2017年1月25日,今日又係晴朗嘅一天,我哋穿過上野駅行去上野公園(全名係上野恩賜公園)。
首先去睇吓西鄉隆盛嘅銅像先,其實我覺得明治個心都覺得對佢唔住,雖然西鄉被迫發起西南戰爭反佢,成個亂臣賊子咁(其實係明治打完齋唔要和尚在先),所以最後都幫佢平反吖。
上野公園嘅彰義隊の墓,紀念上野戰爭時陣亡嘅彰義隊成員
旁邊有個牌簡介1868年嘅上野戰爭,其實日本人都幾公道,只要佢哋死得光榮,即使被視為亂臣賊子,一樣起個碑紀念佢哋。可能依D就係武士道精神啦。
喺彰義隊の墓後面嘅寬永寺,喺江戶時期重要寺院之一,十五個江戶幕府將軍,其中六位亦葬在這裏,歷代主持多數由皇族擔任。上野戰爭時,彰義隊挾持主持並死守在此,但最後全被殲滅,寬永寺亦被大火焚毀,到1879年明治才下令重建。
廟旁有一棵十月櫻開咗,依種櫻花有一種特別之處就係每年4月同10月都會開花,但依家竟然1月開花,唔通又關全球暖化事?
D花唔係密,但都幾靚
芊芊同媽咪影相
我都同芊芊影吓先
見到有旗仔介紹公園內嘅國立西洋美術館已登錄為世界文化遺產,行去睇吓先
美術館前仲見到有老師帶D小學生嚟參觀
原來喺2016年嘅世界遺產大會上,宣佈將法國建築設計師柯比意Le Corbusier,喺7個國家嘅17件建築物,列入世界文化遺產,而喺上野公園嘅國立西洋美術館就係其中一件。不過可能我唔識嘢啦,我就覺得從外觀睇,依間美術館冇乜特別吖?咪同香港嘅大會堂低座差唔多?不過可能室內設計好出色啩(我冇入室內睇)。
美術館外有法國雕塑大師羅丹嘅最出名作品「沉思者」
羅丹嘅另一件作品「加來義民」
其實美術館門口仲有幾件雕塑,室內仲有好多印象派作品,例如莫奈、梵高、高更、馬奈......不過藝術嘅嘢我識鐵咩。依度最吸引我嘅係門口依棵梅花,我同芊芊都係咁影。
影完梅花就行去國立科學博物館,睇吓野口英世嘅銅像,依家1000円紙幣上嘅人像就係佢。
又有D學生嚟做功課喎
公園內又見到棵盛開嘅櫻花
其實上野公園行成日都得,不過想睇嘅嘢太多,唯有走馬看花啦。跟住行去アメヤ横町,香港人通常叫佢阿美橫町,我覺得佢似香港嘅廟街。
依度賣D嘢立立雜雜,無論用嘅、著嘅、食嘅、生嘅、熟嘅、乜都有,有好多店舖寫咗D簡體字出嚟,令我感到好似係大陸人開咁。
行完阿美橫町後就去搭地鐵
地鐵站入面有個機械人介紹Tokyo metro
我哋買咗張Tokyo Metro嘅24小時券,依家好過以前吖,以前真係一日券,第二日就用唔到。
我哋塔去淺草,行去商店街「仲見世通」,依度永遠都係人頭湧湧
芊芊就影過不停
試吓依間自稱日賣4000個嘅泡芙先
又真係幾好食喎
行到去淺草寺嘅「寶蔵門」,寶蔵門始建於942年,最初叫仁王門,經過幾次燒毀同重建,二次大戰時毀於盟軍嘅東京大轟炸,後於1964年用鋼筋水泥重建成現時嘅樣
淺草寺嘅本堂,亦曾毀於東京大轟炸,於1958年重建,供奉觀音菩薩。
位於本堂後面嘅影向堂
睇完淺草寺就去東武鐵道淺草駅搭火車去Sky tree駅
只需3分鐘就去到Sky Tree駅
出駅見到Pico大叔嘅PPAP紙板比人影相,真係唔明一個騎呢大叔,唱一首騎呢歌點解會紅得咁交關?
