2017年1月22日，今朝一早起身又走咗去泡一個靚湯先，原來依間酒店嘅男、女湯係會半夜對調，等客人可以有唔同嘅體驗，爭D入錯女湯添。浸完就返房換衫同叫醒芊芊，我就去行下酒店嘅花園，竟然見到個大熱氣球。
我記得睇酒店資料時知佢有熱氣球玩，但係好以係夏天先有㗎喎，點解依家都有呢？
原來有一個台灣旅行團包咗佢，我問吓有個等緊玩台妹係咪另外俾錢就有得玩？佢話唔知，不過佢哋一齊嚟嘅朋友有人唔玩，跟住仲俾咗佢嗰張飛我玩添，今次真係冷手執個熱氣球飛囉。
其實個熱氣球飛得唔係太高，因為玩得兩分鐘同有幾條大纜拉住，不過都睇到附近嘅風景
玩完熱氣球就行吓個花園，原來都有D嘢睇吓，不過依家冬天乜都冇啦。
跟住就去食早餐
D早餐食物多數都係本地漁農產品
食完早餐就退房，因為我哋Cool star旅行社Book咗架車去阿寒湖同摩周湖，本來話係七人車加埋導遊同司機，點知嚟架大巴士。成架巴士得我哋3個人，連埋司機同導遊都係5個人，喺巴士打橫瞓都得。
我哋喺中途站あしょろ庵落車去吓廁所，見依度都冇乜人嚟，個日本婆婆冇乜生意，等我哋幫襯吓佢啦。
到咗阿寒湖啦
阿寒湖觀光協會
夏天時阿寒湖可以坐船遊湖，不過依家成個湖結晒冰，碼頭都關門啦。
係咁落雪，芊芊睇乜呢？
原來係睇雪花，其實我都見過好次落雪，但咁靚嘅雪花都係第一次見咋！
據科學家講，雪花係六角形晶體，喺世界上唔會有兩粒一樣嘅雪花
影完雪花就行出阿寒湖嘅湖面，睇吓有乜玩啦
有香蕉船
有得釣魚
雪上四驅車
雪上電單車
或者自己玩吓都得
最後我哋揀咗玩釣魚
買咗飛之後，就憑飛去攞魚杆、紅虫同凳仔，再聽吓工作人員教點樣釣。
首先去揾個有位嘅帳篷，坐低後將紅虫勾喺魚絲上嘅鈎度，然後放落一早已鑽咗嘅冰孔度。
慢慢等魚上釣，依度釣嗰D叫做公魚，只得手指咁長。如果有收獲可以攞返去個貨柜度，有工作人員會將D魚炸成天婦羅，可以即刻食埋先走。
不過我就冇咁好耐性嘞，我就去行吓影吓相仲好啦
原來有D帳篷入面有D養住嘅魚，應該易釣D嘅
玩咗半個鐘，見到媽咪對手就知咩結果啦。
跟住就繼續坐車去摩周湖，途中經過一處叫双湖台嘅地方，司機專登停車比我哋睇吓。依度可似望到一個叫ペンケトウ嘅湖，而依個湖嘅形狀好似北海道嘅外形。
約行車一個鐘就去到摩周湖第一展望台，依個湖係火山湖，湖水有高透明度，係阿寒國家公園一部分，湖邊同湖面係保護區，禁止車船進入。
據導遊講，依個湖好深，所以冬天都好難結冰
摩周湖全景
摩周湖上有一個湖中島，原住民阿伊努人傳說在一次戰爭中，有個婆婆帶着孫兒逃難時，但在摩周湖附近失散了。婆婆因傷心和勞累下再也走不動，只好在湖邊等，但時間一天天的過，最後變成這個湖中島(咪似我哋嘅望夫石)，婆婆亦變成咗神，而島就叫做神婆島。
摩周湖日本人又叫佢做「神秘の湖」，原住民阿伊努人叫佢為山神之湖。依個湖冇河流注入，但湖面水位冇乜變化，水從何來？而湖面時常被大霧籠罩，好難睇得晒，更添神秘氣氛。
睇完摩周湖就坐車去今次包車嘅最後一站：川湯溫泉駅。
我哋喺依度轉火車去網走
站外嘅街道都冇乜人行
川湯溫泉駅係一個古董車站，建於1930年，但現時人口減少，已於1995年改為無人站，上落車都係自己搞惦(類似搭巴士)。
站內原本嘅廁所改裝成足湯室俾遊客浸吓
我都唔好嘥
我浸腳時，芊芊見到透過玻璃嘅影色都幾得意，好似幅油畫咁，影咗落嚟。
而車站內嘅辦公室同侯車室改為咖啡店，我哋見有成個鐘時間，順便幫襯啦。
室內嘅佈置好似時光倒流70年咁
我哋叫咗湯同pizza，好好味
食完就去月台等車，月台上有個熊捉三文魚嘅雕塑(北海道係三文魚迴游嘅熱點)。
火車嚟啦，同好多鄉郊車一樣，只係得一卡。
火車司機位旁同巴士一樣，上車要取整理券，落車要入錢
約坐個半鐘就去到網走駅，我哋今次住東橫inn，不過好大風雪
依間東橫inn床頭竟然有USB叉電座，我都係第一次見，四年前嚟都未有。
依間東樓Inn逢星期日、二、四晚都有咖哩飯供應，我哋幾年前都食唔到，今次有得食啦！
今晚晚餐可以慳番
D咖哩飯好正！
唔洗半個鐘就派晒咯
食完就行去巴士站，睇定聽朝去坐破冰船嘅巴士時間表先，希望到時冇咁大雪啦
唉，D風雪越嚟越大添，開始對聽日嘅行程有D擔心
網走駅附近冇乜嘢商舖，便利店就只得一間Lawson，芊芊就話點都要行吓架嘞。
店內有近排熱爆嘅「君の名は」商品
又有芊芊最愛嘅炸雞
行返酒店見時間尚早，睇吓D旅遊資料啦(預備plan B)，原來好多資料都係職員自己手寫架喎，又幾有心喎。
留言列表
