close
2013年7月8日，依間東橫Inn嘅早餐多D嘢食，有蛋同炸魚餅。
食完早餐，check out寄行李，之後行去鹿兒島中央駅對面嘅東21巴士站，搭免費車上城山公園。就喺依個東21巴士站，其實嗰架車係屬於城山觀光酒店嘅接駁車，不過佢又比人搭順風車上山。
巴士站前望返博多駅，個AMU嘅摩天輪好搶眼。
巴士站度有講D收費辦法，有樣幾得意就係一個6歲以上嘅小童帶一個6歲以下嘅幼童，收一個小童錢。但兩個都未滿6歲嘅幼童反而要收2個小童錢。
城山公園嘅巴士站。
公園前嘅紀念品店，有好多西鄉隆盛嘅嘢賣。
沿住城山自然步道行上山，綠蔭蔽天，雖然係夏天，都好舒服。
路上有隻貓好乖，係咁摸佢都唔走。
上到展望台嘞
城山公園展望台，可以望到鹿兒島市同對面嘅櫻島火山。
依度亦係西南戰爭嘅主要戰場，當年西鄉隆盛因不滿明治維新太急進而忽略低下層武士的利益，最終辭職返鹿兒島(佢家鄉)教書，傳授武士道精神。但不容於政敵大久保利通，西鄉最後以清君側之名起兵造反，首先想攻下熊本城，但久攻不下，令元氣大傷。退兵回鹿兒島後被政府軍追擊，最後在城山切腹自殺。12年後明治天皇終於為佢平反。而佢嘅故事即係電影最後武士嘅藍本。
依度風景好靚，明治天皇都有嚟過架。
昭和天皇做太子時都有嚟，仲種咗棵公孫樹，即係銀杏(白果)樹。
睇完就落返巴士站等巡迴巴士去鹿兒島碼頭。
架巡迴巴士車身有西鄉同篤姬，佢哋都係鹿兒島人，一個係維新三傑之一，一個係幕末時期嘅幕府「母后」，幕末最後一刻代表雙方談判，最終達成江戶「無血開城」，避過一場血腥內戰(雖然土方歲三不服而領兵出走北海道)，佢地兩個都對現代日本有巨大貢獻。
依度就係鹿兒島去櫻島嘅渡輪碼頭
架船係上層載人，下層載車嘅。
船上嘅展望席
船上嘅小賣部
食麵處，但成個航程都係嗰15分鐘，咪要食得好急？
向櫻島進發
櫻島火山係世上少有嘅活火山，喺家都間唔中爆下架！
約15分鐘就泊岸囉
在櫻島碼頭上
我哋行去遊客中心嘆吓冷氣先
櫻島遊客中心
過完冷河就行下去睇溶岩步道。
浸完就搭巴士去黑神埋沒鳥居，喺碼頭個巴士總站，有個大嬸教我哋買巴士一日票，因為搭去黑神埋沒鳥居好貴，一來一回仲貴過一日票！D日本人真係好好人架！
依個本來係一間神社嘅3米高鳥居，不過喺1914年(大正三年)嘅大正大爆發時，比D溶岩埋沒咁滯，可以見到大自然嘅威力幾咁犀利！
睇完就行去黑神中學前嘅巴士站等車返碼頭，忽然間聽到行雷聲，我仲話乜咁好太陽都行雷呀？
跟住行後D去望下個天，嘩！原來係火山爆發呀！
火山灰伴隨隆隆聲向天噴發！
影返張相先，跟住見到有巴士到，冇得影囉，走啦。
我哋架巴士要喺中途站「東白浜」轉車，等車時見到間屋仔同有紅葉好靚，影返幾張先。
架巴士上貼咗D幼稚園學生嘅勞作，好可愛。
我哋架巴士喺途中經過一間幼稚園，有個好似保母嘅日本妹帶住十幾個學生上車，D細路好乖沿途坐定定，每到一個站時，個保母拖D細路落車，D媽咪就喺巴士站接細路，又比我見識到一D日本人嘅生活方式嘞。
返到碼頭總站囉。
碼頭隔籬嘅公園
睇完就搭返船返鹿兒島囉
搭番巴士返AMU商場醫肚先，媽咪食鹿兒島黑豚定食
皓怡食鹿兒島黑豚咖哩飯
我就食鹿兒島黑毛和牛飯
全部都係鹿児島縣產架，好好食！
食完就行超市買水果
D水蜜桃好正！
返酒店途中見到間動漫店，我哋想入去睇下有冇嘢啱芊芉，不過個店員係咁洒手擰頭，我估可能只係招呼會員掛，咪叫我哋唔好入去囉
喺東橫Inn攞埋D行李走啦。
返到鹿兒島中央駅，見到有個牌話今日嘅指宿之箱專車都幾滿架。
我哋又係搭N700系返博多，點解冇800系坐架？
返到博多就攞行李去Green hotel攞房先，然後就搭巴士去福岡塔。
博多夜景都幾靚吖。
見到中文嗰格，真羞家......
好耐冇見過依部Puzzle相機啦，即刻玩下先。
就用啱啱影張相嚟做，都幾好吖，唔係貴。
玩完就落巴士站搭車返博多駅囉，D日本人等巴士排隊時會喺行人路留番一段空間比其它行人路過，真係為他人設想，要讚！
D路線牌好清楚，幾點有車到一目了然。
返到博多駅，媽咪話要買D雞仔餅做手信喎
宵夜係豚王杯麵加鮮奶。
文章標籤
全站熱搜
留言列表
