2014年6月8日,今朝食完早餐就拖箧去徳島駅搭火車去阿波池田。
咁啱今日徳島駅有儀式紀念徳島線鐵道開通100週年,仲有Train girl影添。
四國相對日本其他地方較為落後,D鐵路班次亦唔密,所以D鐵路多數都係單軌雙程行車。
個零鐘火車就到咗阿波池田駅,一出站就見到個靚女等我,因為之前我用email訂咗今日嘅觀光巴士,所以巴士公司派職員嚟車站收錢同比埋個團章我哋。
依個就係今日我哋個團章,後面仲寫埋個座位號碼添。
跟住就去寄行李,不過依個車站好細,連locker機都係得幾個咋,好彩快手如果唔係就麻煩囉
寄完行李後,就影番張相先
10:40好準時,我哋今日坐嘅観光巴士~小便小僧號就到啦。
我哋今日係去嘅祖谷,係日本三大秘境之一,因為山路崎嶇,巴士每日只得幾班,唔搭依架巴士都好難去到。
架車係個山度兜呀兜,兜呀兜......
約大半個鐘就到咗第一站~小便小僧
睇完小便小僧,跟住就去食午餐,地點係祖谷美人餐廳
最好味係依條鹽燒香魚,D魚係祖谷溪特產,好正
食完飯就行出餐廳嘅露台睇風景
餐廳整咗隻小便狸貓喺度
下面就係祖谷溪
食完飯後就去睇日本三大奇橋之一嘅~蔓橋
相傳源平合戰時期(1180至1186年),平家喺壇ノ浦一役戰敗後,由於平家部屬逃避源家的追殺,所以逃入此秘境,仲起咗依條由藤蔓織成嘅橋出入,如源家殺到嚟,就斬斷D藤,等源家軍沒法過河。
過橋一步一驚心
行完蔓橋就行去睇琵琶の滝
睇完琵琶の滝,就行返依條鋼筋混凝土橋(唔可以行蔓橋)去架觀光巴士度,喺依條橋影蔓橋好正架!
未夠鐘上車,芊芊喺依度買雪糕食,不過食到一半跌咗個雪糕球落地,個老板娘見到就叫芊芊行過佢度,比番嚿芊芊喎,真係多謝哂!
然後就去平家屋敷,依間屋係由平家部屬嘅後人捐出嚟,比人参觀。
話說源平合戰後,安徳天皇嘅御醫隨平家部屬流落在此,佢嘅後人於明治時期仲做個議員添,後來仲將佢間祖屋捐出嚟比人參觀。
睇完平家屋敷之後,就去道の駅大歩危嘅妖怪屋敷參觀
有隻好高大嘅妖怪嚟迎接我哋
媽咪同芊芊買嘢,我同皓怡出咗去露台影相
下面嘅祖谷溪有人玩獨木舟喎
睇完妖怪之後之後就再去大歩危舟下り搭船遊大歩危峽
祖谷溪真係好多香魚架
遊完船河就返阿波池田駅搭南風號去琴平
約半個鐘就到琴平駅,依個站外型有D似歐洲D車站。
出琴平站後沿著参道向前行五分鐘就係琴電琴平駅,依度可以搭電車直到高松市架。
琴電琴平駅旁邊有個公園仔,有個建於1860年嘅高燈籠,高28米,係日本最高嘅燈籠。
兩個細路話要玩馬騮架
參道上嘅金刀比羅宫嘅大鳥居
喺金刀比羅參道上嘅水渠蓋
大約行10分鐘就到咗我哋今晚住嘅旅館「つるや旅館」,中文係「鶴屋」温泉旅館
已經有百幾年歴史嘅つるや旅館,
今晚嘅房間喺和室,温泉旅館通常都係和室,即係冇床,係瞓榻榻米嘅,我都係第一次住咋
房中有張茶几,有D小食比我哋做茶點。
浴室內有個和式浴缸
溫泉旅館通常都係一泊二食,我哋Book咗今晚7點食晚餐,未夠鐘食飯,行吓街先
金陵釀酒廠
中野烏冬學校
開餐囉
返到房間,原來已經有人幫我哋舖好床舖啦,我仲以為要自己開添。
浸完温泉,返房睇吓電視就瞓嘞!
留言列表