2018-09-05,今朝食完早餐(芊芊喺佢酒店帶嚟嘅壽司)就行過對面搭沖繩巴士48號去ルネッサンス リゾート オキナワ(沖繩萬麗渡假村),即係芊芊做嘢間酒店
不過我哋趕住去玩吹玻璃冇行入去,留返今晚食嘢先嚟啦
我哋就係去依間煌工房玩吹玻璃,個老闆娘問我哋有冇book位?我哋話冇。原來今日都幾full,只係淨返4:30後先有位,照殺啦,鬼叫自己懶唔book位先咩。
我哋順手揀埋想燒嘅杯款先
煌工房對面有間海の教會,沖繩好多教堂都好靚,專登比人結婚同影婚紗相
跟住慢慢行去真榮田岬玩浮潛,沿路有好多甘蔗田,出產好多沖繩黑糖架
大約行半個鐘就到咗真榮田岬停車場,估唔到今日唔係假期都咁多人。
去到就搵我哋玩浮潛嗰間公司~青の洞窟屋嘅車先,我哋早咗成個鐘嚟,個接待(我估佢係老闆)係台灣人,佢話可以早D出發都得,然後就比埋D潛水衣我哋換。
真榮田岬嘅遊客中心,依度除咗有餐廳同紀念品店外,仲有更衣室、locker、廁所等設施
換好衫後就去返架van仔度集合,然後教我哋用D潛鏡同呼吸器,依D嘢我哋以前都玩過,冇乜難度。跟住佢叫我哋跟個日本教練出海,仲同埋另外四個澳門人一齊出海添,我心諗:又話每組參加者都會搭配一位隨行教練,唔會同其他客人併團......原來係吹水。算啦,我不嬲去玩都唔會同人嘈,盞嘥自己時間同搞壞自己心情
出發前影返張相先
行喺我哋前面嘅就係我哋嘅教練
落水後教練就同我哋影水底相,媽咪唔識游水,係咁捉住塊浮板唔放
個海底好多魚,唔怕人
喺岸邊熟習咗之後教練就帶我哋游去青の洞窟
青の洞窟個洞口唔係好闊,只係夠一排人入,一排人出,所以如果暑假嚟就要排長龍架嘞
青の洞窟係一個海邊岩洞,入面冇光,所以當人入咗去之後,就會見到由外面嘅太陽光穿過海水再折射入嚟,所以形成神奇嘅藍色(日文係青色)
青の洞窟內好多人,影相要排隊,其實海底仲有好多人潛緊水架。
睇完青の洞窟之後,就游番出嚟餵魚,原來教練一早以經準備咗麵包,不過依家先知D魚個咀好硬,比佢哋啄到都幾痛
教練仲潛落水底同我哋影咗張黑影相
上面D浮潛相多數係教練用佢部潛水相機幫我哋影,下面嘅就係我用手機加個防水膠殼影嘅
大約玩咗個半鐘就玩完,跟住行去食嘢,但真榮田岬嗰頭較為隔涉,冇乜嘢食(遊客中心D嘢個樣唔係好得)。最後行咗去琉球村附近嘅Sea Heart食個Tea啦
依間舖頭個老闆娘好有心機去佈置間舖
成間舖都喺佢打理,叫完嘢食就慢慢等佢整
佢主要係賣三文治同熱夠等美式小食,唔錯,值得推介
食完後就行返去煌工房玩燒玻璃,首先由個工匠將燒紅咗嘅玻璃喺個爐度攞出嚟先
跟住就放入去個杯形容器度吹
跟住就坐低切佢出嚟
然後就整大個杯口
咁就完工架嘞
我哋一人整咗一個,跟住要擺喺工場冷卻一日,通常舖頭會代寄返去屋企(另外收郵費),我哋就揀咗後日返去攞
佢會包好先比我哋,我哋將佢寄艙都冇乜問題
完整無缼就咁返到香港
燒完玻璃就行去芊芊間酒店食晚餐
佢間酒店好大好靚,仲有私家海灘
海中餐廳
婚禮教堂
仲養咗海豚同魔鬼魚
我哋今晚食嘢嘅餐廳叫「彩Irodori」,主要提供日式同沖繩食物
我哋揀咗依個火鍋放題
開餐啦
加咗個沖繩特產「海葡萄」
前菜同特飲
依個天婦羅係餐廳經理送比我哋食嘅
餐後甜品
依間餐廳D嘢好好食,但就有D貴(雖然已經有員工優惠),不過環境就好靚,都抵嘅。
留言列表