跟住行上Sky Tree,即係晴空塔
Sky Tree由東武集團於2008年興建,2012年完工,高度634米,係現時世界第二高的人工構造物,僅次於哈里發塔。
先去4F排隊買飛上塔,唔算太多人,約排10分鐘就買到
先上350m層,今日好天氣,可以望到好遠
望到東京灣同彩虹橋
仲望到富士山
跟住見咁好天,再買飛上450m層,依家做緊個集英社嘅少女漫畫雜誌「りぼん」嘅展覽,原來依本雜誌由1955年創刊,我同芊芊講:當年嘅少女依家都變阿婆啦。
睇返以前D封面由真人變到依家嘅漫畫,顏色由實色變成粉色,但真係好犀利,超過60年都仲有得做,香港嘅姊妹雜誌都執咗啦
一睇到有動漫芊芊就開心囉
跟住行天望回廊~地上450mの空中散歩
有D觀景筒可以有D漫畫場景睇
沿著天際回廊行到最高點,451.2m
又望吓富士山
Sky Tree嘅影子
睇完就搭電梯落345m個層
依層冇乜嘢睇,主要有間紀念品店,芊芊話幾年前我曾經喺依度買過一個公仔比佢,佢掛咗喺個書包度,最後唔見咗,佢想揾吓依家仲有冇喎。我話乜有D咁嘅事咩?我都唔記得咯,等我揾吓D舊相先,原來我2013年真係買過比佢喎!有圖有真相。
我哋今次就搞搞震,冇幫襯
跟住就再行落去340m層,依層最有特色係有玻璃地板,可以望到340m下嘅地面,喺上面行真係有D腳軟。
有工作人員幫我哋影相,先用佢哋部相機影,然後就再用我部相機影,佢影嗰張就即時印好出嚟,如果睇啱就可以買
依張就係佢影嘅,影得幾好吖,又連埋個Skytree相架,買咗佢做紀念啦
之後塔番電梯落3F商場,媽咪因芊芊入咗去依間Free's Mart買衫,我就喺門口等......
兩個揀得好開心,買完之後係咁話抵
買完之後就搭地鐵去涉谷
我哋去咗「赤ちり亭」食晚餐,餐廳由幾個南亞人打理,仲有時出門口拉客,D嘢就唔係太好,有伏味
食完之後媽咪同芊芊就繼續喺涉谷shopping,我就冇興趣等佢哋,一條友搭地鐵去六本木hills睇「君の名は」X「星空のイルミネーション」,地鐵站都有個燈箱介紹。
一出地鐵上平台就見到六本木hills嘅地標~大蜘蛛
平台上可以見到東京鐵塔
52F展望台Tokyo city view嘅飛,包埋53F嘅森美術館,都幾貴要成1800円,不過睇完就覺得係值嘅。
喺52F展望台望東京鐵塔好靚
原來個「君の名は」X「星空のイルミネーション」係將「君の名は」嘅部分畫面打喺展望台嘅玻璃上
拍咗一小段星空のイルミネーション
睇完「君の名は」X「星空のイルミネーション」,就行去睇全方位型「空宙プラネタリウム 」,係用一部360度投影機,將整個宇宙星空投射喺個房間內,連玻璃地板都有星星,好似喺宇宙飛行中咁,好震撼!
睇完全方位型「空宙プラネタリウム 」,就睇「3Dスカイウォーク」即係3D空中漫步。
喺一間漆黑而鑲滿玻璃嘅房間中吊住無數LED小燈,漫步其中真係好似置身太空中一樣,有D似兩年前睇草間彌生嘅「魂の灯」咁,如果唔係睇過「魂の灯」,肯定更加震撼。
本來可以上埋53F睇「森美術館」,不過美術嘅嘢我又唔識,最後都係出去行街算咯。
最後行出街睇六本木燈飾
D燈仲會變色架
留言列表