2016年5月27日，今日食完早餐就趁張24小時票未夠鐘，就搭地鐵去Kálvin tér站行街市，出站後就見到依間Kálvin Reformed Church
依度係布達佩斯歴史最悠久(1897年開幕)同最大嘅室內街市，係當地人買餸嘅地方
我都買咗1kg士多啤梨，20蚊港紙都唔洗
竟然仲有人帶餸籃嚟買餸
好多香料賣
中央市場有三層，地庫賣魚同肉類，仲有超市，地面嗰層貴蔬果同香料，樓上有衣服、餐廳、熟食同紀念品
扭計骰係由匈牙利人發明，紀念品店當然有得賣啦
我都買咗兩件T恤
中央市場旁邊有間Corvinus University of Budapest
大學前面就係多瑙河同自由橋(Liberty Bridge)
行完街市就行返去Kálvin tér，見未夠鐘搭車就喺附近行吓影吓
匈牙利國家博物館(Hungarian National Museum)，始建於1838年，係新古典主義風格。
行完博物館後就返酒店攞行李，前往下一站維也納咯
布達佩斯火車總站(東站)Budapest-Keleti Railway Terminal
喺火車站買咗個漢堡包上車食
我哋搭奧地利國鐵OBB
大約兩個半鐘就到維也納中央火車站(Wien Hauptbahnhof)
依間就係我哋住3晚嘅酒店Hotel Schani Wien，由火車站行去大約5分鐘
依間酒店唔差，勝在新同近火車站，但唔包早餐，最唔好係間房冇雪柜，想買支鮮奶返嚟都冇得雪
最應該讚嘅後有USB充電制
不過我哋放低D行李就要即刻走，因為比利華特宮Belvedere Palace五點半停止入場，好在近酒店行咗15分鐘就去到
比利華特宮係維也納一座巴洛克建築風格的宮殿，分為上宮同下宮，係歐根親王(即係幫匈牙利復國嗰個)嘅官邸。依家比利華特宮已經改為藝術館，我哋今日要睇嘅就係上宮，主要收藏近代(近200年)嘅藝術品。
我哋主要係嚟睇依幅克林姆嘅《Kiss》，幅畫直係超靚，連我依個藝術盲睇到時都覺得震憾，一幅畫點解可以靚成咁？由其係D金黃色，經過百幾年都仲咁靚！
不過依幅任我哋影嘅係仿製品，因為藝術館都知大部分人都想影依幅畫(我都見有個鬼婆偷影)，所以喺展覽廳隔籬專登比幅仿製品我哋影吓囉
另一幅出名嘅作品就係雅克-路易·大衛嘅《拿破侖越過阿爾卑斯山Napoleon at the Saint-Bernard Pass 》
不過睇到六點，D工作人員就嚟清場，我哋就惟有行去睇埋花園同下宮
依間就係下宮，主要收藏中世紀嘅藝術品
睇完比利華特宮，就返去火車站嘅food court食晚餐，食咗咁多日鬼佬嘢，終於食返餐亞洲餐
好鑊氣
食完飯行返出火車站，見D光都靚，影吓先
留言列表
