2017年1月19日,今朝我一早起身食完早餐就出街行吓先,首先行去酒店附近嘅新善光寺。其實現時好多日本寺院都唔係俾憎人修行,,而係俾人安放祖先嘅骨灰同靈位(類似寶福山),依間都係這類。
寺內嘅寶塔(合葬墓)
跟住行去中島公園,途中見到依間「玉宝禅寺祖院」和「豊川稲荷札幌別院」。日本自明治初年頒布「神佛分離令」後,這類佛寺和神社一齊嘅地方已經不多。
原來依間神社同佛寺係供奉娼妓同夭折嬰兒
供奉嘅地藏尊都係小童形像
寺內有七福神同觀音菩薩
過咗神社之後沿著「鴨々川」再向前行
約行五分鐘就到咗中島公園嘞,依個公園喺札幌市中心,一年四季有唔同景色,冬天更有滑雪用具(雪靴、滑雪板、雪杖)出租,以便可在公園內進行越野滑雪。
公園內嘅豊平館,係建於1880年嘅西式木建築物,當時是一座高級西洋賓館。第一個入住嘅係明治天皇,現時係日本的重要文化財。
公園內嘅「伊夜日子神社(彌彥神社)」,不過好大雪同冇乜時間,只係影咗幾張相,冇行入去睇。
之後返酒店join埋媽咪同芊芊,拖埋行李搭地鐵去札幌駅再轉火車去函館
又做電車男
我覺得日本D地鐵同火車站如果多D扶手電梯就好啦
跟住搭10:44特急落函館,不過今日大雪,火車遲咗成大半個鐘先到。不過北海道嘅冬天就係咁架啦……
火車中途經過一個站叫伊達紋別,見到有一頂古代武將嘅頭盔,我諗:唔通同戰國武將伊達政宗有關?搜尋吓先知依度屬於伊達市。原來明治天皇當年真係委任伊達政宗家族嘅後人嚟這裏開墾,並將這裏命名為伊達市。
約三個半鐘就去到函館駅
車站外有個裝飾幾靚
今次我哋住東橫inn函館朝市店
比起Super Hotel,東橫Inn寬敞好多
放好行李後就行返去函館駅嘅旅遊中心買張函館市電1 day pass,駅前嘅燈飾著咗燈囉
搭市電去五稜郭公園前駅
喺電車站大約行十分鐘就到五稜郭公園
路上好多雕塑
高107米嘅五稜郭Tower,於2006年啟用,塔上可以望到個五稜郭城。
今日冇乜人參觀,我哋喺售票處出示函館市電day pass可獲贈明信片一張。
搭電梯上90米嘅展望台,可以望到函館市內夜景,同埋成個五稜郭公園。
依家有個晚間燈飾展「五稜星の夢」,將整個五稜郭城用2000個燈泡照亮起來。五稜郭城係日本幕末時期興建嘅一個城(1864年完工),同平時見到有天守閣嘅日本城池唔同,係五角星形。因為依度係平地,建成星形會易於防守。1867年11月德川幕府末代將軍德川慶喜向明治天皇交還政權(大政奉還),1868年江戶(東京)無血開城,但部分幕府軍(榎本武揚、土方歲三......)不服不戰而降,將江戶灣嘅幕府軍戰艦駛到北海道箱館(即現時函館),佔領五稜郭城,並宣布成立蝦夷共和國。明治新政府軍揮軍北上,箱館戰爭正式展開,最後土方歲三戰死,1869年榎本武揚投降。北海道正式納入明治新政府管轄。
芊芊話依個土方歲三雕像同動漫中形象差好遠
展望台上有關於箱館戰爭嘅展覽,依幅畫就係講榎本武揚向新政府軍嘅西鄉隆盛投降。我諗西鄉點都估唔到幾年後,自己都變成叛軍,要同政府軍對決,最後仲要切腹自盡,令人希噓......
睇完之後搭升降機落返一樓嘅展覽場,依度裝飾亦配合「五稜星の夢」主題,好靚
大廳中亦有一座土方歲三雕像同幕府軍嘅戰車,日本人都好尊重依位末代武士,尊崇佢嘅武士道精神,好多動漫都有以佢為題材,芊芊都好鍾意佢。
新政府軍嘅軍旗同戰車,但唔見西鄉隆盛喎
五稜郭公園內嘅箱館戰爭供養塔
在五稜郭公園內望向五稜郭Tower
跟住搭電車去元町睇教堂,元町自幕末起已經係使館區同外國人聚居地,所以有好多唔同嘅教堂。
元町嘅日本基督教團函館教會
天主教元町教会,現時的教堂建成於1924年,最出名係教堂內嘅聖壇係教宗本篤15世所贈
東正教堂,建於1916年,現時係國家重要文化財產
聖公會聖約翰教堂,建於1979年
大三坂嘅燈飾
跟住搭吊車上函館山睇夜景
函館夜景被稱為世界三大夜景之一,梗係要睇吓啦
睇完夜景就落返十字街食嘢,今次食Lucky Pierrot,這間漢堡包專門店只用道南產嘅新鮮食材,曾被選為日本第一美味漢堡包
我哋先喺樓下落咗單先
然後上樓上餐廳等送上來,因為係即叫即整,所以要等好耐先有得食
芊芊食特大咖哩飯,有豬扒、炸雞、漢堡扒同煎蛋,芊芊話好好味,個店員仲專登問:好大架,你真係食得晒?
依個就係人氣no 1嘅炸雞漢堡
依個就係人氣no 2嘅煎蛋漢堡扒包
返酒店前再去7仔買宵夜
留言列表