2017年1月20日,今朝咁哋冇喺東橫Inn食早餐,而似去咗行函館朝市
函館朝市係日本出名嘅朝市之一,每年遊客有成二百萬人,主要係賣漁農產品。
蒸蟹腳
蒸毛蟹
我哋玩函館朝市最出名嘅釣魷魚,檔主會視乎當日嘅魷魚大細而定價,今日係910円釣一隻,再整埋刺身。
俾錢之後,個店員就俾一枝有鈎嘅魚杆媽咪,然後就叫媽咪用個鈎去勾住魷魚嘅尾翼就釣到,原來D魷魚真係好易釣,媽咪兩吓就釣到啦。
之後就攞去檔主度整刺身
好快手,切開晒
依嚿係魷魚嘅肝臟,係新鮮劏魷魚先有得食架
個魷魚頭仲識跳跳吓
跟住再食烤扇貝,700円一隻,附送一碗湯
媽咪掛住食,相都唔得閒影
再食海膽,好味道。
食吓出名嘅墨魚包
入面有好多墨魚肉
除熟食外仲有好多新鮮海鮮賣
行完朝市,臨走時媽咪買埋飯後果先走
其實好果想坐低慢慢食,可以喺依個「函館朝市 どんぶり横丁市場」食架,入面有十幾間舖頭,有D似築地外市場咁囉。
之後返東橫inn拉埋D行李去火車站,搭火車去登別,臨走前喺函館駅影番張相先
喺車上食埋我哋嘅飯後果,日本D士多啤梨真係好好味,媽咪見親都話要買
到咗登別駅就揾Locker鎖行李,不過依個站最麻煩就係唔夠locker。今次同我哋上次嚟一樣,就係淨返最後一個locker,我哋只係放得兩個喼。好在依個站個旅遊中心可以寄行李(但5:45pm前一定要攞走),我哋放咗一個喼喺佢哋度,然後出去搭道南巴士去溫泉街。今次登別駅有一個好特別嘅服務,就係有當地義工幫遊客拎行李上落火車同巴士,幾年前都冇依樣嘢嘅。
大約15分鐘就到咗登別溫泉街
日本人通常會叫D有溫泉水噴出嘅地方做地獄,登別就有好多依D噴氣口,所以溫泉街依度好多鬼怪裝飾。
連水渠蓋都係鬼怪
街上有閻羅王坐陣嘅閻魔堂,不過今次嚟嘅時間唔啱,冇得睇閻羅王變臉
依條路就係上熊牧場,不過今次時間唔夠,冇得去睇「熊出沒注意」囉
我哋上次嚟,曾經喺依個溫泉市場食好好味嘅烤扇貝,今次本來想再食過,不過今日好多遊客,度度都要排隊,我哋唔想排冇食到。
行到噴緊水蒸氣嘅登別泉源公園
溫泉街嘅店舖,好多都將D植物包起,唔知係咪驚佢哋凍死呢?
行到去湯澤神社
跟住再行去地獄谷
不過因為要就返登別駅嘅巴士時間,所以都只係喺谷口個牌影吓相就算
青鬼和赤鬼
喺登別溫泉駅搭道南巴士返登別駅
返到登別駅就行去登別海洋公園
計準時間睇2:15企鵝巡遊
由工作人員帶出場
鍾意食雪嘅巴布亞企鵝
成日頭岳岳嘅國王企鵝
大約巡遊15分鐘D企鵝就返歸啦
睇完企鵝,本來想睇海豚表演,但芊芊語訓練海豚好唔人道,唔想睇喎。咁咪轉咗去睇水族館囉。
水族館入面有個水池可以俾遊客伸手入水中,摸吓D海星、海參、魔鬼魚同馬蹄蟹等,但唔可以將佢哋攞出水面。
我見隻馬蹄蟹反轉咗身,等我幫佢反身先
又睇吓爬蟲同兩棲館
熱水槽同冷水槽分別養有有好多唔同嘅海洋生物
冷水槽中養嘅海天使
行海底隧道
睇埋水母
芊芊話依款海豚毛公仔,香港海洋公園都有得賣
睇到依個公仔掛住嘅牌,我估九成九用咗google translate啦
臨走前影吓相先
登別海洋公園門口有幾條柱,日落時都幾靚吖。
跟住行出去登別駅
登別駅前歡迎遊客嘅鬼怪
當地D經濟睇嚟非常差,依幅地賣咗幾年都賣出,依幅相係今次影,下面個幅係四年前影。
依幅相係2013年2月影
連四年前嘅宮武商店都執埋
2013年嘅宮武商店仲有招牌同開門
差唔多夠鐘火車到,見到有一批當地義工行去火車站開工,我估可能依度因為少咗遊客,所以居民組織義工隊幫吓遊客,希望可以吸引多D遊客嚟啩。
我哋一入閘,就有個義工同芊芊講咗句嘢,之後幫皓芊攞行李行去對面月台等車,我就睇都唔睇就跟住嚟,點知咁就瀨嘢啦。我當時仲坐低睇吓車程,原來同一時間有兩班車同時到,個義工以為我哋去洞爺(多數人部係咁去),所以幫我哋攞咗嚟對面月台,當我見到兩邊火車同時到,而我哋依邊火車嘅終點牌唔係札幌就知瀨嘢。即刻攞起行李狗衝過對面月台,但已經關咗車門開車啦......
惟有死死地氣出返去車站等下一班車啦,好彩我哋有JR Pass同只係等一個鐘啫
我哋今晚要去帶廣,中途要喺南千歲轉車,喺南千歲約有一個鐘轉車時間,我哋去咗站外嘅Rera Outlet Mall食嘢
最後夜晚九點幾先去到帶廣東橫Inn,依度勝在近火車站,約行五分鐘就到
擺好行李就行返去火車站附近買宵夜,火車站廣場都有D燈飾睇吓
媽咪話見D雪一堆好似好平整咁,話要試吓有幾深喎
芊芊話要晚晚都試吓唔同嘅飲品喎,我就通常只買當地嘅牛奶。
芊芊鍾意食Lawson嘅炸雞
媽咪就鍾意食布甸
留言列表