2017年7月6日，今朝東橫Inn早餐有咖哩飯，正！
食完早餐就行吓去酒店後面嘅Lawson100円店睇吓
Lawson 100係Lawson便利店嘅附屬公司，除咗一般便利店嘅嘢外，仲多咗D蔬果類副食品，有D似超市。佢哋嘅嘢好多都係100円，但有少量都唔係，但總之就好抵買，尤其係飲品同杯麵
今日芊芊自己行秋葉原，我同媽咪就去埼玉県嘅川越睇吓。首先由新宿塔山手線去池袋，再轉東武鐵道去川越駅，我哋跟住喺川越駅嘅東武鐵道旅遊中心買巴士一日券。
張pass賣300円，可以搭川越市內嘅東武巴士同小江戶名所巡迴巴士
首先係坐巴士去喜多院，喜多院始建於公元830年，當時叫無量壽寺，後於1612年重建並改名為喜多院，院內大部分建築都係國指定重要文化財。
山門前有間白山神社同天海大僧正銅像
喜多院嘅山門，建於1632年，係喜多院現存最古老建築物
喜多院又名川越大師
院內嘅大殿～慈恵堂，可以入內參觀，但不可以影相
院內嘅多寶塔
院內嘅七福神廟，主要供奉七福神中嘅大黑天，大黑天本來係印度教嘅神明，後來變成佛教嘅護法神，傳到日本後再變成掌管農業同財富之神。
遇啱有人來參拜
跟住再參觀客殿(三代將軍德川家光出生地)同書院(家光乳娘春日局嘅起居間)，不過因為係國指定重要文化財，所以唔可以影相
院內嘅紅葉山庭園
五百羅漢像
依個羅漢意然攞住莊子嘅名言
紫陽花都開得好靚
喺喜多院巴士站對面有間日枝神社，係國重要文化財，本來想行入去睇吓，不過啱啱有巴士嚟，所以冇入去睇
再搭車去下一站～冰川神社
冰川神社個巴士嘅候車亭幾靚，媽咪話要影吓
冰川神社嘅入口，冰川神社始建於541年，係關東出名嘅結緣(即係求姻緣)神社
神社入口嘅手水舍
川越冰川神社每年七至九月都舉行「縁むすび風鈴」，即係「緣結風鈴祭」，神社內掛起兩千幾盞顏色斑斕嘅風鈴，掛著善信對良緣的祈願，隨著風將祈求送達天庭。
神社內亦有一D純透明嘅風鈴
冰川神社停車場入口有一個大木鳥居，高15m，係日本最大嘅木制鳥居。鳥居上嘅題字「氷川神社」，係出自幕末重臣勝海舟
境內嘅攝末社之一～護國神社，祭祀西南戰爭嘅亡靈
神社內嘅人形流
將神社提供嘅人形和紙吹三口氣，然後抹過身體，然後放在小溪上，流過結界，就可將身上唔好嘅穢氣帶走
神社內嘅御神木，已超過600年歷史
繪馬隧道
神社嘅舞殿
冰川神社求簽用釣魚嘅方式，求姻緣釣粉紅色，求平安就釣紅色，媽咪求到支大吉簽
行完冰川神社就再搭巴士去藏の街
蔵の街又名川越一番街，依度保存咗好多江戶時期嘅建築物，所以川越有小江戶嘅外號
川越藏の街建築物特式係外牆好厚，往往超過一呎，所以連二次大戰都對佢哋影響唔大
行咗陣就同媽咪去cocoro 川越店食甜品
媽咪要咗個抹荼雞蛋蛋榚，我就要咗杯抹荼新地
川越另一特式係好多人着和服，依間かんだ仲有得日租添。每個月18號更有「川越和服日」，穿著和服可獲得博物館與指定商店嘅購物優惠。
咁旺嘅大街竟然有間種子店
店門前有盤桔梗，D花開得好靚
依間陶舗やまわ好出名，日皇都曾經同瑞典國王嚟過，入面仲有餐廳同陶藝教室添
店內嘅筷子同箸置好靚
我哋好多時去日本都會買D筷子同箸置，今次媽咪反而冇買，淨係買咗幾條made in japan嘅毛巾
店後面有間三峰神社
舊八十五銀行本店本館，建於(大正七年)1819年，係國定文化財。
大正時代mix江戶時代
川越嘅地標時の鐘，原鐘樓建於江戸時代嘅寛永年間，但毀於1893年的川越大火，現時嘅鐘樓係1894年重建
時の鐘後面有間藥師神社，係1894年重建鐘樓時一齊建成，作用係保佑新鐘樓唔好再招祝融之災。
鐘樓旁嘅小商舖，媽咪話個牛奶仔同牛奶妹好得意，要影吓相喎
啱啱有幼稚園生放學
不過天氣熱，行咗一陣就揾咗依間和芳庵飲杯茶食件和菓子
依間係一間明治時代嘅歷史建築物，前身叫藤井屋吳服店，現時樓下係狹山茶長峰園，樓上就係和芳庵，我估兩間應該係同一個老闆。
我哋叫咗心形菓子同米通卷配狹山茶，狹山茶係產於埼玉縣同東京都西部嘅荼，被稱為日本三大銘茶之一，同宇治茶、静岡茶齊名，不過佢係煎茶，我覺得冇抹茶咁好飲
飲完茶就行去菓子屋横丁，依度成條街都係賣糖果，都係得個睇字
行行吓見到啁個間蔬果店，仲多嘢睇
見D網紋瓜幾抵，個老闆仲話係日本no 1添！
媽咪話買個返酒店試吓喎
行去搭巴士走時見到「どんぐり共和国」，影返張相先走
返到川越駅，不過媽咪話唔想返東京住，依度冇東京咁多人，舒服D，連行步路都可以慢D。
駅入面有間Book first書店，見到日本嘅學生暑假係自由研究同做實驗，諗起香港D學生大部分都係做補充練習同返補習班，真係悲哀。唔怪之得日本係亞洲最多獲諾貝爾獎嘅國家，踏入21世紀後，日本人嘅獲獎次數更僅次於美國，居世界第2。
跟住我哋去咗杵屋食咗個晚餐
食完就去附近嘅unicus商場揾Daiso買把刀仔今晚切網紋瓜
行完出嚟啱啱日落，幾靚吖
個瓜超甜，好好味！
留言列表
