗去睇米子城跡，米子城建於戰國時代末期(1591年)，但到咗明治初期(1871年)因廢域令而拆咗，而家只係淨返一啲石垣
米子城建喺山上面，要由山腳行上去，沿路有88個石雕佛像，係模擬四國八十八箇所(寺院)，可以俾信眾沿路參拜上去
四國八十八箇所同弘法大師有很大淵源，喺山腳度都有弘法大師嘅石像
上山嘅路唔係太明顯，好在有個路牌指引咋
每個佛像都有所屬佛寺嘅名稱
行到接近山頂就見到米子城嘅石垣
米子城跡而家只係一片空地，有啲凳倥俾人坐喺度，可以睇下米子市同埋中海嘅風景
行行下俾我發現到有一棵樱花樹開咗花
行完米子城跡後就返東橫Inn食早餐
食完就行去火車站，見到有間「餃子の雪松」，啲餃子好平，一千円36隻，仲平過香港嘅灣仔碼頭
餃子の雪松係間連鎖無人銷售店，全日本超過三百間店舖，顧客自己打開雪柜門取貨
然後自己放錢入收款箱
入到米子站內又見到鬼太郎
不過站內其實除咗鬼太郎之外，都仲有第二啲嘢睇嘅，例如呢個貓貓候車室
我哋搭火車去安來站，然後搭接駁車去足立美術館
足立美術館嘅免費接駁車，約半個鐘頭一班
上咗車之後有個告示提醒啲遊客，最緊要攞定回程飛先有車搭架
其實今日本來去諗住去姬路城，不過見到天色咁差仲有少少雨落添， 最後改咗去睇足立美術館， 因為喺室內唔怕落雨
買完入場票之後，就攞返張回程車飛，如果唔係就隨時冇車坐返出安來站
足立美術館嘅創辦人足立全康雕塑，同埋隔離有個牌寫住由美國的日本庭園專門雜誌「The Journal of Japanese Gardening」所選出日本庭園排行榜第一名，由2003年起已經蟬聯19年(到2022年)，佢仲係米芝連(Michelin Green Guide Japan)三星景點添
足立美術館大部分地方都係室內，我覺得最巧妙之處就係由室內望出去，好似一幅幅畫框咁，每個晝框都有镶上一幅美麗絕倫嘅風景畫
我哋去咗一間喫茶室「翠」望住個枯山水庭園食個Tea，好正
其實除咗庭園之外，仲有啲書畫同陶藝展品嘅
睇完之後就搭返接駁車返安來站，等車期間，見到 附近啲舖頭嘅佈置都幾靚下
喺米子站搭依架特急「やくも20号」出岡山，再轉新幹線去大阪
不過架車去到半路中途就壞車，行吓停吓咁，最後牽牛上樹咁去到石上見站再轉另外一班車，先出到岡山再轉去大阪
最煩係要拎住啲行李又上又落，去另一個月台轉車
不過好彩都有位坐
去到大阪再轉JR去新今宮站，然後行去新世界通天閣，依道嘅地標大雞泡魚燈籠都冇咗囉，連通天閣都包起咗嚟做大維修冇嘢睇，唉!一場疫症重創日本嘅經濟!
以前嘅靚景冇得睇囉
新世界嘅吉祥物Billiken仲喺度
我哋今次住喺大阪通天閣前東橫Inn
放低行李就行過隔離依間「大阪燒肉・ホルモン新世界」食燒肉
留言列表
