2016年5月19日,差唔多成年都冇去過旅行,上次媽咪同芊芊玩咗14日,皓怡要做功課冇得去,今次我同皓怡去餐飽嘅,一放工就出發啦!
本來諗住訂咗阿提哈德(Etihad Airway)係靚嘢,點知嚟咗架塞舌爾航空,D位就普普通通,不過最慘係冇USB比人叉電,隻電話用咗成日接近乾塘吖嘛
大約飛咗八個鐘就去到阿聯酋嘅阿布札比,個機場好大好靚,不過我哋只係停兩個鐘轉機,行吓就算啦
候機室最好後有得叉電
等到夠鐘就去登機,今次就坐意大利航空
坐咗約6個鐘,好準時早上6:30就到咗威尼斯嘅馬可波羅機場,過關好簡單,只係問吓嚟玩幾耐,喺邊度走
同埋即刻換Sim card(只限於西歐),鴨寮街買300蚊,雖然係慢D(呃人嘅4G)但係都幾好用吖
出到入境大堂,可能早得滯D巴士售票處冇人,惟有走出去車站用售票機買飛,不過最麻煩就係部機得意大利文,好在有google translate啫
歐洲搭車最緊要打飛,如果冇打飛當逃票,會罰錢
唔洗半個鐘就出到Mestre啦
皓怡對住嗰間就係我哋今晚住嘅酒店Hotel Tritone,Mestre嘅酒店比威尼斯本島嘅酒店平,同埋聽日走嘅時候方便D
雖然未到check in 時間,但接待員工比我哋擺低D行李先,仲叫我哋坐低飲杯咖啡添
我哋擺低行李就去買48小時交通卡,本來車站有部機可以買,但係唔知點解買唔到,最後惟有去車站售票處買,30歐一張
唔知係咪返工時間,車站好多人等車去威尼斯島,我哋好辛苦先好似沙甸魚咁迫到上到車,但拍卡機唔喺車門度,我心諗會唔會比人捉架?我攞住張卡同前面個鬼妹講"Where to 嘟the card?"個鬼妹幫我傳去車箱中間嘟卡,真係唔該晒佢哋。不過皓怡笑我:唔係咁講架!我話:咁應該點講?解決到就得啦,最緊要佢哋知我想點啫。
大約20分鐘,巴士就到咗威尼斯島嘅Piazzale Roma,即係羅馬廣場
依部就係威尼斯Actv運輸公司嘅拍卡機,只須要第一次搭車時嘟一次,張卡就會記錄咗個時間,以後搭車搭船都唔洗再嘟架嘞
羅馬廣場土嘅Ponte della Costituzione(憲法橋),係連接去Santa Lucia火車站廣場
羅馬廣場嘅水上巴士站
Santa Lucia火車站廣場
廣場上有好多porter專幫遊客車行李去酒店
嚟到威尼斯島最緊要識得睇依張水上巴士路線圖,威尼斯本島同附近嘅外島同位於威尼斯潟湖內(威尼斯及潟湖同被列入聯合國世界文化遺產),交通工具只有船沒有汽車
我哋搭船去第一站Murano(穆拉諾島),亦有人叫佢做玻璃島,佢係威尼斯嘅外島(但仍位於威尼斯潟湖內),由火車站碼頭去大約半個鐘船程
喺海上面見到遠處積雪嘅阿爾卑斯山脈
上岸之後,就行去參觀玻璃工場
因為13世紀開始,威尼斯共和國政府怕玻璃工場引致火災,就將全國嘅玻璃工匠強制遷往穆拉諾島以便管理,所以穆拉諾島係著名嘅玻璃製品生產地,由其係彩色繽紛嘅玻璃。
燒、吹、拉,唔洗五分鐘就做到一個酒瓶,真係犀利!
睇完喺門口影番張相先
全個島都係賣玻璃製品,不過真係好靚
我哋當然要買番D啦,少少哋易於攜帶
喺穆拉諾島買玻璃製品,最緊要認住依個標誌
同埋要No China glass囉
買完嘢,D天色開始好轉,正!
