2022-11-08,差唔多三年冇離開過香港,終於有得去玩啦
今次搭UO 868 08:55→13:25
飛機經過鹿兒島上空,見到正喺度噴煙嘅櫻島火山
出咗關西機場就去JR售票處換pass,本來排緊人手換pass同埋book車程,不過有個服務員話出面啲售票機換會快啲,我咪試吓囉,不過原來售票機只係可以換pass,唔可以book車程,最後唯有去到京都站先至book車程囉
今次係用7天西日本山陽.山陰地區鐵路周遊券,依家換咗做電子車票,好處係可以就咁入閘,唔使經人手閘口驗票,不過就冇晒特色囉
我哋搭Haruka Hello Kitty列車,1小時20分鐘直到京都
車入面啲座位都有Hello Kitty 㗎
去到京都站見到有部熱飲機,媽咪撳咗罐雞湯出嚟飲
本來我想飲粟米湯,不過今次部機冇粟米湯,咁咪試吓蜆湯囉,不過原來蜆湯入面無蜆肉嘅,不過都幾好飲
喺京都站訂晒咁多日車程嘅飛,不過最多訂五程,再多就要坐自由席
媽咪話幾個鐘頭冇嘢食,有啲肚餓啊,跟住喺京都站入面嘅鹽小路Cafe食嘢
我食炸雞丼
媽咪食海老天婦羅烏冬
食完嘢出到嚟已經五點幾,連個天都黑晒,京都塔都着埋燈
跟住搭巴士落四條河原町,住我鍾意嘅四條河原町Super Hotel,已經差唔多三年冇嚟囉,睇嚟而家已經唔見咗啲碌架床房,不過地方都係咁細間
開咗個篋就冇乜地方行
我最鍾意嘅,梗係佢嘅天然溫泉啦,我通常都會早晚各浸一次
Super Hotel對女住客特別好,每日有一個小禮物包,入面有啲卸妝用品同面膜之類咁嘅嘢
媽咪話攰,留喺酒店休息同浸溫泉,我就行去高台寺睇夜楓,經過四条大橋,好多當地人坐喺鴨川河邊休息,啲情侶喺度曬月光(不過今日係月食之夜,變咗喺度睇血月)
經過祇園,比喺以前少咗好多遊客
嚟到八坂神社,見到月食咗一半啦,不過因為用手機影得唔係咁清楚,本來有部大機,不過唔夠光,手震影唔到,而家影影下相有陣時覺得手機仲好過相機咁
八坂神社入面都好多人set晒腳架喺度影月食,依個位睇月食好清楚,而家食咗一半,見到半個月亮變咗暗紅色
睇咗一陣就行側門經過石鳥居,行下河原通去高台寺
中途經過幽靜嘅石塀小路
終於嚟到ねねの道(寜寧之道)啦
依家高台寺附近都係好多紀念ねね過世400周年
行到寜寧之道,成個月亮差唔多食晒啦,變成個血紅色
喺台所坂,啲楓葉都唔係好多變紅啫,暫時仲係綠葉多
高台寺嘅大門「臺所門」
高台寺係豐臣秀吉正室ねね(寜寧)喺秀吉死後就喺依度出家,為秀吉祈求冥福嘅地方,ねね出名賢慧大方,深得各方人仕敬重,即使德川家康後來喺大阪夏之陣將豐臣家打敗同滅門後,仍讓ねね在此繼續修行,一路活到德川二代將軍德川秀忠時期
高台寺獨有嘅夜光御朱印
観月台
開山堂同偃月池
喺高台寺波心庭仲上演一場sound & light show
後山嘅竹林,用燈光造成螢火蟲咁嘅效果
睇完高台寺,跟住就行過去高台寺公園側邊嘅高台寺賑店影八坂塔(法觀寺)
然後行上二年坂,夜晚嘅二年坂好清靜,冇晒遊客
跟住再行上三年坂(產寧坂)
依間係賣湯豆腐嘅「明保野亭」,係江戶時代末年,倒幕人士聚集嘅旅館,倒幕先烈坂本龍馬亦係常客,所以門口放咗佢嘅相喺度
再沿着松原通(清水坂)行上去清水寺,平時車水馬龍嘅清水寺,而家冇晒人,只係有幾個攝影師喺度影血月
睇完清水寺行返落去法觀寺(八坂の塔)
又有人喺度影月食,仲見到有電視台攝影師喺度影添,可能今日天氣好同埋時間又好啦,而家先係晚上八點幾又唔係半夜三更
影完行返酒店,經過花見小路嘅時候,啱啱見到有個藝妓行出嚟,不過唔知真定假藝妓,我估就應該係真藝妓,因為如果係遊客嘅話,通常都會兩三個人一齊行
依家花見小路,因為唔俾影相,所以冇晒啲遊客,我都冇行入去睇
返到酒店,媽咪話想去便利店買宵夜食,於是同媽咪行過隔離新京極商店街嘅family Mart買鮮奶、炸雞塊,同埋春雨
其實而家先係啱啱九點(以香港人來講好早啫),啲舖頭已經閂晒門,連錦天滿宮都閂埋,我記得2009年第一次嚟嘅時候,我都好夜嚟參拜,當時仲有開門,可能因為疫情早啲閂門囉
返到酒店睇電視,原來講緊月食同埋點解會見到血月
留言列表