2017年1月23日,今朝起身望出窗外,仲係好大風雪,D剷雪車通街走,今次真係不禁倒抽一口涼氣。酒店大門口堆滿雪,門都開唔到,只可以行側門出入。
網走站D火車都唔開
一晚風雪後,街上嘅車堆滿雪
跟住冒住風雪行去網走川睇吓,天上竟然有羣雀仔喺度飛
河面鋪滿浮冰
好大風雪,橋上嘅行人都要掩面行路
返到酒店食早餐,見貼咗張紙出嚟,破冰船冇得坐啦?今朝7點幾上網睇都未公佈,即刻上網睇吓,原來係真。跟住上網睇埋下晝班飛東京嘅機,暫時都冇公佈,但新千歲機場就已經取消咗好多班咯,睇嚟我哋都凍過水啦......
冇得諗咁多嘞,今次即刻改行Plan B啦!全部改為玩室內,首先搭巴士去天都山流冰館。
落車後D風雪大到幾乎眼都睜唔大
入到流冰館影番張相先,依個館係介紹乜嘢係流冰,同埋鄂霍次克海嘅生態。流冰其實係源自中俄邊境嘅黑龍江,每逢冬天黑龍江出海口嘅河面會結冰,而江水會將冰塊沖出鄂霍次克海,形成流冰,再流向太平洋。而每年1月中至3月尾因天氣凍,所以流到網走同知床半島一帶時,仍末溶化可供觀賞。
行去展覽廳嘅天花板都裝飾咗一嚿嚿嘅流冰
展覽廳嘅水族箱展出咗鄂霍次克海嘅生態
裸海蝶,但人人都叫佢哋做海天使,係生活喺寒冷海域嘅浮游生物。
跟住入零下15度流冰體驗室,每人派一條濕毛巾
跟住fing佢大約半分鐘
跟住就全絛毛巾變成冰柱,可以楝起嚟。好得意,好好玩!
跟住行吓紀念品店
買流冰雪糕,試吓寒天食雪糕嘅滋味先
攞出室外食,雪糕都唔會溶
媽咪怕凍,冇得食
—路食,一路等巴士
我哋搭巴士去やまね工房,依度係喺東橫inn嘅旅遊資料上發現嘅,最啱媽咪玩嘅手藝體驗工房
間工房外形好似隻貓咁
依度係有好多小動物嘅毛公仔賣,全部係日本國內手工生產
仲有媽咪最鍾意嘅DIY手工套裝,我哋買咗「やちねずみのキット」,紅背鼠手工套裝。
買咗之後可以現場請老闆娘教做(另收費),或者睇說明書同上佢官網睇影片學做
縫好之後條綿花塞入內
縫上眼晴同耳朵後就完成了
製成品完工啦
整完公仔出嚟D風雪仲大咗,上網check吓航班,真係取消咗。我諗飛唔到,會唔會變李嘉欣咁,滯留北海道四日架?
工房後面嘅「カフェグラスルーツ」(Cafe Grass Roots),喺風雪之下好似幅油畫咁。
跟住返洒店坐吓同check吓夜晚D航班,因為睇到天氣預告話下晝3點後會停雪,希望可以改今晚機落東京啦,盡快離開依個苦寒之地,東京返香港應該冇咁受天氣影響啩。喺東橫Inn借個電話打去日航,佢話可以改,不過航班未知飛唔飛到喎(上網check到話天候調查中),我話照幫我book咗先啦,但佢係咁叫我留聯絡電話比佢,等佢可以通知我,我話我冇電話留,你可以whatsapp我吖。佢係咁話唔知whatsapp係乜?我講極佢都唔知我講乜(可能我D英文屎啩),跟住我叫芊芊同佢講日文,佢都係咁要留電話號碼比佢,最後惟有話我哋會起飛前再call佢confirm啦。之後芊芊話嗰個日航CS嘅日文好難聽,因為每句說話都會加敬語,最後芊芊同佢講:唔好講敬語啦,我聽唔明架。日本人真係太有禮貌嘞。跟住再上網cancel埋今晚熱海嘅酒店,但東京嘅酒店就唔敢book住先,都唔知飛唔飛到。
好啦,天氣嘅嘢,聽天由命啦,正如諸葛亮話:謀事在人,成事在天。一於出去行吓街、食吓嘢啦。行過網走駅見到D工作人員出嚟剷雪,睇嚟下晝應該會停雪啦。
街上店舖都派人出嚟剷雪
我哋本來想揾間烤肉店食吓,不過幾間都冇開,最後揾咗依間「食事処いしざわ」食吓啦。
原來依間舖都好多名人嚟過幫襯,仲簽埋名添,不過雖然上菜慢D(得店主兩公婆做晒),但D嘢食真係好好味。
我哋叫咗海鮮丼
豚肉丼
海鮮拉麵
仲有手羽先
食完飯就去行吓超市,依間叫「スーパー100」,有D似Daiso,好多嘢都賣100円,不過都有唔少貨唔係賣100円嘅
行到4點幾,D雪真係停晒,然後返東橫inn再打電話去日航,不過航班仲未定實飛唔飛到,唔好理佢啦,一於去女滿別空港check in,照樣等飛機啦。
冇嘢做,行吓機場D舖頭啦,雖然得嗰兩間鋪。
再寫番幾張明信片,然後去寄埋啦
等到仲有一個鐘就要飛,但仲係「天候調查中」......
個牌轉咗嘞!終於等到可以入侯機室啦
放下心頭大石,食番件餅先
行過登機橋,見到架機,同冰封嘅跑道
成班機都冇乜人坐,打橫瞓都得
起飛啦
原來依家日航有15分鐘免費wifi喎(其實唔止),終於可以喺半空上網啦,試吓玩都唔慢吖。
個半鐘後就到咗羽田機場啦,即刻上網訂埋東橫inn歌舞伎町店,其實本來想訂品川高輪口店,不過冇晒房吖。
即刻坐巴士出新宿西口,約半個鐘就到咗熟悉嘅新宿街頭
攞房之後就同芊芊出歌舞伎町行吓
之後又去Lawson買消夜
留言列表