跟住行去穆拉諾島上嘅地標Cometa di Vetro(玻璃彗星)睇吓
睇完就去Faro di Murano(穆拉諾燈塔)碼頭搭船,去睇色彩繽紛嘅Burano(布拉諾島),我鍾意叫佢做彩色島
大約坐半個鐘船就到咗布拉諾島,布拉諾島最出名係D彩色屋仔,每一間都唔同顏色,屋主如果想改色仲要同政府申請添,我懷疑佢係抄希臘嘅藍白小島?
我哋行行吓見到有檔生果好靚,買咗盒士多啤梨食吓先
我哋坐低喺碼頭附近嘅草地就地開餐,22蚊港紙500克,好大粒好好味,正!
食完繼續行吓島上嘅街頭巷尾,好悠閒好舒服
行到攰,我哋就喺依間Al Vecio Pipa餐廳食午餐
因為唔係貴,仲有歐洲少有嘅套餐食添
食飽就慢慢行吓影吓,然後搭返船返威尼斯本島
由布拉諾島坐一個鐘船就返到威尼斯本島嘅F.te Nove碼頭,不過全船滿座,企足全程,有D腳軟添。上岸後就係Chiesa dei Gesuiti(耶穌會教堂),依間教堂建於1715年,已經有400年歴史,不過冇開門,冇得睇入面係點
威尼斯本島內水道縱橫交錯,最適宜搭貢多拉(Gondola)遊覽其中,不過坐貢多拉咁貴,點啱我吖?
不過有時gondola都會塞船架
我唔搭船就惟有靠google map同GPS帶路啦
不過平時我自覺認路同方向感幾好,一嚟到威尼斯就都要投降,D小巷又多又密,最慘係連GPS都收唔到,惟有放開胸懷,順其自然,去到邊睇到邊啦
其實咁又唔錯喎,帶到我去咗D不知名景點
無端端又行到嚟依個我冇預計過嘅聖若望及保祿大殿,又幾靚喎
最後都嚟到Ponte di Rialto里亞托橋,依條橋建於1591年,係現存威尼斯最古老嘅石橋,亦係威尼斯嘅主要景點之一,不過啱啱維修,冇得睇
之後就喺依度搭船去聖馬可廣場
沿住大運河,約坐10分鐘船就到達這個被拿破崙稱為歐洲最美麗客廳嘅聖馬可廣場
喺廣場中央就係聖馬可鐘樓,佢嘅左前房係餐廳
餐廳有樂隊在現場表演
鐘樓嘅右前方係前威尼斯共和國總督府,依家係博物館
總督府旁邊就係嘆息橋,但係見到D人潮就已經令人搖頭嘆息啦,仲多人過旺角
幾經辛苦先迫到埋去影到相,橋嘅左邊係總督府嘅審訊室,右邊係監獄,相傳以前D死囚經過這道橋時,從橋上的窗花望到美麗的威尼斯,都會發出一聲嘆息而得名
其實橋附近仲有好多小販賣自拍神棍同老翻袋
睇完嘆息橋就行返去廣場睇聖馬可教堂
聖馬可教堂最初建於9世紀,經過幾次重建後,現時的教堂係1617年建成的,建築形式係圓拱嘅拜占庭式加尖塔嘅歌德式
教堂頂部鑲有四隻古希臘鎏金銅馬(Horses of Saint Mark)和飛獅(winged lion),都係第4次十字軍東征時從君士坦丁堡搶掠回來的,不過依家睇到嘅都係複製品,真品已經放喺聖堂內嘅寶物庫內。
其實廣場上除咗人多,仲有白鴿多,D遊客買嘢嚟喂佢哋同佢哋影相添
睇完晒之後就搭返船去羅馬廣場,準備結束今日嘅行程
接近9點,估唔到仲可以喺憲法橋度睇埋曰落添
羅馬廣場仲有由Actv經營嘅輕鐵,用張24小時票,可以坐返Mestre
返到酒店攞埋房,都幾好吖
留言列表