2019-05-31，今朝喺酒店附近行吓，原來有D似街市咁，賣吓D蔬果肉類咁啦
再行吓去樁神明社睇吓，依間係間小型神社，同我上次嚟冇乜分別
跟住食完早餐就搭JR去郡上八幡，今日開始用張立山黑部、高山、松本地區5日pass
不過張pass只係可以去到美濃太田，之後就要買長良川鐵道(私鐵)去郡上八幡嘅車飛
我哋揀咗搭長良川鐵道觀光列車『ながら』號
趁轉車時間有個零鐘，行吓去河邊睇中山道太田宿，沿路有12星座雕塑
中山道係以前江戶時代由江戶(東京)到京都嘅驛道，中山道全長約526公里，設有69個宿場(驛站)。太田宿係其中一個，宿場喺現代社會當然無用，所以好多都改成觀光景點。
太田宿旁嘅祐泉寺，始建於1474年，現時嘅寺院係1983年重建而成
祐泉寺前嘅木曾川
睇完太田宿就行返去美濃太田駅，搭長良川鐵道嘅『ながら』號
火車沿住長良川逆流而上，河水非常清澈
依架火車由日本電車設計大師水戶岡銳治設計，即係同九州嘅Aso boy、指宿之玉手箱、和歌山貴志川電鐵同一個設計師，唔怪之得有D熟口熟面啦
架火車喺中途站「大矢駅」小停片刻，我哋落車影吓相啦
大矢駅内有個小型鐵路博物館，可以參觀吓
全程約個半鐘就到咗郡上八幡駅，我覺得依個站有D似和歌山貴志川線嘅貴志駅(貓站)
媽咪買咗包郡上八幡米同一盒士多啤梨嚟食
日本D當地農家產士多啤梨好香好好食，雖然今次就細粒咗D
郡上八幡站有穿梭巴士來住郡上八幡城下町，不過一個鐘得一班，我哋行落去都唔係好難啫，仲可以一路行一路影下相添
一間好有京都風格嘅民宿美ろく
流經郡上八幡町嘅「吉田川」，好清，屬一級河川
跟住行去睇吓全國名水百選之一嘅「宗祇水(白雲水)」
不過我就覺得好似條坑渠咁 
宗祇水最後會流落去隔離嘅小駄良川度，再流入長良川
睇完就行去Igawa小徑(いがわ小径)，係一條小溪邊嘅小徑， 我就唔覺得有乜特別，但D旅遊書就係咁介紹
河邊有D魚糧賣，自己入錢落個箱度，然後攞一包去餵魚
D魚比人喂到鬼死咁肥
連當地嘅坑渠蓋都係依D肥魚
郡上八幡舊廰舎記念館，依家亦係郡上八幡觀光協會，每日都有幾場郡上舞表演，不過我哋趕住去食嘢，無入去睇
舊廰舎前嘅新橋，由橋上望向橋下嘅吉田川，河水非常清澈，夏天時好多年青人响度玩跳橋(影片)，跳落去冰涼嘅河水度，不過間中都有意外死亡事件架
橋上面都有警告牌
我哋行咗去食依間 大八 郷土料理店
好多名人幫襯㗎
我哋食飛驒牛鍋，好正，入口即溶
途經城山公園有一座戰國武將山內一豐同妻子千代嘅銅像，據說山內一豐仲係下級武士嘅時候，曾睇中一匹馬但無錢購買，千代得知後私下典當嫁妝為一豐購得此馬。後來一豐因騎此馬立下不少戰功而得到主公織田信長賞識，從此扶搖直上。而千代亦留有「賢內助」之美名。
沿住山路約行一公里
一路行一路落住小雨，行咗約半個鐘就到
郡上八幡城始建於1559年，明治初年因廢城令而被拆。現時嘅天守閣係1933年重建而成
依個係木做天守閣，係全國最大木製模擬天守
天守上望向城下町
郡上八幡城有人叫佢做天空之城，我都係睇咗依張相先專登嚟睇吓，原來係要有霧嘅朝早喺對面山影過嚟先有咁靚㗎，我就梗係影唔到啦
落山時經過一間岸劍神社，都有好耐歷史
之後行去城下町廣場揾巴士返岐阜，其實本來諗住行返去郡上八幡駅搭火車返去，不過係咁落雨，費事行啦
就喺依度等巴士返岐阜，再轉火車返名古屋
巴士站旁都有D小食賣吓
返到名古屋等埋芉芊放學，之去博多もつ鍋食牛腸鍋
留言列表
